Манчаары-2021: Бүтүн Россиятааҕы научнай-практическай конференция

От ыйын 6-7 күннэригэр, Горнайга ыытыллар спорт национальнай көрүҥнэригэр «Манчаары оонньуулара» спартакиадатын чэрчитинэн Бүтүн Россиятааҕы научнайпрактическай конференция тэриллэр.

Ол курдук, алтыс чыыһылаҕа Арктическай государственнай агротехнологическай университет учуонай сэбиэтин саалатыгар – Физическэй культура уонна спорт эйгэтин специалистарын бэлэмнээһин туһунан «төгүрүк остуол» тэриллиэ. Тэрээһини П.Ф. Лестгаф аатынан университет доцена, педагогическай наука кандидата Марина Щенникова салайан ыытыа.

Ити курдук, оптуорунньукка Саха Республикатын Правительствотын 2 №-дээх дьиэтин актовай саалатыгар физическэй культураны уонна спорду сайыннарыы туһунан «төгүрүк остуол» буолуо. Төгүрүк остуолларга былаан быһыытынан туһааннаах тиэмэҕэ учуонайдар дакылааттарынан кыттыахтара уонна түмүктээһиннэри оҥоруохтара.

Онтон от ыйын 7 күнүгэр Бэрдьигэстээххэ, Семен уонна Софрон Даниловтар ааттарынан Духуобунас киинигэр – Саха сиригэр спорт национальнай көрүҥнэрин уонна норуот оонньууларын сайыннарыыга туһаайыллыбыт «төгүрүк остуолу» Ил Түмэн депутата, мас-рестлинг Бүтүн Россиятааҕы федерациятын президенэ, педагогическай наука доктора, профессор Михаил Гуляев, тэрээһин пленарнай чааһын «Сахаада-спорт» ассоциация президенэ, юридическай наука доктора, профессор Александр Ким-Кимэн салайан ыытыахтара.

Конференция быһа биэриитигэр Саха Республикатын Аҕа баһылыга Айсен Николаев, Россия спорка миниистирэ Олег Матыцин, Россия Олимпийскай комитетын президенэ Станислав Поздняков, Горнай улууһун баһылыга Никита Андреев, Россия национальнай уонна Олимпиадаҕа киллэриллибэтэх көрүҥнэригэр комитетын президенэ Роман Илиев кыттыыны ылаллара күүтүллэр.

Үөһээ ахтыллыбыт «төгүрүк остуолларга» Чурапчытааҕы физическэй культура уонна спорт государтсвеннай институтун ректора, педагогическай наука кандидата профессор Иннокентий Готовцев, ХИФУ профессора, педагогическай наука доктора Илья Черкашин, Б.Сайтиев аатынан Красноярскайдааҕы спортивнай оскуола дириэктэрэ Виктор Райков, ХИФУ кафедратын доцена, педагогическай наука кандидата Александр Захаров, мас-рестлиҥҥэ аан дойду икки төгүллээх чемпиона Виктор Колибабчук уо.д.а., итиэннэ Белоруссияттан, АХШ-тан, Москваттан, Санкт-Петербургтан, Смоленскайтан, Сургуттан, Сыктывкартан, Кемеровоттан, Тюменьтэн учуонайдар дакылаатынан кыттыахтара.

Бу тэрээһиннэр Zoom конференцияҕа быһа тэриллэн, элбэх киһини хабыахтара.

«Дьулурҕан».          

Добавить комментарий

Ваш адрес email не будет опубликован. Обязательные поля помечены *