Михута: “Аны сайын кэллэххинэ бэйэҥ көрөн соһуйуоҥ”

//Манчаары-2021

Бары билэргит курдук, быйыл сайын от ыйын 6-11 күннэригэр Горнай улууһун Бэрдьигэстээх сэлиэнньэтигэр спорт национальнай көрүҥнэригэр “Манчаары оонньуулара” XXI спартакиада ыытыллыаҕа. Бу улахан таһымнаах күрэхтэһии тэриллиитэ өссө 2017 сыллаахха Саха Республикатын Ил Дарханын дьаһалынан быһаарыллыбыта.

Горнай улууһа билигин хаһааҥҥытааҕар даҕаны сэргэхтик олорор. Тоҕо диэтэргит, аны сайын улуус киинигэр Бэрдьигэстээххэ спорт национальнай көрүҥнэригэр “Манчаары оонньуулара” спартакиада ыытыллаары турарынан, туох баар хамсааһын, үлэ-хамнас барыта онно туһуланар. Улуус экономиката да, тутуу, суол-иис, сибээс сайдыытыгар сүрдээх элбэх үлэ ыытылынна, ыытылла да турар. Дьокуускай – Бэрдьигэстээх суола биллэрдик тупсубут, урукку курдук буор суолунан буолбакка, билигин асфальт суолунан түргэнник сыыйылыннаран тиийэҕин.

“Аны сайын кэллэххинэ бэйэҥ көрөн соһуйуоҥ”

Биир идэлээҕим, Горнай улууһун “Бэрдьигэс” телестудиятын суруналыыһа Михаил Мордовской – Михута бириэмэ булан, бэйэтин массыынатыгар олордо сылдьан, оонньуулар ыытыллар сирдэрин кэрийэн көрдөрдө.

Массыына ыытарын быыһыгар киһим айаҕа олох хам буолбат:

-Оонньуунан сибээстээн үлэ бөҕө ыытылла турар, — диир, ону барытын күннэтэ телевизорынан “Саха” национальнай көрдөрөр-иһитиннэрэр хампаанньа биэриитигэр ситимнээхтик көрдөрө сылдьар киһи быһыытынан, хаһааҥҥытааҕар даҕаны боччумнаахтык.

Сотору, бэрт түргэнник айаннаан тутулла турар улахан объекка кэлэбит. Бу, анал интернаттаах ытыы көрүҥнэрин (буулдьанан уонна оҕунан) комплекса эбит. Таас тутууга үлэ күөстүү оргуйа турар. Каскалаах, анал таҥастаах дьон биир кэм үлүмнэһэн үлэлии-хамсыы сылдьаллар. Биһиги үлэһит дьону аралдьыппатыбыт, таһыттан көрдүбүт.

Салгыы стадиоҥҥа элээрдэн тиийдибит. Тимир каркааһынан киин олорор сир (трибуна) оҥоһуллубут, аны ситэриллэрэ эрэ хаалбыт. Барыта 1000 киһи олорон көрөр, үөһэттэн кырыыһанан хаххалаах трибуната буолар эбит.

-Ити кырыыһата трибунаны барытын сабар, күлүктүүр. Бу иннинээҕи стадионнары көрбүтүҥ? Сүрүн ортоку эрэ трибуналара кырыыһалаах, оттон биһиэнэ бүтүннүү хаххалаах буолар, — диэн киһим киэн тутта кэпсиир.

Итиэннэ трибуна саамай сөптөөх сиргэ туруоруллан, стадиону эргиччи көрөргө табыгастааҕын быһаарар.

-Аны сайын кэллэххинэ бэйэҥ соһуйуоҥ, дьэ киэркэйэн бэртээхэй стадион буолуохтаах, — диэн, элбэхтэ мунньахтарга, көрсүһүүлэргэ сылдьан стадион хайдах буолуохтааҕын былаанын, схематын барытын билэр, хараҕар ойуулаан көрөр киһи быһыытынан дьоһуннаахтык кэпсиир.

Сүрүн трибунаны кэккэлии икки өттүттэн хомуллан оҥоһуллар трибуналар туруоруллан биэрэллэр эбит. Ити курдук, трибуна утары икки улахан экран, оонньуу уотун вышката, массыыналар турар сирдэрэ ханан буолуохтаахтарын биир-биир ыйан көрдөрөр.

Стадиоҥҥа кэлэн көрөр кэммитигэр трибуналар тастарыгар үлэһиттэр үлүмнэһэллэр, аны улахан кран массыына бирилээн тиийэн кэллэ. Онон, этэргэ дылы, улахан тутууну ыытарга үлэ күөстүү оргуйан эрэрэ көстөр.

Салгыы Михута, многоборье күрэхтэһиитэ буолар сирин көрдөрдө. Улахан трактордар хаары ыраастыы сылдьаллар. Бу көрдөххө, оонньуу буолар сирэ барыта чугас-чугас эбиттэр.

Ол быыһыгар үлэлиир дьиэтин – телестудияны хайаан да көрөн барарбытын эттэ. Итиэннэ тиийэн компьютерын холбоон, Горнай улууһун нэһилиэктэрин спорка историяларын кэпсиир анал биэриини саҕалаабытын быһа тардан көрдөрдө.

х х х

Түмүккэ, Бэрдьигэстээххэ бэчээккэ сурутууга анаан тиийэ сылдьыыбар, төһө да кылгас кэм бэриллибитин үрдүнэн биир идэлээхтэрим: “Үлэ күүһэ” хаһыат корреспондена Василий Тимофеев, “Бэрдьигэс” телестудия оператора Михаил Мордовской – Михута бэйэлэринэн батыһыннара сылдьан, Манчаары оонньууларыгар аналлаах тутуулары көрдөрбүттэригэр, кэпсээбиттэригэр барҕа махтал!

Арааһа сэрэйдэххэ, ыам ыйыгар, эбэтэр бэс ыйыгар үгэс быһыытынан оонньууга бэлэмнэниини билсэ куораттан суруналыыстар бөлөхтөрө Горнайга тиийэрэ буолуо. Ол саҕана, Манчаары оонньууларыгар анаан Бэрдьигэстээх өссө тупсарыгар, киэркэйэригэр, спортивнай тутуулар силиктэрин ситэллэригэр эрэнэбин.

Петр ПАВЛОВ.

Ааптар хаартыскаҕа түһэриилэрэ.       

Добавить комментарий

Ваш адрес email не будет опубликован. Обязательные поля помечены *