Мас-рестлинг: Чемпионат бастакы күнүн түмүгэ

Дьокуускай. “Триумф” Спорка бэлэмнэнии киинигэр Мас-рестлиҥҥэ аан дойду III чемпионатын бастакы күнүгэр дьахталларга – 55, 75, 85, оттон эр дьоҥҥо – 60, 90, 125 кг ыйааһыннаахтар күрэхтэстилэр.

Быраабыла быһыытынан, эргииртэн эргиир аайы кыайыылаахтар биир бөлөххө киирэн чемпион аатын былдьастылар, оттон хотторуулаахтар иккис бөлөххө киирэн, бэйэ-бэйэлэрин кытта үһүс миэстэ иһин кииристилэр.

Чемпионаты үөрүүлээхтик аһыыга СР Бырабыыталыстыбатын бэрэссэдээтэлин эбээһинэһин толорооччу Владимир Солодов, РФ Спорка миниистирин солбуйааччы Марина Томилова, Мас-рестлинг аан дойдутааҕы федерациятын президенэ Александр Акимов кыттыыны ыллылар.

В.Солодов – Бразилия мас-рестлиҥҥэ федерациятын президенэ Вилмар Оливейраҕа уонна Кыргызстан мас-рестлиҥҥэ федерациятын президенэ Искендер Адымбековка государственнай наҕараадалары – Саха Республикатын бочуоттаах бэлиэлэрин туттарда.

Оттон Мэҥэ Хаҥалстан Николай Бояровка, Уус Алдантан Иван Готовцевка – “Саха Республикатын үтүөлээх тренердэрэ” ааттар иҥэрилиннилэр. Сунтаартан Анатолий Петров – СР физическэй култуураҕа уонна спорка үтүөлээх үлэһитэ буолла.

М.Томилова бэйэтин эҕэрдэтин кэнниттэн Иван Сивцевкэ, Петр Баттаховка, Дмитрий Шариҥҥа уонна Афанасий Саввиҥҥа – Бүтүн Россиятааҕы категориялаах спортивнай судьуйа анал бэлиэлэрин туттартаата.

А.Акимов мас-рестлиҥҥэ үтүөлэрин иһин Индия мас-рестлиҥҥэ федерациятын президенэ Омармухтар Тамболига уонна Азербайджан мас-рестлиҥҥэ федерациятын президенэ Самир Абдуллаевка өйдөбүнньүк бэлэхтэри туттарда.

Чемпионат бастакы күнүн түмүгэ:

55 кг: 1. Наталья Черноградская (Россия, Саха сирэ), 2. Шафаг Маммадова (Азербайджан), 3. Дилбара Имангаева (Кыргызстан) уонна Регина Муляшева (Узбекистан).

75 кг: 1. Саина Седалищева (Россия, Саха сирэ), 2. Анастасия Ивченко (Украина), 3. Мамми Кемпайнен (Финляндия) уонна Ирина Заславска (Украина).

85 кг: 1. Яна Васкова (Словакия), 2. Мари Кейн (АХШ), 3. Ванесса Давид (Венгрия) уонна Олеся Гуреева (Узбекистан).

60 кг: 1. Евгений Удин (Россия, Саха сирэ), 2. Азамат Асанов (Кыргызстан), 3. Медет Есбулаев (Казахстан) уонна Ислом Абдумаликов (Узбекистан).

90 кг: 1. Павел Черноградскай (Россия, Саха сирэ), 2. Азат Таштанбеков (Кыргызстан), 3. Эмиль Мусуралиев (Кыргызстан) уонна Ильяс Кодыров (Узбекистан).

125 кг: 1. Иван Галкин (Россия), 2. Патрик Навара (Чехия), 3. Насимжон Раджабов (Узбекистан) уонна Александр Краснов (Казахстан).

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *