Маастардар көрсүһүүлэригэр ким кыайда?

Бэҕэһээ, “Триумф” Спорка бэлэмнэнии киинигэр мас-рестлиҥҥэ аан дойду чемпионатын бүтэһик быһаарыылаах киирсиилэр иннилэринэ, түһүлгэ чэрчитинэн Азия, Аан дойду, Европа, Россия хамаандаларын күрэхтэһиитэ тэрилиннэ. Онно, мас-рестлинг аан дойдутааҕы федерациятын “Мастерс” диэн категориятынан, 40-тэн үөһэ саастаах мадьынылар күрэс былдьастылар.

Бастаан хамаандалар парадтаан киирэн баран, сэрэбиэй быһыытынан биэстии киһилээх сирэй көрүстүлэр. Хамаандаҕа балаһыанньа быһыытынан, түөртүү эр киһи уонна биирдии дьахтар киирдэ.

Түһүлгэҕэ маҥнайгынан Азия уонна Аан дойду сүүмэрдэммит хамаандалара таҕыстылар. Онуоха кыайыыны Аан дойду хамаандата ситистэ. Аан дойду хамаандатын састаабыгар биһигиттэн Дыгын оонньууларын үс төгүллээх кыайыылааҕа Иннокентий Макаров кытынна. Кини Азия хамаандатыттан кыттыбыт узбек Ильгам Кадировы 2:0 ахсаанынан холкутук кыайда.

PS: Кыайыылаахтар инники суруллаллар.

Аан дойду – Азия 4:1

1.Марат Рахматов (Кыргызстан, Азия) – Пол Конрад (АХШ, Аан дойду) 2:1.

2.Иннокентий Макаров (Россия, Аан дойду) – Ильгам Кадиров (Узбекистан, Азия) 2:0.

3.Чабо Юхас (Венгрия, Аан дойду) – Эрмен Курманалиев (Кыргызстан, Азия) 2:0.

4.Одд Хоген (АХШ, Аан дойду) – Жолдос Сулейманов (Кыргызстан, Азия) 2:0.

5.Джоан Линдсей (АХШ, Аан дойду) – Олеся Гуреева (Узбекистан, Азия) 2:1.

Онтон түһүлгэҕэ Россия уонна Европа хамаандалара таҕыстылар. Европа хамаандатыттан саха мадьыныта Степан Колодезников (Уус Алдан) кытынна. Кини Россия хамаандатын чилиэнэ Валерий Саввиновка хотторон кэбистэ. Бу көрсүһүүгэ үһүс тардыһыы сүрдээх тыҥааһыннаах буолла. Спорт маастара, аатырбыт мас тардыһааччы Андрей Винокуров бэйэтиттэн тоҕус сыл балыс венгр Тамаш Дэлига биир маһынан сабырыйтарда. Бастаан бөҕө-таҕа көрүҥнээх, этэргэ дылы, былчыҥнара үллэҥнээн тоҕута барыах айылаах венгр маһы сулбу тардан ылбыта. Иккискэ Андрей ахсааны тэҥнээбитэ. Онтон быһаарыылаах киирсиигэ сэрэбиэй быһыытынан, мастан табыгастаах тутуу ыалдьыппытыгар түбэспитин, мүччү туппата.

Биир интэриэһинэй киирсиинэн аатырбыт мадьыны Анатолий Баишев бэйэтиттэн быдан ыарахан ыйааһыннаах, быйылгы чемпионат саамай бөдөҥ-садаҥ кыттааччыта, сэрэйдэххэ 150-чэ киилэлээх серб Дарибор Зелени кытта тардыһыыта буолла. Манна Амма ааттааҕа түргэнинэн, сымсатынан туһанан, маһы иккитэ сулбурута тардан ылла итиэннэ хамаандатыгар кыайыыны аҕалла.

Россия – Европа 3:2

1.Ньургун Уваров (Россия) – Юха Веса Яннти (Финляндия, Европа) 2:0.

2.Валерий Саввинов (Россия) – Степан Колодезников (Саха сирэ, Европа) 2:0.

3.Тамаш Дэли (Венгрия, Европа) – Андрей Винокуров (Россия) 2:1.

4.Анатолий Баишев (Россия) – Дарибор Зелен (Сербия, Европа) 2:0.

5.Сая Кантала (Финляндия, Европа) – Екатерина Белолюбская (Россия) 2:0.

Балаһыанньа быһыытынан бастакы эргииргэ хотторбут хамаандалар үһүс бириистээх миэстэ иһин кииристилэр. Онуоха Европа – Азияны хотто.

Чемпионат биир кэрэхсэбиллээх киһитинэн финн Юха Веса Яннти буолла диэтэхпинэ сыыстарбатым буолуо. Бу, 1969 сыллаахха төрөөбүт киһи Финляндия мас-рестлиҥҥэ федерациятын президенэ – биһиги төрүт көрүҥмүт биир саамай көхтөөх тарҕатааччыта, көҕүлээчччи. Дэлэҕэ бэйэтин көхсүгэр сахалыы мас тардыһыытын ойуутугар “Хаһан да бэринимэ!” диэн татуировка оҥотторуо дуо?!

Юха Весаны мин президент, тренер, кыттааччы быһыытынан көрдүм. Кини түһүлгэҕэ хас биирдии тахсыыта, көрөөччүлэр кэрэхсэбилин ылла. Хотугу дьон дьиппиэннэр, сэмэйдэр дииллэр даҕаны, Яннти сүрдээх сэргэх, ону ааһан сытыы-хотуу киһи эбит. Хомойуох иһин, финн Рахматовы кытта тардыһыытыгар эчэйии ылла…

Үһүс миэстэ иһин: Европа – Азия 4:1

1.Марат Рахманов (Кыргызстан, Азия) – Юха Веса Яннти (Финляндия, Европа) 2:0.

2.Степан Колодезников (Россия, Европа) – Эрмен Курманалиев (Кыргызстан, Азия) 2:0.

3.Тамаш Дэли (Венгрия, Европа) – Ильхам Кадиров (Узбекистан, Азия) 2:0.

4.Дарибор Зелен (Сербия, Европа) – Жолдос Сулейманов (Кыргызстан, Азия) 2:0.

5.Олеся Гуреева (Узбекистан, Азия) – Сая Кантала (Финляндия, Европа) 2:1.

Дьэ, онтон ханнык хамаанда кыайарын быһаарса Аан дойду уонна Россия мадьынылара киирэллэр. Көрөөччүлэр, мас тардыһыыны дойдутугар Америка холбоһуктаах штаттарыгар көхтөөх тарҕатааччы, бу дойду мас-рестлиҥҥэ федерациятын президенэ, Аан дойдутааҕы федерация вице-президенэ Одд Эрлинг Хогены уруйдуу көрүстүлэр. Кини Норвегияттан төрүттээх эбит. Сааһа 68-һа. Бэрт дуулаҕа быһыылаах-таһаалаах. Хоген бэйэтиттэн 19 сыл балыс Анатолий Баишевка сатаан утарсыбата. Ол да буоллар, спорду сэҥээрээччилэр кэрэхсэбиллэрин ылла.

Финал: Россия – Аан дойду 4:1

1.Ньургун Уваров (Россия) – Пол Конрад (АХШ, Аан дойду) 2:0.

2.Валерий Саввинов (Россия) – Иннокентий Макаров (Россия, Аан дойду) 2:0.

3.Андрей Винокуров (Россия) – Чабо Юхас (Венгрия, Аан дойду) 2:0.

4.Анатолий Баишев (Россия) – Одд Хоген (АХШ, Аан дойду) 2:0.

5.Джоан Линдсэй (АХШ, Аан дойду) – Екатерина Белолюбская (Россия) 2:0.

Онон бастакы миэстэни Россия (тренер Владимир Шарин), иккиһи Аан дойду, үсүһү Европа хамаандалара ыллылар. Итиэннэ өйдөбүнньүк кубоктарынан уонна мэтээллэринэн наҕараадаланнылар. Манна сыһыары тутан эттэххэ, быйылгы чемпионакка дьахталларга 85-тэн үөһэ кг ыйааһыҥҥа иккис буолбут Джоан Линдсэй “Мастерс” күрэхтэһиигэ хамаанданан иккис буолан, иккис үрүҥ көмүс мэтээллэннэ. Ити курдук, ыарахан ыйааһыҥҥа дьахталларга үһүстээбит Сая Кантала Европа хамаандатыттан кыттан, иккис боруонса мэтээллэннэ.

Биир билэр киһим, спорду сэҥээрээччи чемпионаты тэлэбиисэринэн көрөн баран: “Бэтэрээннэргэ муҥутуур кыайыылааҕынан ким буолла? Анатолий Баишев кыайбыта дии, чемпионнаата дуо? Тоҕо эрэ көрбөтүм”, — диэн ыйыталаспытыгар, бу суруйуум хоруй, быһааран биэрии буолар.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *