Леонид Спиридонов: “Бу саҕалааһын сыл аайы тэриллэригэр баҕарабын”


ССРС, РСФСР, Саха АССР үтүөлээх тренерэ Д.П. Коркин төрөөбүтэ 90 сылыгар анаммыт “Коркинныы олоруохха! Коркинныы айыахха!” диэн, “Строительнай” Атыы-эргиэн киинин салайааччылара тэрийбит республикатааҕы быыстапкаларын кыттыылаахтарын “Дьулурҕан” сайтка билиһиннэриини салгыыбыт.

Икки Олимпиада кыттыылааҕа, Азия чемпиона, аан дойду чемпионатын боруонса призера, норуоттар икки ардыларынааҕы кылаастаах спорт маастара Леонид Спиридонов быыстапкаҕа бэйэтин мэтээллэринэн, кубоктарынан, вымпелларынан кытынна.

— Быыстапка сүрдээх үчүгэйдик ыытыллан түмүктэммитинэн тэрийээччилэри эҕэрдэлиибин! Маннык тэрээһиннэр ыытыллыахтаахтар дии саныыбын. Бэйэм эмиэ мэтээллэрбин, кубоктарбын, грамоталарбын аҕалан көрдөрүүгэ туруордум.

Ити сөпкө этэллэр, тустууга хайаан да маннык музей баар буолуон наада. Сүрдээх элбэх экспонат (кинигэ, хаартыска) баар эбит. Бэйэтин ситиһиитин, мэтээллэрин көрдөрүөн баҕалаах киһи сүрдээх элбэх буолуо дии саныыбын. Бу быыстапкаттан сиэттэрэн, туста сылдьыбыт уолаттар эрдэттэн толкуйдаан бэйэлэрин бириистэрин мунньа, ууруна сылдьыахтарын сөп эбит. Кэлин баҕар кырыйдахпытына наада буолуо диэн санааттан.

Быыстапканы элбэх киһи кэлэн көрдө. Кинилэр өйдөрө-санаалара уларыйбыта, мантан элбэҕи билбиттэрэ буолуо дии саныыбын. Маннык баар эбит, бэйэбит историябытын билиэхтээхпит диэн. Эбэтэр, маннык дьоннор олорон ааспыттар диэн. Киһи үөрэр, тэрийээччилэр тустууга ыалдьар буолан маннык быыстапканы тэрийдэхтэрэ. Бу саҕалааһын сыл аайы тэриллэригэр баҕарабын. Элбэх экспонат баар буоллун, быыстапка өссө интэриэһинэй буоллун диэхпин баҕарабын. Тустуу биһиэхэ, Саха сиригэр биир ытыктанар уонна дьон сөбүлээн көрөр спордун көрүҥэ. Саха омугу аан дойдуга аатырдыбыт көрүҥ. Ол иһин урут-уруккуттан киэн туттар спортсменнарбыт элбэхтэр, — диир Леонид Николаевич.

Кэпсээнин бүтүүтүгэр кини, биһиги олимпиецтарбыт Роман Дмитриев, Павел Пинигин, Александр Иванов, улуу тренербит Дмитрий Петрович Коркин мэтириэттэрин спорт уонна тустуу саалаларыгар эрэ буолбакка, республика хас биирдии оскуолатын көстүүлээх миэстэтигэр туруоралларыгар, онон эдэр ыччакка Саха сирин дьиҥнээх дьоруойдарын киэҥник кэпсии, билиһиннэрэ сылдьарга баҕарда.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *