“Көмүс мас” бастакы күнүн кыайыылаахтара быһаарылыннылар

Манчаары аатынан спорт төрүт көрүҥнэригэр «Модун» республикатааҕы кииҥҥэ мас-рестлиҥҥэ «Көмүс мас» диэн Дьокуускай куорат аһаҕас чемпионатын бастакы күнэ түмүктэннэ.

Аһаҕас чемпионакка 20 хамаанда (Уус Алдан, Модун, Хаҥалас, Т.Г. Десяткин аатынан ЯПТ, Муома, ХИФУ, Сунтаар, Чурапчы, АГАТУ, Ньурба, Нам, Хатас, Үөһээ Бүлүү, Горнай, Мэҥэ Хаҥалас, Амма, Ленскэй, Бүлүү, Кэбээйи, Таатта) мадьынылара: эр дьон уонна бэтэрээннэр күөн көрүстүлэр.

Түһүлгэ үөрүүлээх аһыллыытыгар Дьокуускай куорат баһылыгын эбээһинэһин толорооччу Евгений Григорьев, Саха сирин мас-рестлиҥҥэ федерациятын президенэ Геннадий Васильев, аһаҕас чемпионат кылаабынай судьуйата Дмитрий Шарин – маннык түһүлгэни көҕүлээбит, тэрийбит Дьокуускай куорат физическэй култуураҕа уонна спорка управлениетын салалтатыгар махталларын биллэрдилэр, күрэхтэһии кыттыылаахтарын эҕэрдэлээтилэр, ким үчүгэй бэлэмнээх, ким кыайыыга дьулуурдаах кыайарыгар баҕардылар.

Пандемия кэмэ буолан, күрэхтэһии көрөөччүтэ суох ыытылла турар. Итиэннэ күрэхтэһии балаһыанньатыгар эмиэ уларыйыылар киирдилэр. Ол курдук, урукку сылларга финаллар иккис күҥҥэ ыытыллар эбит буоллахтарына, билигин биир сиргэ элбэх киһини мунньубат инниттэн, ыйааһыннарга финаллары икки күҥҥэ арааран ыыталлар. Онон бүгүн эр дьоҥҥо – түөрт, бэтэрээннэргэ – икки ыйааһыннарга кыайыылаахтар уонна призердар быһаарылыннылар.

Бэрт тыҥааһыннаах, хатыһыылаах тардыһыылар буоллулар. Уруккуттан биллэр, ааттаах-суоллаах мадьынылары тэҥэ эдэрдэр баалларын, күүстээхтэрин биллэрдилэр. Ол курдук, Муома ыччата, 19 саастаах Руслан Соловьев 60 киилэҕэ финалга тиийиитэ соһуччу соҕус буолла. Эдэр уол бэйэтиттэн аҕа саастаах утарсааччыларын баһыйан иккис миэстэҕэ тахсыыта, улахан ситиһии диэххэ сөп. Финаллар бары да бэрт сытыытык бардылар. Биир бэйэм Семен Ануфриев, Семен Готовцев, Дмитрий Устинов кыайаллара буолуо дии санаабытым, дьонум иккис миэстэнэн дуоһуйдулар. Ити, чемпионат бэрт тыҥааһыннаахтык, сытыытык бара турарын туоһулуур.

Аһаҕас чемпионат хаамыытын биллиилээх спортивнай комментатор Илья Скрябин кэпсээн-ипсээн, киирсээччилэри сиһилии билиһиннэрэн, түһүлгэ таһымын лаппа үрдэттэ диэххэ сөп.

Аны сарсын, эр дьоҥҥо – 65, 75, 90, 105-тэн үөһэ кг, бэтэрээннэр – 75, 85-тэн үөһэ кг кыттыылаахтара ким күүстээҕин быһаарсыахтара. Күрэхтэһии сарсыарда 10 чаастан саҕаланар. Чемпионат хаамыытын ютуб канаалга көрүөххүтүн сөп.

Бастакы күн түмүгэ маннык буолла  

Эр дьоҥҥо:

60 кг 1. Павел Кычкин (Мэҥэ Хаҥалас), 2. Руслан Соловьев (Муома), 3. Руслан Сивцев (Ньурба).

70 кг 1. Айсиэн Мигалкин (Уус Алдан), 2. Всеволод Протопопов (Бүлүү). 3. Михаил Емельянов (Мэҥэ Хаҥалас).

80 кг 1. Андрей Тихонов (Сунтаар), 2. Семен Ануфриев (Уус Алдан), 3. Алексей Куприянов (АГАТУ).

105 кг 1. Данил Моисеева (Модун), 2. Семен Готовцев (Уус Алдан), 3. Василий Сивцев (Мэҥэ Хаҥалас).

Бэтэрээннэргэ:

65 кг 1. Дмитрий Сергучев, 2. Дмитрий Устинов (иккиэн – Мэҥэ Хаҥалас). 3. Петр Соломонов (Хаҥалас).

85 кг 1. Власий Семенов (Бүлүү), 2. Николай Попов (Мэҥэ Хаҥалас), 3. Егор Данилов (Кэбээйи).

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *