Манчаары-2021: Сүүмэрдээһини хайдах оҥордугут?

Дьэ, өр күүппүт оонньууларбыт саҕаланаллара чугаһаатылар. Манан сибээстээн «Дьулурҕан» хаһыат, Манчаары оонньууларын иннинэ хамаандалар салайааччыларыттан аҕыйах ыйытыыга хоруйдуулларыгар көрдөстө.

Кинилэргэ барыларыгар “Сүүмэрдээһини хайдах оҥордугут?”, “Спартакиада балаһыанньатыгар туох этиилээххин?”, “Бэлэмнэниигэ туох ыарахаттары көрүстүгүт?” уонна “Хаһыс миэстэҕэ суоттанаҕыт?” диэн ыйытыы бэриллибитэ.

Гаврил Евсеев (Бүлүү):

-Сүүмэрдээһини республикаҕа ыытыллыбыт чемпионаттар, турнирдар уонна улууспутугар буолбут күрэхтэһиилэр түмүктэринэн көрөн ыыттыбыт. Биллэн турар, кэккэ ыарахаттардаах этэ. Сорох көрүҥнэргэ элбэх күрэхтэһиилэр буолбатылар. Ону тренердэр сөпкө көрөннөр, биирдии эрэ киһини буолбакка, иккилии-үстүү кандидаты туруораннар, көрөн-истэн бастыҥнары таллылар, хамаанда састаабын быһаардылар.

Бүлүүлэр, биһиги балаһыанньа быһыытынан спартакиадаҕа толору састаабынан кыттабыт. Алта уон спортсменынан.

Бэлэмнэниигэ ыарахаттары эттэххэ, ИФА, ПЦР бириэмэтигэр сөпкө биэриэххэ, ылыахха наада. Сороҕор эрдэ, ардыгар хойут буолан хаалар. Ол сөп түбэспэккэ, спортсменнар эрэйи көрдүлэр. Ордук тустууктарга элбэх күрэхтэһии буолла. Онон сотору-сотору ИФА-ҕа харчы төлөөн, кытыннылар. Итиэннэ, спортсменнар бары долгуйаллар. Анализ туттарарга туһугар эмиэ ыарахаттардаах эбит. Өссө ол аналиһын хайдах, тугу көрдөрөрө биллибэт. Саамай ыарахаммыт ити. Уонна куруук буоларын курдук, үп-харчы өртүгэр кэлиигэ-барыыга ыарахаттар үөскүү сырыттылар. Үбү-харчыны этап быһыытынан, кыралаан көрөллөр. Ол гынан, спартакиадаҕа кыттарга сөптөөх көмө баар. Төһө да ыарахан балаһыанньа үөскээтэр, үп-харчы кырыымчык буоллар – сөптөөх эрчиллиилэри, күрэхтэһиилэри ыыттыбыт дии саныыбыт.

Биһиги бастакы бөлөххө баарбыт. Дьокуускай, Мэҥэ Хаҥалас, Хаҥалас хамаандалара күүстээхтэр. Өссө Ньурба баар. Мирнэй, Ленскэй, ХИФУ, Нерюнгри, Алдан… Оттон биһиги кыах баарынан кыттан, уопсай түмүккэ үс бириистээх миэстэҕэ киирбит киһи диэн санаалаахпыт.

Константин Давыдов (Уус Алдан):

-Улуус хамаандатын талыы – инники ыытыллыбыт республика чемпионаттарын, республикатааҕы турнирдарын түмүктэринэн оҥоһулунна. Бары билэргит курдук, биллэр биричиинэнэн, спартакиада көрүҥнэригэр биэс уон бырыһыан аччатыылаах буолар буолла. Холобур, уон алта киһи оннугар – аҕыс киһи кыттыахтаах. Мас трдыһыытыгар эмиэ аҥаара эрэ. Онон биһиги ону талыыга сүрүннээн ыарахаттары көрүстүбүт. Тоҕо диэтэххэ, элбэх тэҥ спортсменнар бааллар. Кинилэртэн биир киһини талыы ыарахаттардаах. Сүүмэрдээһин барыта этэҥҥэ ааста. Билигин алта уон спортсмен Горнайга бараары бэлэмнэнэ сылдьар.

Билиҥҥи бу маннык ыарыы турар кэмигэр спартакиада балаһыанньатыгар мин улахан этиим суох. Куһаҕан да диэбэппин, үчүгэй даҕаны диэбэппин. Тэрийээччилэр баар балаһыанньаҕа олоҕуран, күрэхтэһиини төһө кыалларынан ситиһиилээхтик ыытарга дьулуһалларын өйдүүбүт. Биһиги быйыл үс бастыҥ хамаанда иһигэр киирбит киһи диэн бэлэмнэнэн, оҥостон баран эрэбит.

Константин Захаров (Мэҥэ Хаҥалас):

-Манчаарыга биһиги уопсайа 60 күрэхтэһээччинэн кыттабыт. Баар балаһыанньаҕа олоҕуран үлэлии сылдьабыт, онон улахан этиибит суох.

Хаҥсык ыарыынан сибээстээн, бэлэмнэниигэ ыарахаттары көрүстүбүт. Ол курдук, маассабай түмсүү, эрчийэр-үөрэтэр тэрээһин кыаллыбата, спортсменнар бэйэлэрэ тус дьарыктаннылар.

Күрэхтэһиилэр буолбатахтарынан сибээстээн, хамаандалар бары даҕаны билиҥҥи туруктара биллибэт дии саныыбын. Онон төһө кыалларынан, Горнайга ситиһиилээхтик кыттарга туруулаһабыт. Спортсменнарбыт бары тэҥнэр, кими эрэ чорботон этэр кыаҕым суох.

Андрей Сидоров (Таатта):

-Улуус хамаандатын састаабын – инники күрэхтэһиилэр түмүктэринэн талан оҥордубут. Онно бастыҥтан бастыҥнар киирдилэр дии саныыбын. Биһиги кыттар бөлөхпүтүгэр хааччах быһыытынан хамаанда састааба алта уон киһиттэн турар буолуохтаах. Онно салайааччылар, тренердэр, бэрэстэбиитэллэр эбиллэн, Таатта делегацията сэттэ уон киһилээх буолуоҕа.

Пандемиянан сибээстээн спартакиада балаһыанньатыгар уларыйыылар, хааччахтааһыннар киирдилэр. Бэлэмнэниигэ ыарахаттарбыт диэн, хамаанда чилиэттэрэ сүрүннээн бэйэлэрэ тус дьарыктаннылар. Тоҕо диэтэххэ, билиҥҥи кэмҥэ күргүөмүнэн мустар бобуулаах. Биһиги эрэ буолбатах, бары улуустар бары итинник ыарахаттары көрүстэхтэрэ буолуо.

Быйылгы Манчаарыга ханнык хамаандалар кыайалларын, миэстэлэһэллэрин эрдэттэн ким даҕаны билбэтэ буолуо. Саамай интэриэһинэйэ онно сытар. Урут, оонньууларга анаан путевкалар оонньонор эрдэхтэринэ, кырдьык, кимнээх кыайыахтарын, миэстэлэһиэхтэрин эрдэттэн билиэххэ, таайыахха сөп этэ. Оттон билигин хамаандалар ханнык састаабынан кэлэллэрэ биллибэт. Ким ханнык таһымҥа сылдьара биллибэт, бары таайтарыы. Онон Горнайга сытыы тыҥааһыннаах киирсиилэр буолуохтара дии саныыбын.

Петр ПАВЛОВ.          

Добавить комментарий

Ваш адрес email не будет опубликован. Обязательные поля помечены *