Манчаары оонньуулара: 17 түһүмэхтээх сэргэх, күүрүүлээх эстафета ыытыллыа

Горнайга буолаары турар спорт сахалыы төрүт көрүҥнэригэр «Манчаары оонньуулара» спартакиадатын чэрчитинэн Саха Республикатыгар Доруобуйа сылынан уонна Горнай улууһа төрүттэммитэ 90 сылынан анаан «Тоҕус туруйа уолаттар, сэттэ кыталык кыргыттар» диэн чэпчэки атлетикаҕа этно-эстафета тэриллэр.

Бу, горнайдар, улуус иһигэр үгэс быһыытынан ыытар көхтөөх уонна киэҥник биһирэнэр күрэхтэһиилэрэ. Ону, Манчаары оонньуута Бэрдьигэстээххэ ыытылларынан анаан, дьоҥҥо-сэргэҕэ көрдөрөөрү, билиһиннэрээри уонна кытыннараары быйыл улахан бириистээн, республикатааҕы таһымҥа тэрийэргэ суоттаннылар.

Күрэхтэһии от ыйын 10 күнүгэр Бэрдьигэстээххэ, ипподромҥа ыытыллыаҕа.

«Тоҕус туруйа уолаттар, сэттэ кыталык кыргыттар» этно-эстафетаҕа эрдэ сайаапка киллэрбиттэринэн 16 хамаанда усунуос төлөөн кыттыахтаах. Хамаанда састааба 16 киһиттэн турар: 9 эр киһи (ол иһигэр улуус баһылыга, эбэтэр кини солбуйааччыта, үөрэх тэрилтэтин салайааччыта, эбэтэр кини солбуйааччыта) уонна 7 дьахтар. Састаап, Манчаары оонньууларыгар кыттыбыт спортсменнартан эрэ талыллыахтаах.

Кинилэр барыта 17 түһүмэххэ сүүрүөхтэрэ:

1 түһүмэх: улуус баһылыга, эбэтэр кини солбуйааччыта, үөрэх тэрилтэтин салайааччыта, эбэтэр кини солбуйааччыта – 50 м.

2 түһүмэх: эр киһи – 150 м.

3 түһүмэх: эр киһи – 200 м.

4 түһүмэх: дьахтар – 200 м.

5 түһүмэх: эр киһи – 200 м.

6 түһүмэх: дьахтар – 200 м.

7 түһүмэх: эр киһи – 200 м.

8 түһүмэх: дьахтар – 200 м.

9 түһүмэх: эр киһи – 200 м.

10 түһүмэх: дьахтар – 200 м.

11 түһүмэх: эр киһи – 200 м.

12 түһүмэх: дьахтар – 200 м.

13 түһүмэх: эр киһи – 200 м.

14 түһүмэх: дьахтар – 200 м.

15 түһүмэх: эр киһи – 200 м.

16 түһүмэх: дьахтар – 200 м.

17 түһүмэх: эр киһи – 200 м.

Тэрийээччилэр биллэрбиттэринэн, билиҥҥи туругунан Амма, Үөһээ Бүлүү, Чурапчы, Кэбээйи, Горнай, Хаҥалас, Сунтаар, Мэҥэ Хаҥалас улуустарын хамаандалара кыттарга бэлэмнэрин биллэрэн, сайаапкаларын киллэрбиттэр.

Этно-эстафета Горнай улууһун дьаһалтатын, Манчаары аатынан спорт национальнай көрүҥнэрин киинин, спорт төрүт көрүҥнэрин сайыннарыыны көҕүлүүр фонда, Дьокуускай куоракка олорор Горнай улууһуттан төрүттээхтэр түмсүүлэрин күүстэринэн, тэрийиилэринэн ыытыллар.

Кыайыылаах уонна иккис-үһүс миэстэҕэ тахсыбыт хамаандалар мэтээллэринэн, дипломнарынан уонна спонсордар олохтообут бириистээх сертификаттарынан наҕараадаланыахтара. Ол курдук, бастаабыт хамаанда – 500, иккистээбит – 300, үһүстээбит – 200 тыһыынча солк. харчынан бириэмийэлиэниэ.

Онон, «Манчаары оонньууларын» кэмигэр биир интэриэһинэй күрэхтэһии буолаары турар. Дьэ, маннык эстафетаҕа — ким кыахтаах, түмсүүлээх, тэрээһиннээх кыайара буолуо диэн сылыктыыбыт.

«Дьулурҕан».

Добавить комментарий

Ваш адрес email не будет опубликован. Обязательные поля помечены *