Леонид Спиридонов: «Өссө да маннык кинигэлэр бэчээттэнэн тахса турдуннар»

Биэс сыллааҕыта, сэтинньи 3 күнүгэр Дьокуускай куорат дьаһалтатын улахан мунньахтыыр саалатыгар, көҥүл тустууга бары олимпийскай чемпионнары сиһилии билиһиннэрэр «Покорившие Олимп» кинигэ үһүстээн саҥардыллан, тупсарыллан, эбиллэн оҥоһуллан тахсыытын сүрэхтээһинэ ыытыллыбыта.

Саҥа кинигэни сүрэхтээһиҥҥэ оччотооҕу республика киин куоратын баһылыга, Дьокуускай куорат спортивнай тустууга федерациятын бэрэссэдээтэлэ Айсен Николаев, 1976 сыллааҕы Монреаллааҕы Олимпиада чемпиона, норуот дьокутаата Павел Пинигин, «Покорившие Олимп» кинигэ ааптара, «Дьулурҕан» спортивнай хаһыат редактора Петр Павлов, кинигэни оҥорон таһаарааччы, спортивнай суруналыыс Родион Кривогорницын, спортсменнар, тренердэр, оҕо спортивнай оскуолатын иитиллээччилэрэ, спорт бэтэрээннэрэ кыттыыны ылбыттара.

Бу бэлиэ түгэҥҥэ биллэрин курдук элбэх эҕэрдэ тыллар, баҕа санаалар этиллибиттэрэ. Ону диктофоҥҥа хайдах суруллубутун булан, аан бастаан ааҕааччыларга хайдах баарынан бэйэбит сайтпытыгар http://dzulurgan.ru билиһиннэрэбит. Бу иннинэ олимпийскай чемпион Павел Пинигин санаата бэчээттэммитэ.

Ол кэмҥэ Р.М. Дмитриев аатынан Олимпийскай эрэл училищетын дириэктэрин солбуйааччынан үлэлиир, 2004 уонна 2008 сыллардааҕы Олимпиадалар кыттыылаахтара, көҥүл тустууга норуоттар икки ардыларынааҕы кылаастаах спорт маастара Леонид Спиридонов:

Биһиги, сахалар тустууну сүрдээҕин таптыыбыт. Тустууну өрүү өрө тутабыт. Биир дойдулаахтарбыт, олимпийскай чемпионнар Роман Дмитриев уонна Павел Пинигин ааттарынан киэн туттабыт. Кинилэр тустарынан элбэҕи билэр-көрө, ааҕа сатыыбыт. Кинилэр курдук буолуохпутун баҕарабыт.

Оттон Петр Семенович туһунан этэр буоллахха, кинини урут-уруккуттан оҕо эрдэхпиттэн билэбин. Кини тустуу туһунан элбэх ыстатыйалары суруйар, сүрдээх элбэх статистиканы мунньар, ким-ханна, хайдах тустубутун барытын билэр, ону барытын дьоҥҥо тиэрдэр. Дьону тустууга угуйууга, тустууга тапталы иҥэриигэ сүрдээх элбэх үлэни үлэлээн кэллэ диэххэ наада. Кини үлэтэ сүрдээх туһалаах.

Бүгүн, көҥүл тустууга олимпийскай чемпионнар тустарынан үчүгэй хаачыстыбалаах кинигэни бэлэмнээн, оҥорон таһаарбытынан барыгытын эҕэрдэлиибин! Бу кинигэ күн сирин көрүүтүгэр Родион Юрьевич Кривогорницын уонна Айсен Сергеевич Николаев күүс-көмө, өйөбүл буолбуттарыгар махтаныахпын баҕарабын. Биһиги эдэр спортсменнарбыт бу кинигэни көрөн, тустуунан эрчиллэр санаалара өссө күүһүрэригэр, бастыҥ буоларга дьулуһуулара улаатарыгар эрэнэбин.

Өссө да маннык кинигэлэр бэчээттэнэн тахса турдуннар. Петр Семенович үлэтэ-хамнаһа өссө да сайда турдун! Махтанабын!         

«Дьулурҕан».                             

Добавить комментарий

Ваш адрес email не будет опубликован. Обязательные поля помечены *