Көҥүл тустууга Кунаев кэриэһигэр

Сэтинньи 23-25 күннэригэр Казахстан Тараз куоратыгар Динмухамед Кунаев кэриэһигэр көҥүл тустууга норуоттар икки ардыларынааҕы турнир ыытыллар. Турнир бириискэ фондата 75000$: бастакы миэстэҕэ 4000$, иккис миэстэҕэ 2000$, үһүс миэстэҕэ 500$, кыайыылаах тренеригэр 500$ харчынан бириистэр туттарыллыахтара.

Күрэхтэһии бастакы күнүгэр 57, 61, 74, 79, 97 кг ыйааһыннаахтар тустуохтара. Ол курдук, 57 киилэҕэ Саха сириттэн Быйаман Яковлев, Арыйаан Тютрин, Фёдор Постников. 61кг — Пётр Павлов, Айтал Захаров, Эдуард Григорьев, Ньургун Александров, Семён Владимиров.

Ааспыт өрөбүллэргэ Румынияҕа ыытыллыбыт 23-гэр диэри саастаахтарга аан дойду чемпионатыгар Владимир Егоровка, Николай Охлопковка ыалдьыбыппыт курдук, бары тутуспутунан биир дойдулаахтарбыт ситиһиилээхтик тусталларын туһугар санаабытын түмүөҕүҥ.

57 киилэҕэ 22 бөҕөс сэрэбиэйи ааспыт. Манна сүрүннээн Казахстан, Кыргызстан, Узбекистан, Белоруссия, Таджикистан, Россия бөҕөстөрө күөн көрсүөхтэрэ. Ол курдук, Быйаман Яковлев киргиз Арстанбектыын, Арыйан Тютрин Россия призера бурят Жалсаповтыын, Федор Постников казах Примбаевтыын тустуохтара.

Оттон иккис ыйааһыҥҥа кыттааччылар эмиэ 22-лэр. Куһаҕана диэн, бу ыйааһыҥҥа кыттар уолаттарбыт бары биир бөлөххө түбэспиттэр. Ким үчүгэй бэлэмнээх – ол кыайдын!

Турнир бырагыраамата (Дьокуускай бириэмэтэ)

Сэтинньи 23 күнэ, бээтинсэ

13:30-17:00 57, 61, 74, 79, 97 кг ыйааһыннарга быраллааһын хапсыһыылар.

17:00-17:30 65, 70, 86, 92, 125 кг ыйааһыннаахтар ыйааһыннаныылара.

21:00-23:00 57, 61, 74, 79, 97 кг ыйааһыннарга финалга тахсар иһин киирсиилэр.

Сэтинньи 24 күнэ, субуота

13:30-17:00 57, 61, 74, 79, 97 кг ыйааһыннарга “уоскутар” бөлөх тустуулара.

13:30-17:00 65, 70, 86, 92, 125 кг ыйааһыннарга барыллааһын хапсыһыылар.

21:00-22:00 65, 70, 86, 92, 125 кг ыйааһыннарга финалга тахсар иһин киирсиилэр.

22:00-23:00 57, 61, 74, 79, 97 кг ыйааһыннарга финаллар.

Сэтинньи 25 күнэ, баскыһыанньа

13:30-16:00 65, 70, 86, 92, 125 кг ыйааһыннарга “уоскутар” бөлөх тустуулара.

18:00-21:00 Финаллар, кыайыылаахтары наҕараадалааһын.

Петр ПАВЛОВ.

 

Добавить комментарий

Ваш адрес email не будет опубликован.