Медведь турнира: иккис күн сэрэбиэйин билиһиннэрии

Минскэйгэ, үс төгүллээх олимпийскай чемпион Александр Медведь бирииһигэр көҥүл тустууга үгэскэ кубулуйбут норуоттар икки ардыларынааҕы Гран-при турнир иккис күнүгэр 61, 70, 79, 92 уонна 125 кг ыйааһыннарга сэрэбиэй оҥоһулунна. Быраабыла быһыытынан аны бөҕөстөр ыйааһыннаныылара эрэ хаалла.

Кылгастык сэрэбиэйи билиһиннэрдэххэ маннык:

61 кг – уон кыттааччы баар. Былырыыҥҥы маннык күрэхтэһии 57 киилэҕэ кыайыылааҕа, Беларусь хамаандатыттан тустар биир дойдулаахпыт Андрей Бекренев бастакы эргииргэ бэйэтин хамаандатын киһитэ Асадулла Лачиновы кытта тустар буолбут. Онно ким кыайбыт, американец Колон — китаец Пиньпинь пааратын кыайыылааҕар тахсыаҕа. Өссө бу бөлөххө американец Мегалудис уонна украинец Иван Билейчук бааллар.

Оттон үөһэ бөлөххө Абакаров, Абдурашидов (Россия), Топал (Турция), Жолдошбеков (Кыргызстан) бааллар.

Билэргит курдук, Андрей Бекренев ааспыт нэдиэлэҕэ Коркин мемориалыгар иккис эргииргэ монгол Тумэнбилег Тувшинтулгалыын тустуутугар кыра эчэйии ылан хотторбута. Салгыы, “уоскутар” бөлөххө А.Захаровы утары туста тахсыбатаҕа. Онон, ол эчэйиитэ хайдах эбитэ буолла? Ханныгын да иһин, нэдиэлэ аайы күрэхтэһии, уһун сылаалаах айан – сыанан аҕаабата буолуо ээ.

Атын ыйааһыннары билиһиннэрдэххэ, 70 киилэҕэ украинец Андрей Квятковскайы, турок Мустафа Каяны, россиянин Давид Баевы чорботуохха сөп.

79 киилэҕэ Али Шабанов (Беларусь), Гаджи Набиев (Россия), Алекс Деринжер (АХШ) курдук биллэр бөҕөстөр күөн көрсүөхтэрэ.

92 кг ыйааһыҥҥа финалга олимпийскай чемпион Шариф Шарифов (Азербайджан) уонна Иван Янковскай (Беларусь) көрсүөхтэрин сөп дии саныыбын. Кинилэргэ Омаргаджи Магомедов (Беларусь), Любомир Сагалюк (Украина), Алихан Жабраилов (Россия), Сердар Беке (Турция) утарсыыны оҥоруохтара.

Ыарахан ыйааһыҥҥа (125 кг) быйылгы сылга украинец Александр Хоцяновскай үчүгэй көрдөрүүлээх. Киевтээҕи турнирга аан дойду чемпиона, Олимпиада призера Гено Петриашвилины кыайбытын санатар тоҕоостоох. Ол эрээри, иккис эргииргэ кини Россия чемпионатын призера Саид Гамидовтыын тустуута интэриэһинэй буолуоҕа. Баай уопут кыайар дуу, эрчимнээх эдэр саас хотор дуу? Дьэ, көрүөхпүт.

Бу ыйааһыҥҥа аллараа бөлөххө аан дойду уонна Европа чемпионаттарын призера Джамалудин Магомедов (Азербайджан), Ибрагим Саидов (Беларусь), Данила Картавый (Украина) курдук күүстээх бөҕөстөр мустубуттар.

Добавить комментарий

Ваш адрес email не будет опубликован. Обязательные поля помечены *