Матрена Ноговицына – 100 харахтаах дуобакка аан дойду чемпиона!

Эстония киин куоратыгар Таллиҥҥа, сүүс харахтаах дуобакка дьахталларга уонна эр дьоҥҥо аан дойдуга бастыыр иһин чемпионакка, биһиги биир дойдулаахпыт, международнай гроссмейстер Матрена Ноговицына, чемпионат бүтэрэ биир туур иннинэ, өрөгөйдөөх кыайыыны ситистэ!

Айан суола Аан дойду муҥутуур чыпчаалыгар тиэртэ! Матрена Степановна кыра оҕо сааһыттан тулуурдаах, дьулуурдаах, бэйэтин ылыммыт сыалын-соругун дьаныһан туран ситиһэр, олох киэҥ өйдөбүлүн ыраас санаатынан кэхтибэккэ иннин диэки айанныыра олус кэрэхсэтэр.

Оскуолаҕа үөрэнэ сылдьан “Азия оҕолоро” оонньууларга, сүүмэрдэммит хамаандаҕа биир хотторууттан сылтаан сатаан киирбэтэҕэ, онтон салгыы дьаныардаахтык эрчиллэн международнай гроссмейстер буолары ситиспитэ.

2019 сыллаахха Аан дойду чемпионатыгар итинник түгэн эмиэ хатыламмыта. Ол кэнниттэн икки сыл ааста уонна бу кэм иһигэр олус элбэх күрэхтэһиилэри, чемпионаттары кыайан, Аан дойду чемпионатыгар оонньуурга кыттар быраабы ылан, сахабыт норуотун аан дойдуга ааттатарга дьоһун улахан кыайыыны ситистэ. Үөрэбит, киэҥ туттабыт, өрөгөйдөөх Уруй, Айхал буолуохтун!

Санатан эттэххэ, Аан дойдуга бастыыр иһин чемпионакка эр дьоннор ортолоругар састаап 40 дуобатчыттан, 18-һа международнай гроссмейстердар, дьахталларга 16 оонньооччуттан – 9-һа международнай гроссмейстердар кыттыыны ыллылар.

Бу чемпионакка эр дьоннорго ыҥырыы быһыытынан 40 дуобатчыты оонньоттулар. Россия дуобатчыттарыттан Муродулло Амриллоев, Алексей Чижов, Александр Георгиев оонньооботулар, ол иһин Саха сириттэн саамай үрдүк рейтиннээх Николай Гермогеновы ыыппыппыт, биһиги үөрүүбүтүгэр тэрийээччилэр Николай Николаевиһы күрэхтэһиигэ киллэрбиттэрэ буолар.

Эр дьоннор түөрт группаҕа арахсаннар оонньоотулар, хас группа аайыттан үс иһигэр киирбиттэр, финальнай чааска оонньоотулар. Бу чемпионакка эр дьоннор 18 туур оонньууллар. 15 туур бүппүтүн кэннэ, Гермогенов 6-8 миэстэҕэ үктээн испитэ. Онтон 16-17 туурдарга сатамматыбыт, иккитэ субуруччу хотторон, онус миэстэҕэ сыҕарыйан биэрдибит. Бүгүн тэҥнэһиигэ оонньоотоҕуна, онус миэстэҕэ хаалар. Бу биһиги сүүс харахтаах дуобаппыт оонньуутугар эр дьоннор ортолоругар ситиһии буолар.

Гаврил ВИНОКУРОВ, дуобат оонньуутугар международнай арбитр, Бүтүн Россиятааҕы категориялаах судьуйа.  

 

Добавить комментарий

Ваш адрес email не будет опубликован. Обязательные поля помечены *