Көбүөргэ түспүт көмүс көлөһүн

…Киһи олоҕун ортоку омурҕаныгар үктэниитэ кимиэхэ баҕарар эмиэ да үөрүүлээх, эмиэ даҕаны курус түгэн. Эдэр сааһын спорка анаабыт киһи бар дьонугар туох өйдөбүлү, ханнык суолу-ииһи, кыайыыны-хотууну ситиспитин ырытан көрөр, бэйэтигэр сыана бэринэр тоҕоостоох кэмэ.

Биллиилээх бөҕөс Андрей Яковлев оҕо сааһа Уус Алдаҥҥа, Дүпсүҥҥэ ааспыта. Дүпсүн сирэ былыр-былыргыттан ат бөҕө, кус быһый дьонунан аатырар буолан, спорт манна наһаа биһирэнэр. Дүпсүнтэн элбэх биллиилээх спортсменнар үүнэн, сириэдийэн тахсыбыттара. Кинилэр дьоһуннаах кыайыыларыгар умсугуйан, Андрей спорка бастакы хардыытын ситиһиилээхтик саҕалаабыта. Ол курдук, Дүпсүн нэһилиэгин ыһыаҕар, кыра саастаах уолаттар хапсаҕайга күрэхтэһиилэригэр бастакы миэстэҕэ тахсан, маҥнайгы наҕараадатын ылан үөрбүтүн-көппүтүн, төрөппүттэрин астыннарбытын умнубат. Мантан сылтаан, оройуоннааҕы оҕо спортивнай оскуолатын Дүпсүннээҕи филиалыгар ССРС спордун маастара Николай Романович Крылов салалтатынан дьарыктанан, тустуу кистэлэҥнэригэр үөрэммитэ. Сотору оройуон, республика биир кэскиллээх бөҕөһө буола үүнэн тахсыбыта. Орто оскуоланы 1985 сыллаахха Бороҕоҥҥо бүтэрбитэ.

Тустуук Андрей Яковлев аата аан бастаан 1988 с. республика чемпионатыгар дорҕоонноохтук дуорайбыта. Итиннэ кини 62 кг бүтэһик быһаарыылаах хапсыһыытыгар тустуу эйгэтигэр номнуо киэҥник биллибит-көстүбүт маастар Михаил Корякины кылбардык кыайан, бастакы дьоһун ситиһиини суруммута.

 

 

 

 

 

 

 

 

 

 

 

 

“Бүргэһи хааһахха кистээбэккин” диэн мээнэҕэ эппэттэр. Мантан салгыы Андрей Яковлев хонноҕо аһыллан, Россияҕа тиийэ биллэр буола үүммүтэ. Элбэх ахсааннаах кыайыыларыттан быһа тутан билиһиннэрдэххэ маннык:

1992 с. Д.П. Коркин кэриэһигэр “Саха сирин көмүс кура” норуоттар икки ардыларынааҕы турнирга – бастакы миэстэ.

1993 с. Монголиятааҕы “Монгол Гоби” норуоттар икки ардыларынааҕы турнирга – үһүс миэстэ.

1995 с. Россия чемпионатыгар – алтыс миэстэ.

1997 с. Турцияҕа Яшар Догу мемориалыгар – иккис миэстэ.

1998 с. Красноярскайга Иван Ярыгин турнирыгар – иккис миэстэ.

1998 с. АХШ-ка Аан дойду Кубогар хамаанданан бастакы миэстэ.

Маны тэҥэ Уус Алдан хамаандата Н.Н. Тарскай бирииһигэр Саха сирин көҥүл тустууга чемпионатыгар кыайарыгар бэйэтин дьоһун кылаатын киллэрсибитэ. Ол курдук, 1988, 1990, 1991, 1995, 1996 – чемпион, 1994, 1997, 2000, 2002 – иккис призер, 1989, 1999 – үһүс призер. Оттон хапсаҕайга республика үс төгүллээх Муҥутуур кыайыылааҕа, ону тэҥэ Манчаары спартакиадатыгар эмиэ үстэ бастаабыта.

Аны бөҕөс быһыытынан бэйэтин кэмигэр, кэлин аан дойдуга киэҥник биллибит Адам Сайтиевы (олимпийскай чемпион), Гаджи Рашидовы (Европа чемпиона), Сергей Кирилловы (Россия чемпиона), иранец Аббас Хаджи Кенарины (аан дойду чемпиона), турок Мухарем Демирели (Европа чемпионатын призера), уо.д.а. дьоһун ааттаах-суоллаах бөҕөстөрү сирэй көрсөн кыайбыттаах.

 

 

 

 

 

 

 

 

 

 

 

 

 

Биир сэһэргэһиигэ Андрей, күрэхтэһэрин тохтотон баран, хапсаҕайы-көҥүл тустууну тэнитэр, салгыы сайыннарар спортивнай кулууп тэриниэн баҕарарын быктарбыта. Бар дьонун, тустууну таптааччылар өйөбүллэринэн ити баҕа санаата олоххо киирэригэр, сотору кэминэн “Андрей Яковлев аатынан спортивнай кулууп” иитиллээччилэрэ бэйэлэрин ситиһиилэринэн дьону-сэргэни кэрэхсэтэллэрин кэтэһиэҕиҥ.

2004 сыллаахха Бороҕоҥҥо, саха спордун аҕатынан билиниллибит Н.Н. Тарскай кэриэһигэр республика көҥүл тустууга биирдиилээн уонна хамаанданан бастыыр иһин чемпионатын кэмигэр биллиилээх бөҕөс, көҥүл тустууга ССРС, хапсаҕайга Саха сирин спортарын маастара Андрей Вячеславович Яковлевы улахан спортан үөрүүлээхтик атаарыы тэриллибитэ. Киниэхэ Уус Алдан улууһун Бочуоттаах гражданина аат иҥэриллибитэ…

Петр ПАВЛОВ.

Добавить комментарий

Ваш адрес email не будет опубликован.