Көҥүл тустуу: Сэрэбиэй тугу түстүүр?

Будапештка (Венгрия) ыытылла турар көҥүл тустууга аан дойду чемпионатын иккис күнүнээҕи ыйааһыннарын сэрэбиэйэ ыытылынна. Син эмиэ маҥнайгы күҥҥэ курдук, күүстээхтэр финал иннинээҕи соһуччу көрсүһүүлэрэ күүтүллэллэр. Оннук да буолуохтааҕа, Тустуу аан дойдутааҕы түмсүүтэ (UWW) бэйэтин ыытар систиэмэтиттэн туораабат. Биирдэ ылан көрдөххө сөп даҕаны, күүстээх бөҕөстөр рейтиннээх турнирдары эккирэтэ сылдьан кыттыахтаахтар. Ол бастакы сыл табыллыбата, мантан инньэ итини өйдүөхтэрэ.

Чемпионат иккис күнүн сэрэбиэйин ырытан көрдөххө, 57 киилэҕэ сэрэйиллибитин курдук, З.Угуев (Россия), Т.Гилман (АХШ), В.Андреев (Белоруссия) уонна ААракелян (Украина) бөлөхтөргө сөптөөхтүк араарыллан, күрэхтэһиини финал 8/1-тэн саҕалыыллар. Хата манна, биир кураанах миэстэ тахсыбытыгар, сэрэбиэй быһыытынан, армянин М.Джабурян табыллыбыт, рейтиннээх бөҕөстөр курдук бастакы эргииргэ сынньанар буолбут.

Бастатан туран, бэйэбит уолаттарбыт балаһыанньаларын көрөбүт. Белоруссия чиэһин көмүскүүр Владислав Андреев үөһээ бөлөххө баар. Кини финал 8/1-гэр Э.Бехбаяр (Монголия) – Р.Атри (Иран) көрсүһүүтүн кыайыылааҕын кытта тустуоҕа. Биирдэ ылан көрдөххө, сэрэбиэйи кини туһугар ыарахан диэххэ сөп гынан баран, итинник түгэнтэн куоппаккын. Кырдьык, монгол да, иранец күүстээхтэринэн биллэллэр. Ханнык да түгэҥҥэ киирсиэххэ наада. Ылан көрдөххө, үөһээ бөлөххө өссө Заур Угуев (Россия), Юки Такахаси (Япония) бааллар. Дьэ, хайдах буолар, уолбутугар ыалдьабыт, кэтэһэбит!

Манна Заур Угуев балаһыанньата үчүгэй курдук көрөбүн. Кини финал аҥаарыгар диэри утарсааччылара наһаалара суох. Онон мэтээлгэ олорсор кыахтаах эбит.

Бу ыйааһыҥҥа иккис кыттааччыбыт – Македонияттан кыттар Владимир Егоров маҥнай узбек Н.Сафаровы кытта көрсөр. Онно табылыннаҕына, А.Дуков (Румыния) – С.Атли (Турция) пааратын кыайыылааҕар тахсыан сөп. Чэ, бу да ыйааһыҥҥа күүстээхтэр бааллар. Ол курдук, Н.Санаев (Казахстан), Г.Эдишерашвили (Азербайджан), Канг Кумсонг (КНДР), Т.Гилман (АХШ).

Биир эрэнэр бөҕөспүт, быйылгыттан Белоруссия аатыттан тустар Ньургун Скрябин 65 киилэҕэ кыттар. Кини балаһыанньата хайдах эбитий?

Бөҕөспүт аллараа бөлөххө түбэспит, бастаан африканец Кумба Мбалины кытта тустар. Онтон М.Ауссерляйтнер (Австрия) – Н.Хасибагена (Кытай) көрсүһүүтүн кыайыылааҕар тахсар. Сэрэйдэххэ кытай кыайара буолуо. Сэрэбиэйи салгыы көрдөххө, Ньургун бөлөҕөр Хаджи Алиев (Азербайджан), Алехандро Вальдес (Куба), Даулет Ниязбеков (Казахстан) курдук күүстээхтэр чугастар. Өссө монгол Т.Тулга, Польшаттан М.Гаджиев, индус Бажранг бааллар.

Дьэ, уолбутугар бу түһүлгэ тугу түстүүр? Оттон биһиги сымыһахпытын быһа ыстаан баран, биир дойдулаахпытыгар, бэйэбит уолбутугар ситиһиини эрэ баҕарабыт.

Бу ыйааһыҥҥа иккис рейтиннээх И.Бекбулатов (Россия) кэлбэтэҕинэн, ордук балаһыанньа турок С.Килисчалаяҥҥа эрэ оҥоһуллубут. Атыттар күрэхтэһиини тустуунан саҕалыыллар. Ханныгын да иһин, састаап аһара күүстээх. Үөһээ бөлөххө Владимир Хинчегашвили (Грузия), Логан Стибер (АХШ), Ахмед Чакаев (Россия) курдук баабый дьон бааллар. Манна даҕатан эттэххэ, Чакаев тута американецтыын тустар буолбут. Бу көрсүһүү тыҥааһыннаах буолара күүтүллэр. Ким кыайбыт, мэтээлгэ тиксиэн сөптөөх.

Чэ, ити курдук. Хаһан баҕарар биһиги билгэлиибит, оттон көбүөр таҥарата бэйэтэ күүстээхтэри сөптөөхтүк аттаран туруоруо.

Петр ПАВЛОВ.

Добавить комментарий

Ваш адрес email не будет опубликован.