Көҥүл тустууга Олимпиадаҕа сүүмэрдээһин: Эрэлбит ситтэрбэтэ

Болгария киин куоратыгар көҥүл тустууга бүтэһик, Токиотааҕы Олимпиадаҕа сүүмэрдиир квалификационнай турнир түмүктэннэ. Хомойуох иһин, биһиги бөҕөстөрбүт сыалларын-соруктарын ситиспэтилэр.

Олимпиадаҕа сүүмэрдиир күрэхтэһиини сайтпытыгар http://dzulurgan.ru салгыы билиһиннэрдэххэ, «уоскутар» бөлөххө үс уолбут киирбитэ эрээри, Владимир Егоров (57 кг) тоҕо эрэ көбүөргэ тахсыбата. Кини румын Ризван Коваһы кытта тустуохтаах этэ.

Ньургун Скрябин (65 кг) – сэрэйбит курдук австриеһы тулуппата. Бэйэтэ сөбүлээн туттар албаһыгар (Милз рычага) киллэрэн, ыраас кыайыыны ситистэ. Салгыы 61 киилэҕэ аан дойду чемпиона буола сылдьыбыт, бу күрэхтэһиигэ Владимир Хинчегашвили оннугар кэлбит Бека Ломтадзены (Грузия) 6:4 ахсаанынан баһыйа тутта. Онон финалга үһүс миэстэни былдьаһыыга АХШ чемпиона Джордан Оливеры кытта тустуохтаах этэ да, киһитэ туста тахсыбата.

Онон Ньургун Скрябин (тренерэ Гаврил Игнатьев) турнир үһүс призёрунан буолан – мэтээлинэн, сибэкки дьөрбөтүнэн уонна сертификатынан наҕараадаланна.

Оттон Айаал Лазарев (125 кг) «уоскутар» бөлөххө бастаан молдован Александр Романовы (UFC байыаһа) эмиэ бэйэтин, таптаан туттар албаһыгар (кууһан ылан халбарыйыы) киллэрэн, ыраастык уурда. Салгыы киирсиигэ таджик Искандарины 9:6 ахсаанынан кыайан иһэн эмиэ ыраастык уурда. Оттон турнир боруонса мэтээлин ким ыларын быһаарсыыга венесуэлец Диаһы 6:5 ахсаанынан хотто.

Онон Айаал Лазарев (тренерэ Иван Сивцев) пьедестал үһүс үктэлигэр таҕыста.

Бу күн уолаттарбыт сэргэхтик туһуннулар. Оо, ылан көрдөххө, олимпийскай путёвкаттан чуут маттылар. Кыра тиийбэтэ. Этэргэ дылы, эрэлбит ситтэрбэтэ. Дьиҥэ, Скрябин – Гаджиевы, Лазарев – Сумиты кыайар түгэннээх этилэр диэн санаа билигин да баттыыр. Оо, арай диирбитигэр эрэ тиийэбит. Ньургун «кириэстээбит» буоллун, Айаал атахха киллэттэрэн астарбатах буоллун… Дьэ, кыһыы.

Биһиги уолаттарбыт ити утарсааччыларыттан туохтарынан да хаалсыбаттар ээ. Боруоста, түһүлгэ тосхойбото диэххэ сөп.

Бу күрэхтэһии сүрүн соруга олимпийскай путёвка иһин тустуу этэ. Ол иһин, финал аҥарынааҕы хапсыһыылар саамай тыҥааһыннаах, быһаарыылаах буолбуттара. Оттон, финалга тахсыбыттар, путёвка ылбыттар сыалларын-соруктарын толорбут дьон быһыытынан – тустубатылар. Арай, 57 киилэҕэ Такахаши уонна Бехбаяр биир түһүмэҕи туһуннулар. Онуоха 1:0 ахсаанынан (сэрэтиинэн) японец инникилээн испитэ. Ол эрээри, тохтобул кэмигэр монголлар сүбэлэһэн баран, салгыы тустартан аккаастаннылар. Ол иһин, кыайыы Такахашига бэрилиннэ. Атын финаллар тустуута суох быһаарылыннылар.

Онон, түмүктээн эттэххэ, тустууга Олимпиадаттан маттыбыт. Уопсайынан, бу олимпийскай циклга үлэ түмүгүнэн туһааннаах тэрилтэлэр, салайааччылар – СР физическэй культураҕа уонна спорка министерствота, СР спортивнай тустууга федерацията таах хаалларбакка – сөптөөх түмүктэри, ырытыыны, сыанабылы оҥостоллоро, бэйэлэригэр ирдэбилээхтик сыһыаннаһаллара көһүтүллэр. Туох кыаллыбата? Сыыстарыы туохха таҕыста? Инникитин хайдах дьаһанан үлэлиэххэ?

Оттон эһиги, тустууну таптааччылар туох дии саныыгытый?

Турнир түмүк көрдөрүүтэ:

57 кг: 1. Юки Такахаши (Япония), 2. Бехбаяр Эрдэнебат (Монголия), 3. Тарас Маркович (Украина), 4. Гиви Давидови (Италия), 5. Мухамад Икромов (Таджикистан).

65 кг: 1. Магомедмурад Гаджиев (Польша), 2. Георгиос Пилидис (Греция), 3. Вбер Куэро Муньос (Колумбия), 3. Ньургун Скрябин (Беларусь), 5. Давид Хабат (Словения), 5. Джордан Оливер (АХШ).

74 кг: 1. Магомедхабиб Кадимагомедов (Беларусь), 2. Василь Михайлов (Украина), 3. Митчелл Финесильвер (Израиль), 3. Таймураз Салказанов (Словакия), 5. Аймар Андрусе (Эстония), 5. Арсалан Будажапов (Кыргызстан).

86 кг: 1. Сосуке Такатани (Япония), 2. Борис Макоев (Словакия), 3. Збигнев Барановски (Польша), 3. Абубакр Абакаров (Азербайджан), 5. Таймураз Фриев (Испания), 5. Вилле Хейно (Финляндия).

97 кг: 1. Абрахам Коньедо Руано (Италия), 2. Альберт Саритов (Румыния), 3. Эрик Тилле (Германия), 3. Радослав Баран (Польша), 5. Ахмед Батаев (Болгария), 5. Валерий Андрейцев (Украина).

125 кг: 1. Сергей Козырев (Россия), 2. Сумит Сумит (Индия), 3. Роберт Баран (Польша), 3. Айаал Лазарев (Кыргызстан), 5. Даниэль Лигети (Венгрия), 5. Хосе Даниэл Диас Роберти (Венесуэла).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *