Көҥүл тустуу: Император кубогын кыайыылаахтара

Бу күннэргэ Токиоҕа, көҥүл тустууга Император кубогар Бүтүн Япония дойдутун үрдүнэн бастыыр иһин чемпионат ыытыллан түмүктэннэ. Онуоха ыйааһыннарынан кыттааччылар ахсааннара маннык буолла: 57 кг — 19, 61 кг — 18, 65 кг — 27, 70 кг — 14, 74 кг — 19, 79 кг — 11, 86 кг — 15, 92 кг — 11, 97 кг — 12, 125 кг — 14. Чемпионакка Тахсар күннээх дойду күүстээх бөҕөстөрө бары кытыннылар.

Император кубога – эһиил Казахстаҥҥа ыытыллар көҥүл тустууга аан дойду чемпионатыгар хамаанданы сүүмэрдиир бастакы түһүмэҕинэн буолар. Иккис түһүмэх – Мэйдзи кубога аны сайын ыытыллар. Бу икки түһүмэҕи этэҥҥэ ааспыт бөҕөс – аан дойду чемпионатыгар Япония хамаандатын көмүскүөҕэ.

Ылан көрдөххө, 57 уонна 65 кг ыйааһыннарга таһымнаах киирсиилэр буолбуттар. Чопчу ити ыйааһыннарга дьоппуоннар күүстээхтэр. Оттон аан дойду чемпионаттарын призера Юки Фуджинами, Сосуке Такатани, Атцуси Мацумото бастыылларын киһи эрдэттэн сэрэйэр этэ.

Соторутааҕыта Румыния киин куоратыгар түмүктэммит 23-гэр диэри саастаах бөҕөстөргө ситиһиилээхтик кыттыбыт Хасегава уонна Хигучи хайдах кыттыахтарай, бастыахтара дуо  диэн кэтээн көрдүбүт. Онтукайбыт, Тосихиро Хасегава (57 кг) финал 1/8-гар Кайки Ямагучи диэн эдэр бөҕөскө 1:2 ахсаанынан хотторон, бэйэтин ыалдьааччыларын хомотто, биһигини соһутта диэххэ сөп. Утарсааччыта финалга тахсыбытын иһин “уоскутар” бөлөххө киирэн, үһүс бириистээх миэстэ иһин киирсиигэ Кадзуя Коянагига 3:4 ахсаанынан сабырыйтаран, мэтээлтэн матта.

Оттон Рей Хигучи (65 кг) бастакы эргииргэ сынньанан баран, финал 1/8-гар уопуттаах Масакадзу Камойу 8:6, финал чиэппэригэр Рёма Анракуну 5:4 ахсаанынан кыайан баран, финалга тахсар иһин киирсиигэ аан дойду чемпиона Такуто Отогуроҕа 3:8 хотторон кэбиспит. Үһүс бириистээх миэстэ иһин киирсиигэ 61 киилэҕэ 23-гэр диэри саастаахтарга былырыыҥҥы аан дойду чемпиона, Аан дойду быйылгы кубогын биирдиилээн түмүккэ кыайыылааҕа Ринуя Накамураны утары туста тахсыбакка, бэһис миэстэнэн дуоһуйда.

Аан дойду былырыыҥҥы чемпиона, быйылгы боруонса призера Юки Такахаси финалга эдэр талааннаах тустуук Кайки Ямагучины улаханнык үлэлээн, этэргэ дылы, тиритэн-хорутан туран кыайда. Бастакы түһүмэххэ 1:4 баһыйтаран иһэн, иккискэ киирэн баай уопутун туһанан, ахсааны тэҥнээбитэ, оттон хапсыһыы бүтэрэ аҕыйах сөкүүндэ хаалбытын кэннэ, Ямагучины көҕө суохтук тустаҕын диэн, сэрэтии биэрэн, түмүккэ 6:5 ахсаанынан Такахаси кыайыыны ситистэ. Онон Тахсар күннээх дойдуга саҥа, эдэр талааннаах тустуук тахсан эрэр диэххэ сөп. Арай, уҥуоҕа үрдүгүн көрдөххө, 57 киилэҕэ олохсуйуо суоҕа дуу дии санаа үөскүүр.

19 сааһыгар аан дойду улахан дьоҥҥо чемпиона буолан, дьоппуоннартан саамай эдэр кыайыылаах аатын ылбыт Токуто Отогуро кыахтаахтык бастаата. Бүтэһик быһаарыылаах хапсыһыыга, син эмиэ былырыыҥҥы курдук, кини – Азия чемпионатын призера Дайчи Такатанины кытта көрүстэ уонна аҕыйах мүнүүтэ иһигэр атахтаан түһэрэн баран, утарсааччытын атаҕын кыаһалыы тутан эргитэн, тустуу эйгэтигэр “кириэс” диэн ааттанар албаһынан 11:0 ахсаанынан болдьоҕун иннинэ хотто. Манна даҕатан эттэххэ, Такуто бииргэ төрөөбүт убайа, Япония былырыыҥҥы чемпиона Кейсуке Отогуро (70 кг) бу сырыыга үһүс миэстэҕэ тиксибитин санатар тоҕоостоох.

Император кубогын кыайыылаахтарынан буоллулар: 57 кг – Юки Такахаси, 61 кг – Юдай Фидзуита, 65 кг – Такуто Отогуро 70 кг – Коджира Шига, 74 кг – Юхи Фуджинами, 79 кг – Юто Абе, 86 кг – Сосуке Такатани, 92 кг — Атцуси Мацумото, 97 кг – Ноая Акагума, 125 кг – Нобуоши Аракида.

Япония спортивнай тустууга сайтын кылаабынай редактора Икуо Хигучи эппитинэн, аны Саҥа дьыл кэнниттэн үөрэтэр-эрчийэр түмсүү кэнниттэн, Тахсар күннээх дойду бөҕөстөрө тохсунньу бүтүүтэ Красноярскайга ыытыллар Иван Ярыгин аатынан норуоттар икки ардыларынааҕы Гран-при турнирга кыттыахтара.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *