Манчаары оонньууларыгар этно-эстафетаҕа 1 мөл. солк. оонньонуо

2017 сыллаахха XXI Манчаары оонньуулара Горнайга ыытыллара быһаарыллыбытын кэннэ, улууспутугар тэрээһин үлэтэ киэҥ хабааннаахтык саҕаламмыта. Түөрт сылга биирдэ ыытыллар спорт национальнай көрүҥнэригэр илин-кэлин түсүһүү, Сахабыт сирин биир улахан күрэхтэһиитэ буолар.

Өбүгэ саҕаттан илдьэ кэлбит оонньууларбыт спорт көрүҥнэрин быһыытынан хас биирдии киһиэхэ дириҥник киирэн, бэйэбитин омук быһыытынан үрдүктүк тутарбытыгар төһүү күүс буолар. Күрэхтэһии пьедесталыгар тахсыы, ханнык баҕарар спортсмеҥҥа олоҕун умнуллубат түгэнэ.

Кэнники сылларга Манчаары оонньууларын таһыма биллэ үрдээтэ. Ыытыллар сиригэр СӨ Бырабыыталыстыбата үп-харчы көрөн, баараҕай тутуулары ыытар буолбута үөрүүлээх. Ол барыта нэһилиэнньэ туһугар хаалан, дьон-сэргэ олоҕо-дьаһаҕа, доруобуйата тупсарыгар туһаайыллар.

Манчаары оонньууларын ыытар улуус хаһаайын быһыытынан баһыйар өттө элбэх диэххэ сөп. Олортон биирдэстэринэн, бэйэтин көрүүтүгэр спорт биир көрүҥүн киллэрэр бырааба буолар.

2021 с. горнайдар уопсай сүбэлэһии кэнниттэн 17 түһүмэхтээх “Тоҕус туруйа уолаттар, сэттэ кыталык кыргыттар” диэн эстафетабытын, спортивнай бырагыраамаҕа эбии көрүҥ быһыытынан киллэрдибит. Санатан эттэххэ, бу быһый атахтаах сүүрүктэр сырсыылара 2001 с. саҕаламмыта. Ити бэрт үчүгэй аатынан 2010 с. “Олоҥхо ыһыаҕар” үрдүк таһымҥа ыытыллыбыта. Онно хас да улуус кыттыылаах, бэрт тыҥааһыннаах сүүрүүлэри олохтоохтор, ыалдьыттар да бэркэ сэҥээрэ ылыммыттара. Ол кэннэ, улуус нэһилиэктэрэ үбүлүөйдээх сылларга астына кирсэллэрэ үтүө үгэскэ кубулуйда. Улуус салалтата, үтүө үлэлээх, ытыктыыр дьоннорбут, спонсордар өйөбүллэринэн эстафетаҕа массыыналар кытары оонньоммуттара.

Быйылгы үбүлүөйдээх сылга күрэхтэһии таһымын үрдэтэн, биир дойдулаахпыт Вера Федорова бырайыак бэлэмнээн, РФ Президенин Гранын ылар чиэскэ тиксибитэ, туспа улахан ситиһии буолар диэххэ наада.

– Манчаары оонньуулара хайа баҕарар спортсмеҥҥа күүтүүлээх, бэйэтин кыаҕын тургутан көрөр күрэхтэһиитэ буолара саарбаҕа суох. Быйыл улуус тэриллибитэ 90 сылын көрсө, хаһаайыттар быһыытынан “Тоҕус туруйа уолаттар, сэттэ кыталык кыргыттар” этно-эстафетаны үрдүк таһымҥа таһаарар, дьоҥҥо-сэргэҕэ спорт национальнай көрүҥнэрин көҕүлүүр, төрөөбүт дойдуга бэриниилээх буолар санааны көтөҕөр туһуттан тэрийдибит.

Этно-эстафетаҕа бэс ыйын 25 күнүгэр диэри сайаапкаларын бастакы биэрбит 16 хамаанда кыттыаҕа. Спортсменнар бары Манчаары оонньууларын көрүҥнэригэр күрэхтэһэр буолуохтаахтар. Ону таһынан, бастакы түһүмэххэ улуус баһылыктара, эбэтэр солбуйааччылара, үөрэх кыһатын салайааччылара сүүрүөхтэрэ. Хамаанда 50 тыһ. солк. усунуос быһыытынан төлүүр. Кыайыылаахха 500, иккис миэстэҕэ 300, үһүскэ 200 тыһ солк туттарыллыа. Күрэхтэһии Бэрдьигэстээххэ ат сүүрдэр сиргэ ыытыллыаҕа. Билиҥҥитэ номнуо аҕыс хамаанда бэйэтин кыаҕын холонор баҕалааҕын биллэрдэ.

Биһиги бырайыакпытын улуус салалтата, “Манчаары Баһылай аатынан спорт национальнай көрүҥнэрин киинэ”, Спорт национальнай көрүҥнэрин сайыннарарга көмөлөһөр пуонда, Дьокуускайга олорор биир дойдулаахтарбыт өйөөннөр улахан көмөнү оҥордулар. Онон кинилэргэ махталбын тириэрдэбин, – диэн бырайыак ааптара Вера Федорова санаатын үллэһиннэ.

Горнайдар араас күрэхтэһиилэри тэрийэллэрэ улуус эрэ иһигэр буолбакка, киэҥ эйгэҕэ тахсара кэрэхсэбиллээх. Холобур, “Байанай” булчуттар, сылгыһыттар, “Олоҥхо ыһыаҕар” ананан оҥоһуллубут чаппараак көстүүлээх мэтээллэр, “Эр бэрдин” көрүҥнэрин күрэхтэһиилэрэ өрөспүүбүлүкэ олохтоохторун сэҥээриилэрин ыллылар. Бу этно-эстафета салгыы улуустарынан тарҕанан, сайдан дьону-сэргэни үөрдэ туруо диэн эрэнэбит.

Вячеслав АЛЕКСЕЕВ.

Горнай улууһун “Үлэ күүһэ” хаһыат корреспондена.

 

Добавить комментарий

Ваш адрес email не будет опубликован. Обязательные поля помечены *