Матрена Ноговицына уонна Николай Гермогенов – чемпионнар!

Олунньу 20-24 күннэригэр Дьокуускай куоракка Республикатааҕы Дуобат уонна саахымат киинигэр – нуучча дуобатыгар Саха Республикатын чемпионата ыытыллан түмүктэннэ.

Чемпионакка, билиҥҥи кэмҥэ баар улахан кылаастаах дуобатчыттарбыт бары кыттыыны ыллылар. Ол курдук, эр дьоҥҥо барыта 42 бастыҥ спортсмен кытынна. Кинилэр ортолоругар биэс международнай гроссмейстер баара, күрэхтэһии таһымын лаппа үрдэттэ. Түмүккэ чемпион бочуоттаах аатын 14 очукуолаах международнай гроссмейстер Николай Гермогенов ылла. Киниттэн биир очукуонан хаалан, иккис миэстэҕэ спорт маастарыгар кандидат Анатолий Протодьяконов таҕыста.

Оонньуулар сүрдээх хатыһыылаахтык, тыҥааһыннаахтык барбыттарын туоһутунан, сэттэ дуобатчыт 12-лии тэҥ очукуону хомуйбуттара буолла. Онуоха судьуйалар быһаарыыларынан уонна чемпионатын балаһыанньатын, быраабылатын быһыытынан, хаачыстыбанан аттаран туруорууга туһааннааҕынан миэстэлэри үллэстии маннык буолла: международнай гроссмейстер Гаврил Колесов үһүс бириистээх миэстэ, салгыы миэстэлэри эмиэ международнай гроссмейстердар Иван Токусаров, Николай Гуляев, спорт маастара Айсен Андреев, международнай гроссмейстер Николай Стручков, спорт маастардара Иван Щукин уонна Руслан Колодезников.

Дьахталлар бөлөхтөрүгэр 30 дуобатчыт оонньоото. Онуоха түмүккэ международнай гроссмейстер Матрена Ноговицына эрэллээхтик бастаата. Иккис миэстэҕэ спорт маастара Сайыына Попова таҕыста. Оттон үһүс бириистээх миэстэҕэ маастарга кандидат Тунаара Федорова тигистэ. Спорт маастара Ньургуйаана Азарова төрдүс буолла.

Балаһыанньа быһыытынан, чемпионат кэмигэр блиц-турнир ыытыллыбытыгар кыайыылаахтарынан – Гаврил Колесов уонна Сайыына Попова буоллулар.

Сахаларын сирин араас таһымнаах күрэхтэһиилэргэ ситиһиилээхтик көмүскүүр дуобатчыттарбыт бэйэлэрин төрөөбүт республикаларын иһигэр оонньуулара хаһан баҕарар хатыһыылаахтык, илин-кэлин түсүһүүлээхтик ыытыллар. Бу да сырыыга оннук буолла. Аны мантан ыла дуобатчыттарбытын улахан таһымнаах күрэхтэһиилэр күүтэллэр. Онуоха кинилэргэ – Саха спордун былааҕын куруук буоларыныы, күөрэччи көтөҕөллөрүгэр баҕарыаҕыҥ!

“Дьулурҕан”.

Добавить комментарий

Ваш адрес email не будет опубликован. Обязательные поля помечены *