Көҥүл тустуу: Уолаттарбыт үөтэлээбэтилэр

Чемпионат иккис күнүгэр көбүөргэ Белоруссия чиэһин көмүскүүр бөҕөстөрбүт: Владислав Андреев (57 кг) уонна Ньургун Скрябин (65 кг) таҕыстылар. Кинилэр тустууларын билиһиннэрдэххэ маннык:

Бэҕэһээ суруйубутум курдук, Владислав Андреев бастакы эргииргэ сынньанан баран, Бехбаяр Эрдэнэбат (Монголия) – Реза Атри (Иран) пааратын кыайыылааҕар таҕыста. Ити хапсыһыыга 6:1 ахсаанынан кыайыыны иранец ситиспитэ. Атри – биллэр бөҕөс, хас да сыллааҕыта биһиэхэ, Дьокуускайга кэлэн Роман Дмитриев кэриэһигэр норуоттар икки ардыларынааҕы турнирга бастаан турардаах. Быйылгы улахан ситиһиитэ – Азия оонньууларын боруонса призера.

Владислав Андреев (Беларусь) – Реза Атри (Иран): тустууну иккис түһүмэхтэн, 3:0 ахсаантан саҕалаан көрдүм. Биһиги бөҕөспүт тустууну күөттүүр, кимэ сатыыр. Биир түгэҥҥэ атахха киирэн баран, сытан хаалла. Хата баттаппакка, эбэтэр кэннигэр таһааттарбакка туран кэлэн – көмүскэннэ. Сотору Андреевка сэрэтии биэрдилэр, 3:1. Онтон сытыы хамсаныы кэмигэр иранец уолбутун эргитэ тардан көхсүгэр биирдэ баар буола түһээт, партерга охтордо (2 баал, 3:3) уонна тута “накат” диэн албаска эргитэн (2 баал, 3:5), чорбойон таҕыста. Ити кэмҥэ таблоҕа олох аҕыйах сөкүүндэ хаалбыта. Накатка эргиттэрэн баран, Владислав хайдах эрэ утары хамсаныыга киһитин бэйэтин тиэрэ быраҕан, 2 баалы ылар (5:5). Итинэн бириэмэ бүтэн хаалар. Баалы бүтэһигинэн ылбытынан, биһиги бөҕөспүт кыайыылааҕынан ааҕыллар.

Бу хапсыһыыга В.Андреев ыгылыйбакка, ордук хос хамсаммакка, өйдөөхтүк туһунна. Бүтэһиккэ диэри сэрэҕин сүтэрбэккэ кыайда.

Салгыы күрэхтэһиигэ, финал чиэппэригэр аны аан дойду былырыыҥҥы чемпиона Юки Такахашины (Япония) утары тахсар. Бастакы түһүмэххэ, бөҕөстөр аһара кэтэсиһэн, анньыһа сылдьыбыттарын быһыытынан, дьоппуоҥҥа сэрэтии биэрдилэр (1:0). Онтон биир түгэҥҥэ көбүөр таһыгар анньан таһааран, Такахаши ахсааны тэҥнээтэ (1:1). Итинэн бастакы түһүмэх түмүктэннэ.

Иккискэ киирэн эмиэ сэрэнсэн тустубуттарыгар сэрэтиини аны Андреевка биэрдилэр (1:2). Бөҕөстөр тэҥнэрэ бэрт. Хапсыһыы бүтэрэ аҕыйах сөкүүндэ хаалар. Биһиги бөҕөспүт хотторон иһэр киһи быһыытынан хапсыһыыны сытыырхатан биэрэр. Ол сылдьан бэлэмэ суох түспүтүн, дьоппуон умса тардан баран, кэннигэр эргийэн тахсар – икки баал. Онон 1:4 ахсаанынан хотторон кэбистэ.

Манна мин санаабар, Владислав үлэлии сатаабакка, киһитин кэтии сырытта. Бэйэтэ саҕалаабыта эбитэ буоллар…

Салгыы күрэхтэһиигэ, финалга тахсар иһин хапсыһыыга Такахаши – Заур Угуевка (Россия) 0:6 ахсаанынан хотторон, Владислав Андреев суолун бүөлээн кэбистэ. Онон бүттүбүт.

Оттон Ньургун Скрябин (65 кг) бастаан Гвинея Бисау бөҕөһүн атахха киирэн охторон баран, кыбытан эргитэлээн, түмүккэ 11:2 ахсаанынан эрэллээхтик кыайда. Иккис эргииргэ аны китаеһы эмиэ итинник албаһынан эргитэлээн, эбиитин “миэлиҥсэ” албаһы туттан, эмиэ очукуонан ыраастык (12:0) хотто.

Оттон финал чиэппэригэр аан дойду былырыыҥҥы чемпионатын призера, кубинец Алехандро Вальдеска тулуспата. Атахха киллэттэрэн баран, хаста да “накатка” эргиттэрэн кэбиһэн, бу сырыыга бэйэтэ 0:11 ахсаанынан хотторон кэбистэ.

Вальдес финалга тахсар иһин хапсыһыыга индус Бажранг Пунияҕа 3:4 ахсаанынан хоттордо. Онон баҕар кубинец кыайдаҕына, Ньургуммут үһүс миэстэни ылар бөлөххө киирсиэ дии санаабыппыт туолбата.

Чемпионат иккис күнүн түмүгэ:

61 кг: 1. Йовлис Бонне (Куба), 2. Гаджимурад Рашидов (Россия), 3. Туменбилег Тувшинтулга (Монголия), 3. Джо Коллон (АХШ).

74 кг: 1. Заурбек Сидаков (Россия), 2. Автандил Кенчадзе (Грузия), 3. Бекзод Абдурахмонов (Узбекистан), 3. Джордан Барроуз (АХШ).

86 кг: 1. Девид Тейлор (АХШ), 2. Фатих Эрдин (Турция), 3. Хассан Яздани (Иран), 3. Теймураз Фриев (Испания), 5. Даурен Куруглиев (Россия)

125 кг: 1. Гено Петриашвили (Грузия), 2. Дэнг Живэй (Кытай), 3. Ник Гвяздовски (АХШ), 3. Парвиз Хади (Иран), 5. Анзор Хизриев (Россия).

Оттон бүгүҥҥү финаллар маннык буоллулар:

57 кг: Заур Угуев (Россия) – Нурислам Санаев (Казахстан)

65 кг: Кейсукэ Отогуро (Япония) – Бажранг Пуния (Индия)

79 кг: Кайл Дэйк (АХШ) – Джабраил Гасанов (Азербайджан)

92 кг: Иван Янковскай (Белоруссия) – Джейден Кокс (АХШ).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *