Леонид Спиридонов: «Спортсменнар карантин кэмигэр эрчиллиилэрин тохтоппоттор»

Коронавируһынан сибээстээн дойду уонна республика дьаһалтатын ирдэбилинэн дьиэҕэ олоруу кэмигэр Саха Республикатын Физическэй култуураҕа уонна спорка министиэристибэтэ Инстаграмынан быһа тахсыыны тэрийэр. Ол курдук, бэҕэһээ киэһэ быһа тахсыы ыалдьытынан СР Спорка бэлэмнэнии киинин дириэктэрэ Леонид Николаевич Спиридонов буолла.

Кини, СР Спорка министиэристибэтин Пресс-Киинин салайааччыта Саина Шеломова уонна спорду таптааччылар ыйытыыларыгар хоруйдаата. Билиҥҥи уустук кэмҥэ республика спордун балаһыанньатын билиһиннэрдэ.

Биллэрин курдук, СР Физическэй култуураҕа уонна спорка министиэристибэтин көҕүлээһининэн билигин социальнай ситимнэргэ “Дьиэҕэ эрчиллии” диэн чөл олоҕу түстүүр акция үгэннээн ыытылла турар. Онно, спортсменнар, тренердэр эти-хааны, күүһү-уоҕу эрчийиигэ “аһаҕас уруогу” быһа сибээскэ таһааран, эрчиллэргэ-дьарыктанарга дьону көҕүлүүллэр.

Аһаҕас эфирга этиллибитинэн, спортсменнарбыт билигин үөрэтэр-эрчийэр түмсүүлэртэн дойдуларыгар кэлэн, икки нэдиэлэлээх дьиэҕэ олоруу ирдэбиллэрин толордулар. – Спортсменнарбыт дьиэ усулуобуйатыгар ким төһө кыайарынан эрчиллэллэр, — диир Леонид Николаевич. – Онон анал былаан быһыытынан үлэлэрин тохтоппоттор. Кинилэри кытта сибээһи күннэтэ тутуһабыт. Быһа эфирынан былааннааһыны ыытабыт. Ордук Россия үтүөлээх тренерэ Петр Давыдов, спорт үтүөлээх маастара Татьяна Жиркова, тустуу, бокса тренердэрэ көхтөөхтүк үлэлииллэрин бэлиэтиэм этэ.

Итини таһынан Л.Н. Спиридонов суруналыыстарга бу кэмҥэ, күрэхтэһии суоҕар, спорт историятын, бастыҥ спортсменнар олохторун киэҥник сырдатарга сүбэлээтэ. Спортсменнар, тренердэр ортолоругар араас дьикти дьарыктаах, талааннаах дьоннор баалларын ыйда. Холобур, Россия үтүөлээх тренерэ Василий Стручков – Абый Бааска киһи дууһатын манньытар ырыаһыт буоларын эттэ.

Л.Н. Спиридонов: “Россия көҥүл тустууга чемпионата Улан-Удэҕэ буолуохтаах, ыытыллар болдьоҕо эрэ көһөрүллүбүтэ. Биллэрин курдук, дойду түһүлгэтигэр биһигиттэн сүүрбэ биир бөҕөс кыттар быраабы ылбыта”, — диэн быһа биэрии истээччитин ыйытыытыгар хоруйдаата.

Оттон, “Карантин кэмигэр спортсменнары “Триумфка” мунньан, хонноро сытан итиннэ эрчиллии кыаллыа дуо?” – диэн ыйытыыга, Леонид Николаевич, эпидемия уһуур түгэнигэр итинни дьаһаныахха сөп, диэтэ. Ол эрээри, барыта дьаһалтан, тэрээһинтэн тутулуктаах буоллаҕа.

Ыарыы тэнийбэтин туһугар дьиэҕэ олоруу ирдэбилин тутуһуоҕуҥ. Бэйэҕитин уонна чугас дьоҥҥутун дьаҥтан-дьаһахтан харыстаан! Чэгиэн-чэбдик буолуҥ!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *