Медведь турнирыттан үс мэтээл

Минскэй куоракка ыытылла турар үс төгүллээх олимпийскай чемпион Александр Медведь бирииһигэр көҥүл тустууга норуоттар икки ардыларынааҕы Грн-при турнир бастакы кыайыылаахтара билиннилэр. Эрдэ иһитиннэрбиппит курдук, бу түһүлгэҕэ саха тустууга кыһатын биэс иитиллээччитэ кыттыыны ылла. Кинилэртэн Владислав Андреев (57кг) иккис, Владимир Егоров (57 кг) уонна Ньургун Скрябин (65 кг) үһүс миэстэлэри ыллылар.

Санатан эттэххэ, Владислав Андреев бастаан Владимир Егоровы 4:3, онтон Михаил Иванову 7:4 ахсааннарынан кыайталаан, финалга тахсыбыта. Хомойуох иһин, быһаарыылаах хапсыһыыга кини Россия чемпионатын быйылгы призера Муслим Садулаевка (Россия) 2:6 ахсаанынан хотторон кэбистэ.

Оттон билигин Москваҕа олорор, эрчиллэр уопуттаах бөҕөспүт Михаил Иванов маҥнайгы көрсүһүүтүгэр Европа буруолуу сылдьар чемпиона Георгий Эдишерашвилины (Азербайджан) кытта киирсиигэ 1:1 ахсааҥҥа кыайыылааҕынан ааҕыллыбыта. Онон уолбут соһуччу үөрүүлээх кыайыыны ситиспитэ.

Иккис киирсиитигэр Владислав Андреевка да дьоһун утарсыыны оҥоро сылдьан, “кириэс” диэн албаска киирэн биэрэн, хотторон, эбиитин атаҕын эчэтэн доҕолоҥноон тахсыбыта. Итини мин быһа биэриини көрбүт киһи быһыытынан этэбин. Ол иһин да буолуо, турнир боруонса мэтээлин былдьаһыыга Македония чиэһин көмүскүүр Амма ыччата Владимир Егоровы утары туста тахсыбата. Егоров, сыыстарбат буоллахпына, норуоттар икки ардыларынааҕы Гран-при турнирга бу бастакы мэтээлэ буолуохтаах. Мантан ыла дьэ төлө баран, санаата күүһүрэн, бэйэтигэр эрэлэ улаатан ситиһиилээхтик киирсэригэр баҕарыаҕыҥ. Кини билигин СР үтүөлээх тренерэ Н.Н. Рожин салалтатынан дьарыктанар.

Биир эрэнэр бөҕөспүт – Ньургун Скрябин бу сырыыга улахан түһүлгэҕэ 65 киилэҕэ кытынна. Кини Россия чемпионатын, Ярыгин турнирын призера буола сылдьыбыт дагестанец А.Эмеевтыын киирсиитигэр, маҥнайгы түһүмэххэ 0:4 хотторон иһэн, иккискэ киирэн киһитин дэлби ыган, кимиилээхтик тустан сылатан, түмүккэ 8:4 ахсаанынан үчүгэй кыайыыны ситиспитэ.

Оттон финалга тахсар иһин киирсиигэ аан дойду, Европа чемпионаттарын призера Василь Шуптары (Украина) кытта көрүстэ. Итиэннэ бүтэһик мүнүүтэҕэ диэри баһыйан иһэн, атахтаан баран утары хамсаныыга киирэн биэрэн, 6:8 ахсаанынан кыл-мүччү кыһыылаахтык хотторон кэбистэ. Ити кэнниттэн үһүс бириистээх миэстэни былдьаһыыга Ньургун, эмиэ Белоруссия чиэһин көмүскүүр осетин Георгий Колиевы 3:0 ахсаанынан хотон, пьедестал үһүс үктэлигэр таҕыста.

Манна даҕатан эттэххэ, бу турнир Белоруссия бөҕөстөрүгэр – аан дойду чемпионатыгар сүүмэрдиир сыаллаах-соруктаах этэ. Онуоха биһиги уолаттарбыт Владислав Андреев уонна Ньургун Скрябин бэйэлэрин сүрүн утарсааччыларыттан үчүгэй көрдөрүүнү ситиһэн, алтынньыга Венгрияҕа ыытыллар аан дойду чемпионатыгар кыттар быраабы ыллылар.

Өссө биир бөҕөспүт – былырыыҥҥы маннык күрэхтэһии 57 киилэҕэ кыайыылааҕа Андрей Бекренев сэрэбиэй быһыытынан 61 кг ыйааһыҥҥа маҥнай А.Лачиновтыын көрсүөхтээҕэ. Ол эрээри, кини атаҕар эчэйиитин сатаан оһорумматаҕын быһыытынан, тренердэр Бекреневы күрэхтэһиигэ киллэрбэтилэр.

Турнир бастакы түмүгэ:

57 кг: 1. Муслим Садулаев (Россия), 2. Владислав Андреев (Белоруссия), 3. Владимир Егоров (Македония) уонна Хасанхусейн Бадрудинов (Россия).

65 кг: 1. Василий Шуптар (Украина), 2. Хаджи Алиев (Азербайджан), 3. Ньургун Скрябин (Белоруссия) уонна Ислам Дудаев (Россия).

74 кг: 1. Азамат Нуриков (Белоруссия), 2. Тимур Бижоев (Россия), 3. Исайя Mартинес (АХШ) уонна Aлипаша Умарпашаев (Болгария),

86 кг: 1. Гаджи Раджабов (Белоруссия), 2. Мурад Сулейманов (Азербайджан), 3. Фатих Эрдин (Tурция) уонна Борис Mакоев (Словакия).

97 кг: 1. Александр Гуштын (Белоруссия), 2. Фатих Яшарли (Tурция), 3. Мурази Мчедлидзе (Украина) уонна Tи Райан Уолц (АХШ).

Добавить комментарий

Ваш адрес email не будет опубликован. Обязательные поля помечены *