Мирнэй баһырхай бириистээх хапсаҕайын кыайыылаахтарынан кимнээх буоллулар?

ССРС, РФ, Саха АССР спордун маастара А.И. Никифоров кэриэһигэр хапсаҕайга АК АЛРОСА бирииһигэр 19 улуустан 272 бөҕөс (ол иһигэр 53 спорт маастара) кыттааччылаах Мирнэй куоракка бэһис төгүлүн республиканскай турнир ыытылынна. Түһүлгэни хапсаҕайга СӨ Федерациятын толорооччу дириэктэрэ, ХХ үйэ бастыҥ судьуйата үрдүк ааты ылбыт норуоттар икки ардыларынааҕы категориялаах судьуйа А.Е. Мостахов салайан ыытта. Күрэхтэһиини аатырбыт комментатор, суруналыыс А.В. Васильев-Көрдүгэн кэпсээн-ипсээн көрөөччүлэри улаханнык сэргэхситтэ.

Бастыыр иһин киирсиилэр ханна да буоларын курдук, тыҥааһыннаахтык, өрө күүрүүлээхтик аастылар. Уолаттарга 45 кг – Алгыс Лебедкин (Үөһээ Бүлүү), 50 кг – Тимур Андреев (Горнай), 55 кг – Сергей Николаев (Кэбээйи), 62кг – Софрон Осипов (Сунтаар), 70 кг – Никита Высоцкай уонна 70-тан үөһэ кг – Аян Прокопьев (иккиэн Үөһээ Бүлүүттэн) бастаатылар.

Эр дьоҥҥо 57 кг – Степан Бочо, 65 кг – Егор Иванов (иккиэн Үөһээ Бүлүүттэн), 75 кг – Игнат Андросов (Таатта), 85 кг – Игорь Софронеев (Нам), 95 кг – Николай Николаев (Бүлүү), 95-тэн үөһэ кг – Евгений Алексеев (Уус Алдан) кыайдылар.

Бэтэрээннэргэ 57 кг – Петр Соломонов, 65 кг – Илья Тимофеев (иккиэн – Хаҥаластан), 75 кг – Александр Птицын (Мэҥэ Хаҥалас), 85 кг – Клим Иванов (Бүлүү), 85-тэн үөһэ кг– Степан Гаврильев (Амма) олус хатыһыылаах, тыҥааһыннаах киирсиилэр түмүктэринэн чемпион үрдүк аатын ыллылар.

Түһүлгэ Аар Дарханын – абсолютнай чемпионун аатын уолаттарга 16 кыттааччыттанҮөһээ Бүлүүттэн Аян Прокопьев (30000 солк. сертификат), эр дьоҥҥо 75 диэри кг 45кыттааччыттанБүлүүттэн Дмитрий Ушницкай (400000 солк. сертификат) уонна ыарахан ыйааһыҥҥа 16кыттааччыттан Уус Алдантан Евгений Алексеев (400000 солк сертификат) ыллылар.

Түмүккэ «Хомуур хапсаҕай» күрэҕэр биэс улуус кыттыбытыттан, үөһээ бүлүүлэр,хамаанда састааба: У.Тимофеев,Ф.Данилов, Е.Иванов, А.Степанов уонна А.Егоров хамаанданан бастакы миэстэни ыланнар, 50000 солк. сертификатынан наҕарааданнылар.

Турнир түмүгүнэн, хапсаҕай уйатынан ааттаммыт – үөһээ бүлүүлэр 1 абсолютнай чемпион, ыйааһыннарыгар 5 кыһыл көмүс, 1 үрүҥ, 1 боруонса мэтээл хаһаайыннарынан буоллулар. Чемпион бочуоттаах аатын ыллылар: уолаттарга Алгыс Лебедкин, Аян Прокопьев (иккиэн М.А.Алексеев аатынан лицей-интернаттан) уонна Хоро орто оскуолатын үөрэнээччитэ Никита Высоцкай, эр дьоҥҥо Кырыкыйтан Степан Бочо уонна Дүллүкүттэн спорт маастара Егор Иванов. Санатар буоллахха, бу ситиһиитинэн С.Бочо СӨ спордун маастарын нуорматын толорон, баҕа санаата туолбутунан уонна бары чемпионнарга, призердарга итии-истиҥ эҕэрдэ!

Владимир БЫКАЛЫРОВ.

Добавить комментарий

Ваш адрес email не будет опубликован. Обязательные поля помечены *