Көҥүл тустуу: Рашидов уонна Сидаков финалга таҕыстылар

Венгрия киин куоратыгар саҕаламмыт көҥүл тустууга аан дойду чемпионатын бастакы күнүгэр 61, 74, 86 уонна 125 кг ыйааһыннаах бөҕөстөр туһуннулар. Биллэрин курдук, бу чемпионакка саха тустууга кыһатын түөрт иитиллээччитэ кыттар.

Кинилэртэн көбүөргэ бастакынан Орто Халыматтан төрүттээх Андрей Бекренев таҕыста. Андрей Беларусь сүүмэрдэммит хамаандатын 61 киилэҕэ кыттааччыта. Бастакы эргииргэ Азия чемпионатын призера, Лондоннааҕы Олимпиада кыттыылааҕа, байыаннайдарга аан дойду чемпиона Ким Джин Чолу (Соҕуруу Корея) хотон баран, салгыы күрэхтэһиигэ индус Сонба Гонганеҕа 4:5 ахсаанынан хомолтолоохтук хоттордо. Индия бөҕөһө салгыы аны Г.Рашидовка (Россия) күппүлүү баран, биһиги уолбут суолун бүөлээн кэбистэ. Онон бүттүбүт.

Бу күн Россия бөҕөстөрүттэн Гаджимурад Рашидов уонна Заурбек Сидаков үчүгэй тустууну көрдөрдүлэр. Сидаков – 74 киилэ бастыҥнарын Джордан Барроуһу (АХШ) уонна Франк Чамизоны (Италия) кыайан, бастакы күн дьоруойунан буолла.

86 кг ыйааһыҥҥа Даурен Куруглиев үс утарсааччытын кыайан баран, финалга тахсар иһин тустууга американец Д.Тейлоры 5:1 ахсаанынан хотон иһэн, иккис түһүмэххэ киирэн олох эстэн хаалла. Утуу-субуу атаҕыттан ылларан, түмүккэ 5:7 ахсаанынан кыһыылаахтык хотторон таҕыста. Онон боруонса мэтээл иһин тустар буолла.

Оттон саамай ыарахан ыйааһыҥҥа Зелимхан Хизриев икки утарсааччытын холкутук хотон баран, финал чиэппэригэр грузин Г.Петриашвилига дьоһун утарсыыны оҥорон, 4:8 ахсаанынан сабырыйтарда. Онон, “уоскутар” бөлөххө киирэн, чемпионат боруонса мэтээлин иһин тустар кыахтанна.

Чемпионат бастакы күнүн түмүгүнэн финалга таҕыстылар:

61 кг Йовлис Бонне (Куба) – Гаджимурад Рашидов (Россия)

74 кг Заурбек Сидаков (Россия) – Автандил Кенчадзе (Грузия)

86 кг Фатих Эрдин (Турция) – Дэвид Тейлор (АХШ)

125 кг Денг Живей (Кытай) – Гено Петриашвили (Грузия).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *