Майаҕатта Бэрт Хара аатынан

Уус Алдан Сыырдаахтааҕы филиала төрүттэммитэ 40 сылыгар анаан көҥүл тустууга Майаҕатта Бэрт Хара аатынан күрэхтэһиигэ улуус филиалларын таһынан Дьокуускай куораттан, Нам улууһуттан тиийэ кыттааччылар кэлэннэр, түһүлгэ быйыл республикатааҕы таһымнанна. Ол курдук, саастарынан үс бөлөххө барыта 69 эдэр бөҕөс көбүөргэ таҕыста.

2009 сыллаахха төрөөбүттэргэ кыайыылаахтарынан буоллулар: 24 кг – Эльдар Осипов, 26 кг – Ариан Винокуров (иккиэн – Дьокуускай), 28 кг – Айтал Аммосов (Сыырдаах), 32 кг – Вадим Дмитриев (Мүрү-1).

2007-2008 сс. төрөөбүттэргэ бастаатылар: 28 кг – Володя Перевалов, 34 кг – Максим Григорьев (иккиэн – Лөгей), 46 – Айаал Сергеев (Дьокуускай).

2005-2006 сс. төрөөбүттэргэ: 45 кг – Павел Алексеев (Мындааба), 50 кг – Игорь Матвеев, 70 кг – Слава Слепцов (иккиэн – Нам) кыайдылар.

Күрэхтэһии түмүгүнэн Айтал Аммосов, Максим Григорьев уонна Сандал Пермяков (Дьокуускай) анал бириистэринэн наҕараадаланнылар. Оттон көҥүл тустуу, мас тардыһыы, хапсаҕай көрүҥнэригэр күөн көрсүү түмүгэр Майаҕатта Бэрт Хара аатынан түһүлгэ муҥутуур кыайыылааҕынан Игорь Матвеев ааттанан, нэһилиэк дьаһалтатын баһылыга Юрий Николаевич Колодезников илиититтэн велосипед бирииһинэн наҕараадаланна.

Күрэхтэһиигэ ССРС спордун маастара, СР физическэй култуураҕа уонна спорка үтүөлээх үлэһитэ, СР үтүөлээх тренерэ, норуоттар икки ардыларынааҕы категориялаах судьуйа, Сыырдаах тустууга филиалын төрүттээччитэ, билигин Р.М. Дмитриев аатынан Олимпийскай эрэл училищетын үлэһитэ Николай Николаевич Константинов үөрэппит, дьарыктаабыт 15 выпускнига, ону тэҥэ училищеҕа киниэхэ үөрэммит 4 оҕото кыттыыны ыллылар. Үбүлүөйдээх сыл быһыытынан, Н.Н. Константинов бэйэтинэн “Сыырдаахтааҕы филиал сайдыытыгар кылааттарын иһин” диэн анал өйдөбүнньүк бэлиэни уонна дастабырыанньаны оҥотторбутун, иитиллээччилэригэр: көҥүл тустууга ССРС спордун маастардара – Федот Мигалкиҥҥа, Александр Стрекаловскайга, Семен Черкашиҥҥа, Владимир Копыриҥҥа, Василий Шепелевка, маастарга кандидаттар – Петр Черкашиҥҥа, Виктор Черкашиҥҥа, норуоттар икки ардыларынааҕы категориялаах судьуйа Петр Соловьевка, нэһилиэк баһылыга Юрий Колодезниковка үөрүүлээх быһыыга-майгыга туттарда. Маны тэҥэ Бэрт Ууһун нэһилиэгин сакааһынан оҥоһуллубут Майаҕатта Бэрт Хара анал статуэткалара бу хаартыскаҕа көстөр спорт бэтэрээннэригэр уонна Игорь Матвеевка туттарылыннылар.

Үөрүүлээх тэрээһин кэмигэр Сыырдаах филиалын иитиллээччитэ, хапсаҕайга СР спордун маастара, көҥүл тустууга маастарга кандидат Вадим Данилов ыраах Македония дойдутугар тиийэн бэтэрээннэргэ аан дойду чемпионатыгар бэйэтин ыйааһыныгар иккис миэстэҕэ тахсан, үрүҥ көмүс мэтээлинэн наҕараадаланан, үбүлүөйдээх филиалыгар уонна тус тренерэ Н.Н. Константиновка дьоһун бэлэҕи оҥордо.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *