Көҥүл тустууга Россия чемпионата аны Нарофоминскайга ыытыллар буолла

Дьэ, үнүрүүн сурах быһыытынан тарҕаммыт сонуммут, бүгүн Россия спортивнай тустууга федерациятын интернеккэ сайтыгар (www.wrestrus.ru) дьиҥнээхтик бигэргэтилиннэ. Чемпионат, били соторутааҕыта көҥүл тустууга Россия эдэрдэргэ күрэхтэһиитэ ыытыллыбыт куоратыгар – Нарофоминскайга, алтынньы 15-18 күннэригэр буолар буолла.

Дьэ, кырдьык, коронавирус дьаҥа аймаан бу чемпионат Улан-Удэттэн – Москва, онтон Владикавказ куораттарга көһөрүллэн баран, бүтэһиктээхтик быһаарылынна быһыылаах.

Эмиэ дьаҥынан сибээстээн Россия спортивнай тустууга федерациятын быһаарыытынан, чемпионат кыттыылаахтарын хааччахтыыр дьаһалы ыллылар. Ол курдук, урукку курдук, сүүмэрдээһини ааспыт бары күүстээхтэр буолбакка, кэккэ күрэхтэһиилэр түмүктэринэн ыйааһын ахсын 16-лыы эрэ бөҕөс кыттар буолла. Холобур, Россия былырыыҥҥы чемпионатын, “Аланы” турнирын, Аан дойду Кубогын, Ярыгин быйылгы турнирын, Россия эдэрдэргэ күрэхтэһиитин түмүктэринэн бастыҥнар талыллан киириэхтэрэ.

Мин тус санаабар, бу чемпионакка эдэрдэр киирэллэрэ сыыһа. Кинилэр соторутааҕыта эрэ тустубуттара уонна аан дойду түһүлгэтигэр сүүмэрдэммиттэрэ дии. Эһиги санааҕытыгар хайдаҕый?

Биир өттүнэн ылан көрдөххө, маннык балаһыанньаҕа буолаары турар чемпионаты – Россия чемпионата диир хайдах эрэ табыгаһа суох. Чемпионат – чемпионат курдук буолбакка, туспа ирдэбил быһыытынан састаап талыллан ыытыллар. Хата, маны “Россия рейтиннээх күрэхтэһиитэ” диэххэ сөп. Күрэхтэһиилэр түмүктэринэн бастыҥнар талыллан киирэн кытталларын быһыытынан.

Чемпионат көрөөччүтэ суох ыытыллыа.

Дьэ, маннык балаһыанньаҕа саха тустууну таптааччыларыгар, биһигиттэн хас  киһи, кимнээх кыттыахтарай диэн ыйытыы үөскүүр. Үөһэ этиллибит күрэхтэһиилэр түмүктэрин ылан көрдөххө, Россия чемпионатын боруонса призера Михаил Иванов, аан дойду Кубогын хамаанданан кыайыылааҕа Виктор Рассадин, Ярыгин турнирын призера Арыйаан Тютрин уонна Россия эдэрдэргэ күрэхтэһиитигэр үһүс миэстэлээх Айаал Белолюбскай кыттар кыахтаахтар.

Бары билэ-көрө сылдьарбыт курдук, тустууктарбыт күрэхтэспэтэхтэрэ ыраатта. Бары кэриэтэ тэҥ балаһыанньаҕа сылдьаллар. Маннык түгэҥҥэ республикалар бэйэлэрэ төһө кыайалларынан эрчиллиилэри, түмсүүлэри ыыта сатаатылар. Ити ахтыллыбыт күрэхтэһиилэр бастыҥнара билигин хайдах балаһыанньаҕа сылдьаллара биллибэт. Ким ыарыйда, ким бэлэмэ суох, ким эчэйиилээх, ким ыйааһына таҕыста… Чэ, быһата, Нарофоминскайга буолар чемпионат кыттыылаахтарын быһаарыы уһуннук барара буолуо. Чуо, кимнээх кыттыахтаахтарыгар. Маныаха, син урукку курдук, бастыҥнарга чугас сылдьар бөҕөстөр бэлэм буолуохтарын наада. Син биир ити ыйааһын аайы 16-лыы кыттааччыны толорон биэриэхтээхтэр. Онон түмүккэ биһигиттэн түөрт эрэ бөҕөс буолумуон сөп.

Россия быйылгы чемпионата ыытыллар сүрүн сыала диэн, ахсынньы ыйга Сербия – Белград куоратыгар буолар аан дойду чемпионатыгар дойду хамаандатын сүүмэрдээһин буолар. Ол эрээри, аан дойдубут буолара дуу, буолбата дуу, эбэтэр ханнык таһымҥа ыытыллара эмиэ чуолкай быһаарылла илик.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *