Любовь Пахомова: “Олохтоохторго сүдү эппиэтинэс”

//Манчаары-2021

Бары билэргит курдук, быйыл сайын от ыйын 6-11 күннэригэр Горнай улууһун Бэрдьигэстээх сэлиэнньэтигэр спорт национальнай көрүҥнэригэр “Манчаары оонньуулара” XXI спартакиада ыытыллыаҕа. Бу улахан таһымнаах күрэхтэһии тэриллиитэ өссө 2017 сыллаахха Саха Республикатын Ил Дарханын дьаһалынан быһаарыллыбыта.

Горнай улууһа билигин хаһааҥҥытааҕар даҕаны сэргэхтик олорор. Тоҕо диэтэргит, аны сайын улуус киинигэр Бэрдьигэстээххэ спорт национальнай көрүҥнэригэр “Манчаары оонньуулара” спартакиада ыытыллаары турарынан, туох баар хамсааһын, үлэ-хамнас барыта онно туһуланар. Улуус экономиката да, тутуу, суол-иис, сибээс сайдыытыгар сүрдээх элбэх үлэ ыытылынна, ыытылла да турар. Дьокуускай – Бэрдьигэстээх суола биллэрдик тупсубут, урукку курдук буор суолунан буолбакка, билигин асфальт суолунан түргэнник сыыйылыннаран тиийэҕин.

“Олохтоохторго сүдү эппиэтинэс”

Салгыы биһиги, Бэрдьигэстээх хабыллар хабар ортотугар турар болуоссакка кэллибит. Манна баар, спорт национальнай көрүҥнэригэр “Манчаары оонньуулара” спартакиада саҕаланара хас хонук, чаас, мүнүүтэ хаалбытын көрдөрөр анал таблону көрөөрү. Биһиги сылдьыбыт күммүтүгэр оонньуу саҕаланара 84 хонук баара. Таблону сэргэстэһэ Бэтэрээннэр музей-дьиэлэрэ турар эбит. Онно киирдибит.

Биһигини Пахомова Любовь Романовна, Горнай улууһун бэтэрээннэрин сэбиэтин председателэ көрүстэ.

-Эһиги, бу Горнай улууһун бэтэрээннэрин музейыгар киирэн тураҕыт. Манна, Аҕа дойду Улуу сэриитигэр сылдьыбыт дьоммут хаартыскалара, кинилэр ахтыылара, наҕараадалара, уордьаннара-мэтээллэрэ барыта көрдөрүүгэ анаан турар. Биһиги музейбыт – улуус кыраайы үөрэтэр музейын филиала буолар. Манна оскуола оҕолорун араас кылаас чаастара, көрсүһүүлэрэ тэриллэр. Кэлэннэр, бэйэлэрин эһээлэрин, хос эһээлэрин тустарынан кэпсээн, билиһиннэрэн бараллар. Уопсайынан, оскуола үөрэх таһынан тэрээһиннэрэ сүрүннээн манна ыытыллаллар.

Чугастааҕы кэмҥэ улууспутугар биир саамай улахан тэрээһининэн, биллэн турар, от ыйыгар ыытыллыахтаах Манчаары оонньуулара буолаллар. Онно биһиги эмиэ кыттабыт. Пааматынньыктарбытын ыраастаан, сөргүтэн бэлэмниэхтээхпит, кэлбит ыалдьыттары бу музейга сырыттаран, бэйэбит бэтэрээннэрбит тустарынан кэпсиэхтээхпит. Итини тэҥэ, ыытыллар тэрээһиннэргэ барытыгар кыттабыт. Оонньуу ыытылларынан үөрэ аххан сылдьабыт.

Манчаары оонньуулара – улахан таһымнаах күрэхтэһии, онон олохтоохторго сүдү эппиэтинэс. Элбэх ыалдьыт, салайааччы кэлэрэ күүтүллэр. Биһиги бэлэммит онно сөп түбэһиэхтээх дии саныыбыт. Оонньуу үрдүк таһымнаахтык барыахтаах. Боруоста тылга эрэ буолбатах, дьиҥнээх үлэлэнэн биһиги барытын көрдөрүөхтээхпит. Бэлэмнэнии үгэннээн бара турар. Аан бастаан бэйэбит Бэрдьигэстээхпитин көҕөрдүүнэн, киэргэтиитинэн, сибэккинэн, ыраастааһынынан, бэйэбит дьоммут бэрээдэгинэн, дьону кытта хайдах кэпсэтэрбитинэн… барытыгар онно бэлэмнэнэ аххан сылдьабыт.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *