Көҥүл тустууга Олимпиадаҕа сүүмэрдээһин: Мэлийии

Болгария киин куоратыгар Софияҕа, көҥүл тустууга Олимпиадаҕа сүүмэрдиир бүтэһик быһаарыылаах аан дойдутааҕы турнир ыытылла турар. Бу улахан эппиэттээх түһүлгэҕэ биһигиттэн эрдэ иһитиннэрбиппит курдук, биэс уолбут кыттар. Хомойуох иһин, кинилэр туруоруллубут сыалларын-соруктарын ситиспэтилэр.

Маҥнайгынан көбүөргэ саамай ыарахан ыйааһынҥҥа соторутааҕыта Азия чемпионатыгар иккис миэстэлэммит Айаал Лазарев таҕыста. Кини утарсааччыта – Азия чемпионатын хас да төгүллээх призера, аан дойду чемпионатыгар бэһис буола сылдьыбыт опыттаах тустуук Сумит.

Сүрдээх тыҥааһыннаахтык барбыт хапсыһыыга биһиги бухатыырбыт, хапсыһыы бүтэрэ 20-чэ сөкүүндэ хаалыар диэри 2:1 ахсаанынан хотон иһэн, атаҕыттан ылларан көбүөр таһыгар таһааттаран кэбиһэн, ахсааны (2:2) тэҥнэтэн кэбистэ. Онон, баалы кэнники ылбыт киһи быһыытынан кыайыылааҕынан индус буолла. Тустууну көрдөххө, Айаал ааспыттааҕытын курдук буолбатах, ханныгын да иһин, эчэйиитин ситэ үчүгэйдик оһоруммакка киирэн, баар кыаҕынан тустубата диэххэ сөп.

Салгыы аны Владислав Андреев (57 кг) – 23-гэр диэри саастаахтарга аан дойду икки төгүллээх кыайыылааҕа кубинец Андреу Ортегаҕа 2:5 ахсаанынан хотторон кэбистэ.

Онтон Европа иллэрээ сыллааҕы призера Владимир Егоров (57 кг) Испанияттан кыттар грузин Леван Метревелины, оттон Николай Охлопков (65 кг) доминиканец Рудесиндоны – үтүктүспүт курдук атахтаан түһэрэн баран, накатка эргитэлээн, хапсыһыыны болдьоҕун иннинэ очукуонан ыраастык кыайдылар.

Ол эрээри, салгыы күрэхтэһиигэ Николай Охлопков уонна Владимир Егоров – аан дойду чемпионнара Бека Ломтадзеҕа (Грузия), Юки Такахашига (Япония) туһааннааҕынан 1:4, 0:11 ахсааннарынан хотторон кэбистилэр.

Биир эрэммит бөҕөспүт Ньургун Скрябин – опыттаах Магомедмурад Гаджиевы (Польша) маҥнай утаа атаҕыттан ылан умса көтөн баран, бэйэтин таптаан туттар албаһыгар (Милз рычага) киллэрэ сатаата да, кыайбата. Салгыы тустууга Гаджиев икки төгүл иккилии баалы ылан, 4:2 ахсаанынан хотон таҕыста.

Онон, төһө эмэ «уоскутар» бөлөххө киирэн тустар балаһыанньа баарын үрдүнэн, Олимпиадаҕа кыттар бырааптан маттыбыт. Тоҕо диэтэххэ, путёвканы – финалга тахсыбыттар эрэ ылаллар.

Финалга тахсар иһин хапсыһыылар:

57 кг

Юки Такахаши (Япония) – Рейнери Ортега (Куба)

Георгий Эдишерашвили (Азербайджан) – Бехбаяр Эрдэнебат (Монголия).

65 кг

Давит Хабат (Словения) – Георгиос Пилидис (Греция)

Джордан Оливер (АХШ) – Магомедмурад Гаджиев (Польша).

74 кг

Василь Михайлов (Украина) – Митчелл Фенисилвер (Израиль)

Таймураз Салказанов (Словакия) – Магомедхабиб Кадимагомедов (Беларусь).

86 кг

Збигнев Барановски (Польша) – Сосуке Такатани (Япония)

Абубакар Абубакаров (Азербайджан) – Борис Макоев (Словакия).

97 кг

Абрахам Коньедо (Италия) – Ахмед Батаев (Болгария)

Валерий Андрейцев (Украина) – Альберт Саритов (Румыния).

125 кг

Сергей Козырев (Россия) – Даниэль Лигети (Венгрия)

Хосе Диас (Венесуэла) – Сумит Сумит (Индия).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *