Михаил Друзьянов: “Триумфка” тустуу музейын аһарга былаанныыбыт”

Олимпийскай чемпион Роман Михайлович Дмитриев кэриэһигэр көҥүл тустууга эдэрдэргэ норуоттар икки ардыларынааҕы турнир кэмигэр “Триумф” Спорка бэлэмнэнии киинигэр бастакы олимпийскай чемпиоммутугар аналлаах быыстапка үлэлээтэ.

Быыстапка туһунан бэйэтэ көҥүл тустууга ССРС спордун маастара, спорт энтузиаһа, билигин республикатааҕы спортивнай музейдар холбоһуктарын салайааччы Михаил Егорович Друзьяновтан билиһиннэрэригэр көрдөстүбүт.  

-Спорт миниистиригэр киирэн кэпсэппитим, биһиги турнир кэмигэр быыстапка тэрийиэхтээх этибит, ону тохтотоору гыналлар диэн. Ханныгын да иһин, Роман Михайлович турнирыгар араас сиртэн кэлэллэр, онон Емельян Ярославскай аатынан республикатааҕы кыраайы үөрэтэр музейга баар Роман Дмитриев наҕараадаларын дьоҥҥо көрдөрүөххэ диэн кэпсэтэн аҕалан, быыстапкабыт турнир кэмигэр икки күн турда. Үчүгэйэ диэн, Роман Михайловиһы улахан спортан атаарыыга 1982 сыллаахха оҥотторбут улахан холустабыт аҕалыллан, дьоҥҥо аан бастаан көрдөрүлүннэ. Бу үлэни боксаҕа сахалартан бастакы ССРС спордун маастара Артём Никифоров оҥорбута. Ону биир киһиэхэ, дьиэтин кырыыһатыгар 40-чэ сыл сыппытын булан аҕалан көрдөрүүгэ туруордубут. Маны өссө реставрациялыахпыт уонна музейга экспонат быһыытынан ылыахпыт.

Быыстапкаҕа Роман Михайлович икки олимпийскай мэтээлэ баар. Ону таһынан кини ССРС уонна Россия үтүөлээх тренердэрэ буоларын көрдөрөр докумуоннара, Советскай Союз чемпионаттарыгар бастаабыт мэтээллэрэ, ССРС Сэбилэниилээх Күүстэрин күрэхтэһиитигэр кыайбыт биэс мэтээлэ, государственнай наҕараадалара туруорулуннулар. Ону тэҥэ Роман Михайлович – Америка холоһуктаах штаттарын Дакота штатын бочуоттаах гражданина эбит, ону туоһулуур бэлиэни көрдөрдүбүт. Өссө спорка ситиһиилэрин уонна дьиэ кэргэнин көрдөрөр хаартысканан стендэлэрэ турдулар.

Инникитин ханнык баҕарар улахан таһымнаах күрэхтэһиилэргэ, холобур аны күһүн улуу тренер Дмитрий Петрович Коркин турнирыгар эмиэ анал быыстапка туруорар былааннаахпыт. Уопсайынан, “Триумф” Спорка бэлэмнэнии киинигэр тустуу музейын аһарга соруктанабыт.

Турнир кэмигэр быыстапкабытын дьоннор син көрдүлэр. Ордук, Роман Дмитриев олимпийскай мэтээлин сэҥэрээллэр. Уонна быыстапка фонугар элбэхтэ хаартыскаҕа түстүлэр.

Түгэнинэн туһанан, Емельян Ярославскай аатынан республикатааҕы кыраайы үөрэтэр музей салалтатыгар уонна үлэһиттэригэр, турнир кэмигэр Роман Михайлович Дмитриев туһунан экспонаттары аҕалан быыстапка тэрийбиттэригэр улахан махтал!

Петр ПАВЛОВ.

Ааптар хаартыскаҕа түһэриилэрэ.  

Добавить комментарий

Ваш адрес email не будет опубликован. Обязательные поля помечены *