Матрена Ноговицына – аан дойду пьедесталын үрдүкү үктэлигэр

Таллинн (Эстония) 100 харахтаах дуобакка дьахталларга уонна эр дьоҥҥо аан дойду үрдүнэн бастыыр 2021 сыллааҕы чемпионат түмүктэннэ. Быйылгы чемпионат Саха сирин дуобаты таптааччыларыгар дьоһун ситиһиилээх буолла. Ол курдук, 2020 сыл түмүгүнэн Саха Республикатын бастыҥ спортсмена, международнай гроссмейстер Матрена Ноговицына бастакы миэстэҕэ тахсан үөрүү өрөгөйүн биллэ.

Чемпионат уопсай түмүгүн кылгастык билиһиннэрэр буоллахха, дьахталларга 16 бастыҥ оонньооччу финалга киирэн ким бастыҥын быһаарыстылар. Онуоха биһиги спортсмеммыт Матрена Ноговицына 15 утарсааччытын кытта сирэй көрсөн – 9-та кыайда, 6-та тэҥнэстэ. Итинэн кини барыта 24 очукуону хомуйан олус күүстээх састаапка эрэллээхтик бастаата.

Иккис миэстэҕэ аан дойду чемпиона, эмиэ межуднароднай гроссмейстер Тамара Тансыккужина (Башкортостан, Россия) 22 очукуолаах таҕыста. Үһүс бириистээх миэстэни Виктория Мотричко (Украина) ылла. Кини очукуота эмиэ – 22. Аан дойду урукку чемпиона Наталья Садовска (Польша) 21 очукуолаах төрдүс буолла.

Оттон эр дьоҥҥо Россияттан международнай гроссмейстер Александр Шварцман бастаата. Маннык улахан таһымнаах күрэхтэһиигэ күүһүн холоспут биһиги Николай Гермогеновпыт онус миэстэлэннэ.

Түгэнинэн туһанан, аан дойду чемпиона Матрена Ноговицынаны уонна кини тренерэ Николай Николаевич Кычкины, Саха сирин дуобакка федерациятын, спорка салалтатын, бары спорду, чуолаан дуобат оонньуутун таптааччылары, сэҥээрээччилэри истиҥник эҕэрдэлиибит!

Бу, Матрена Ноговицына ситиһиитэ – кырдьык даҕаны дьоһун кыайыы! Сахаларга улахан үөрүү!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *