Манчаары-2021: Эһиги санааҕытыгар ханнык хамаандалар кыайыахтарай?

Бэрдьигэстээххэ ыытылла турар спорт төрүт көрүҥнэригэр «Манчаары оонньуулара» спартакиадаҕа улуустар уонна үрдүк үөрэх кыһаларын 40 хамаандатын 1890 спортсмена күөн көрсө, илин-кэлин түсүһэ сылдьар.

Кинилэр барыта 174 комплект мэтээл иһин спорт 11 көрүҥэр: мас-рестлиҥҥэ, хапсаҕайга, сахалыы ыстаныыларга, сахалыы многоборьеҕа, хотугу многоборьеҕа, гиирэ спордугар, сахалыы оххо, пневматическай бинтиэпкэнэн ытыыга, чэпчэки атлетикаҕа уонна ат сүүрдүүтүгэр ким бастыҥын быһаарсаллар.

Билиҥҥи туругунан (16:30 чааска) сахалыы оҕунан ытыыга, пневматическай саанан ытыыга, мас-рестлиҥҥэ күрэхтэһиилэр түмүктэннилэр.

Балаһыанньаҕа олоҕуран хамаандалар түөрт бөлөххө хайдыһан күрэхтэһэллэр:

1-кы бөлөх – Дьокуускай, Хаҥалас, Бүлүү, Ньурба, ХИФУ, Нерюнгри, Мирнэй, Алдан, Ленскэй, Мэҥэ Хаҥалас.

2-с бөлөх – Чурапчы, Амма, Нам, Уус Алдан, Сунтаар, Таатта, Үөһээ Бүлүү, Өлүөхүмэ, Студеннар спортивнай союзтара, АГАТУ.

3-с бөлөх – Кэбээйи, Томпо, Горнай, Өймөкөөн, Уус Маайа, Үөһээ Дьааҥы, Орто Халыма, Жатай.

4-с бөлөх – Абый, Аллайыаха, Анаабыр, Булуҥ, Үөһээ Халыма, Эбээн Бытантай, Өлөөн, Муома, Эдьигээн, Усуйаана, Аллараа Халыма.

Санатан эттэххэ, 2017 сыллаахха Үөһээ Бүлүүгэ ыытыллыбыт ХХ спартакиадаҕа бэйэлэрин бөлөхтөрүгэр кыайыылаах хамаандаларынан буолбуттара: Дьокуускай, Үөһээ Бүлүү, Кэбээйи, Өлөөн. Бу сырыыга дьэ хайдах буолар?

Бэҕэһээ бастакы финаллар кэннилэриттэн Дьокуускай, Үөһээ Бүлүү, Үөһээ Дьааҥы, Кэбээйи, Мэҥэ Хаҥалас, Уус Алдан, Горнай, Сунтаар хамаандалара ордук элбэх мэтээли ыллылар.

«Дьулурҕан». 

Добавить комментарий

Ваш адрес email не будет опубликован. Обязательные поля помечены *