Маастары отунан-маһынан оҥорбоккун

Бу өрөбүллэргэ, алтынньы 6-7 күннэригэр “Кыайыы 50 сыла” Спорт дыбарыаһыгар Саха Республикатын остуол тенниһигэр федерациятын республикатааҕы турнира ыытыллан түмүктэннэ. Күрэхтэһии биирдиилээн бастыыр иһин ыытылынна.

18-гар диэри саастаах кыргыттарга уон кыттааччыттан, Алина Захарова (Хаҥалас) кыайыы үөрүүтүн биллэ. Кини бэйэтин бөлөҕөр түөрт утарсааччытын 3:0 ахсаанынан эрэллээхтик кыайан баран, финалга Саина Луковцеваны (Майа) 2:1 ахсаанынан хотон, бастакы миэстэни ылла. Үһүскэ Нарыйа Гоголева (Амма) таҕыста.

18-тан 45-гэр диэри саастаахтарга 17 кыттааччы күөн көрсүбүтүгэр Чурапчыттан бастакы разрядтаах Ольга Тихонова кыайыыны ситистэ. Горнайтан Марфа Колодезникова пъедестал иккис үктэлигэр таҕыста. Оттон Айыына Петрова (Амма) маастарга кандидат Вероника Степанованы (Сунтаар) үтүрүйэн, үһүс бириистээх миэстэни ылбытын бэлиэтиир тоҕоостоох.

46-тан үөһээ саастаахтар – сэттиэлэр. Түмүккэ Александра Тутаева (Дьокуускай) бастакы, Сахая Карпова (Дьокуускай) иккис, Елизавета Матвеева (Нам) үһүс миэстэлэри үллэһиннилэр.

Уолаттарга 18 саастаахтарга диэри 23 кыттааччы баар. Кинилэртэн Айсен Степанов (Чурапчы) финалга Жан Христофоровы (Дьокуускай) 4:2 ахсаанынан хотон, бастакы миэстэни сурунна. Үһүс миэстэни Бүлүүттэн Айгимир Нифонов ылла.

18-тан 40-гэр диэри саастаах эр дьоҥҥо отут спортсмен күөн көрүстэ. Састаап күүстээх: 1 спорт маастара, 5 маастарга кандидат уонна күүстээх разрядтаахтар оонньоотулар. Онуоха күрэхтэһии сүрүн түһүмэҕэр спорт маастара Василий Румянцев (Дьокуускай) утуу-субуу Р.Жертовскайы (Чита), К.Владимировы (М-Хаҥалас) уонна Б.Капитоновы (Бүлүү) 3:0 ахсаанынан хотон баран, финалга маастарга кандидат Михаил Кылабысовы (Мэҥэ Хаҥалас) 3:2 ахсаанынан кыайан, кыайыы көтөллөннө итиэннэ спорт маастарын отунан-маһынан оҥорботторун көрдөрдө. Үһүс миэстэни Чурапчыттан маастарга кандидат Ньургун Сабарайкин ылла.

41-45 саастаах эр дьон бөлөҕөр 15 спортсмен кытынна. Түмүккэ Артур Слепцов (Уус Алдан) бастаата, Василий Самсонов (Ньурба) иккистээтэ, Еремей Куприянов (Мэҥэ-Хаҥалас) үһүстээтэ.

Эр дьоҥҥо 58-тан үөһээ саастаахтарга 18 киһи күрэхтэспитигэр, Уус Алдантан спорт маастарыгар кандидат Аркадий Иванов тэҥнээҕин булбата. Дьокуускайтан Василий Данилов – А.Ивановка 2:3 ахсаанынан хотторон, иккис миэстэни ылла. Пантелеймон Иванов (Дьокуускай) үһүс бириистээх миэстэҕэ таҕыста.

Дьахталларга муҥутуур кыайыылааҕы быһаарар күрэхтэһиигэ Марфа Колодезникова (Горнай) – Айыына Петрованы (Амма) тыҥааһыннаах киирсиигэ 3:2 ахсаанынан кыайан, бастакы миэстэни ылла. Манна Чурапчыттан Ольга Тихонова үһүс буолла.

Оттон эр дьоҥҥо муҥутуур кыайыылааҕынан спорт маастара Василий Румянцев буолла. Иккис миэстэҕэ Ньургун Сабарайкин таҕыста. Бүлүүттэн Богдан Капитонов үһүс миэстэни ылла.

Күрэхтэһии кыттыылаахтара остуол тенниһин саҥа федерациятыгар, толорооччу дириэктэр Максим Егоровичка Андреевка, күрэхтэһии кылаабынай судьуйата Александр Алексеевич Алексеевка, кылаабынай сэкэритээр Михаил Григорьевич Платоновка уонна бары судьуйаларга – турнир үрдүк тэрээһиннээхтик ыытыллыбытыгар махталларын тиэрдэллэр.

Петр ПАВЛОВ.

Аркадий ИВАНОВ хаартыскаҕа түһэриилэрэ

Добавить комментарий

Ваш адрес email не будет опубликован.