Көбүөр күүстээхтэри быһаарда

Валерий Петрович Керемясов аатынан Дьокуускай куорат көҥүл тустууга аһаҕас чемпионата 126 бөҕөһү түмтэ. Киин куорат бөҕөстөрүн тэҥэ, “Кыайыы 50 сыла” Спорт дыбарыаһыгар тэлгэммит икки көбүөрүнэн Чурапчы уонна Нам тустууктара эмиэ кытыннылар.

Биирдиилээн ыйааһыннары кылгастык билиһиннэрдэххэ, 57 киилэҕэ бэҕэһээ сэрэбиэйи ааспыт республика быйылгы чемпиона Федор Постников иккис ыйааһыҥҥа киирбит. Маннык балаһыанньаҕа сэрэйбит курдук, тэҥ таһымнаах эдэр уолаттар ким күүстээҕин бэйэлэрэ быһаарыстылар. Онуоха Игорь Петров биэс утарсааччытын хотон чемпион аатын ылла. Сыыстарбат буоллахпына, кини Дьокуускай куорат икки төгүллээх чемпионунан буолла. Наҕараадалааһыҥҥа киниэхэ Керемясовтар дьиэ кэргэн бириис быһыытынан МР-155 булт саатын туттардылар.

61 киилэҕэ көһүтүллүбүтүн курдук, сытыы хапсыһыылар буоллулар. Россия чемпионатын үс төгүллээх боруонса призера Арыйаан Тютрин утуу-субуу М.Васильевы, Б.Яковлевы, Ф.Постниковы, С.Владимировы уонна финалга В.Эспегы кыайталаан, чемпионнаата. Күрэхтэһии инниттэн “Владимиров кыайар дуу, Тютрин дуу?” диэн күүркэтиилээх санаалар бааллара. Ону көбүөр быһаарда, финалга тахсар иһин киирсиигэ Тютрин утарсааччытын 5:3 ахсаанынан хотто.

65 кг ыйааһыҥҥа эмиэ тыҥааһыннаах киирсиилэр буоллулар. Балаҕан ыйыгар Бразилияҕа ыытыллыбыт устудьуоннарга аан дойду чемпиона буолан кэлбит Эдуард Григорьев үчүгэй тустар таһымыгар сылдьарын көрдөрдө. Этэргэ дылы, кими да үрүҥ хараҕын өрө көрдөрбөтө, эрэллээхтик кыайталаата. Республика сүүмэрдэммит хамаандатын чилиэннэрэ, байыаннайдарга аан дойду чемпионатын боруонса призера Дмитрий Аксеновы финалга тахсар иһин киирсиигэ уонна норуоттар икки ардыларынааҕы кылаастаах спорт маастара Ньургун Александрову финалга улаханнык илистибэккэ кыайталаата.

70 киилэҕэ сэрэбиэйи көрөн баран, уопуттаахтарын быһыытынан Дьулустаан Булатов, эбэтэр Револий Самсонов бастыахтарын сөп эбит диэн сылыктаабытым. Ол эрээри, финал чиэппэригэр Булатов соһуччу, тренер Герман Контоев иитиллээччитэ, Д.П. Коркин турнирыгар 61 киилэҕэ бэһис буолбут Николай Ивановка 4:8 ахсаанынан хотторон кэбистэ. Онон пьедестал үһүс үктэлигэр тахсыбыта баһыыба буолла.

Оттон Револий Самсонов утарсааччыларын илиилээх-атахтаах оҥортообото, төһө да бу түһүлгэҕэ бэйэтин сөбүлээн туттар “пистолет” диэн албаһын туттубатаҕын үрдүнэн, эрэллээх тустууну көрдөрдө.

74 киилэҕэ эмиэ соһуччу көрдөрүү буолла. Киһи эрэ барыта улаханнык эрэммит бөҕөһө, республика хас да төгүллээх чемпиона Константин Власов төрдүс эргииргэ Иван Барашковтыын тустуутугар илиитигэр эчэйии ылан, күрэхтэһииттэн туораата. Оттон бүтэһик быһаарыылаах хапсыһыыга Иван Ефремов – Барашковы “промакашка” диэн албаһынан суулуу тутан кэбиһэн, ыраастык кыайда.

79 киилэҕэ норуоттар икки ардыларынааҕы кылаастаах спорт маастара Герман Устинов тоҕо эрэ суруйтаран баран, көбүөргэ туста тахсыбыта. Бу ыйааһыҥҥа республика чемпионатын призера Айсен Копырин бастаата. Финалга кини уруккута биллиилээх мадьыны Григорий Барашков (Чурапчы) уола Григорийы 13:3 ахсаанынан ыраастык кыайда.

92 кг ыйааһыҥҥа кыттааччы аҕыйах буолан, эмиэ эргиир систиэмэтинэн ыытыллыбыт киирсиилэргэ – норуоттар икки ардыларынааҕы кылаастаах спорт маастара Кузьма Сивцев түөрт утарсааччытын кыайан баран, наҕараадатын даҕаны ылбакка Циркаҕа ыытыллар хапсаҕай түһүлгэтигэр ыстанна…

97 киилэҕэ бастаан-утаа икки кыттааччы баара, ол эрээри, бүтэһик түгэҥҥэ Тываттан ыҥырыынан хапсаҕайдаһа кэлбит Субудай Шойдун күрэхтэһиигэ киллэрилиннэ. Кини бастаан Сергей Семеновка хотторон баран, эдэр уол Виктор Борисовы хотон, иккис миэстэҕэ таҕыста.

125 киилэҕэ эдэр уолаттар Никита Хабаров уонна Эдуард Максимов инникитин дьаныардаахтык дьарыктаннахтарына, тахсыылаахтык тустууһуктар диэн санааҕа кэллим.

Чэ, тутатына ыксалынан суруйдахха итинник.

Дьокуускай куорат көҥүл тустууга аһаҕас чемпионатын түмүгэ:

57 кг (30 кыттааччы): 1. Игорь Петров (ОЭУ), 2. Дьулус Федотов, 3. Дьулус Неустроев (иккиэн – Чурапчы) уонна Уйгулаан Иванов (ОЭУ).

61 кг (24): 1. Арыйаан Тютрин, 2. Виталий Эспек (иккиэн – ШВСМ, ХИФУ), 3. Юрий Сивцев (ОЭУ) уонна Семен Владимиров (ШВСМ, ХИФУ).

65 кг (26): 1. Эдуард Григорьев (Чурапчы), 2. Ньургун Александров, 3. Петр Павлов уонна Дмитрий Аксенов (үһүөн – ШВСМ, ХИФУ).

70 кг (19): 1. Револий Самсонов (ШВСМ, Чурапчы), 2. Николай Иванов (ШВСМ), 3. Дьулус Булатов (ШВСМ, ХИФУ) уонна Николай Захаров (Чурапчы).

 

74 кг (7): 1. Иван Ефремов, 2. Иван Барашков (иккиэн – ШВСМ, ХИФУ), 3. Алексей Захаров (Чурапчы).

79 кг (7): 1. Айсен Копырин (ШВСМ, ТХГА), 2. Григорий Барашков (Чурапчы), 3. Ньургустаан Брощев (ОЭУ).

86 кг (4): 1. Александр Филиппов (ОЭУ), 2. Алексей Мигалкин (ШВСМ, ХИФУ), 3. Харысхан Николаев (ОЭУ).

92 кг (5): 1. Кузьма Сивцев (Нам), 2. Николай Алексеев (ШВСМ, ХИФУ), 3. Семен Аммосов (Чурапчы).

97 кг (3): 1. Сергей Семенов (Нам), 2. Субудай Шойдун (Тыва), 3. Виктор Борисов (ОЭУ).

125 кг (3): 1. Никита Хабаров, 2. Эдуард Максимов (иккиэн – ОЭУ), 3. Ион Болтунов (ШВСМ, ХИФУ).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *