Күүппүт хапсыһыыларбыт ыытыллыбат буолбуттар

Ахсынньы 15-16 күннэригэр Дагестан Каспийскай куоратын Али Алиев аатынан Спорка дыбарыаһыгар бойобуой самбоҕа аан дойду чемпионата ыытыллар. Чемпионат чэрчитинэн тэрийээччилэр билиҥҥи кэм күүстээх бөҕөстөрүн түмэн дьоҕус күрэхтэһии оҥорорго былааннаабыттара.

Ол курдук, 74 киилэҕэ тустар көҥүл тустууга аан дойду, этэргэ дылы, буруолуу сылдьар чемпионнара Магомедрасул Газимагомедов, Заурбек Сидаков уонна кинилэр сүрүн утарсааччылара: олимпийскай чемпион Джордан Барроуз, аан дойду чемпиона, Олимпиада призера Франк Чамизо икки ардыларыгар хапсыһыылары тэрийээри, кинилэргэ ыҥырыы ыыппыттара.

Бу хапсыһыылар түмүктэринэн кыайыылаахтар кырата суох харчынан бирииһинэн наҕараадаланаллар диэн суруйбуттара. Ол курдук, кыайыылаах – 20 тыһ. доллар, иккис миэстэлээх – 10 уонна үһүстээбит бөҕөстөр – 5-тии американскай доллары ылыахтаахтара.

Ол эрээри, бу тэрээһин биллэриллэн баран, ситэ-хото сырдатыллыбатын иһин бэҕэһээ Дагестаҥҥа, биир идэлээхпэр, wrestdag.ru сайт кылаабынай редактора, биллиилээх спортивнай суруналыыс Мурад Канаевтыын сибээстэһэ сылдьыбыппар, киһим маннык эттэ: “Привет, Петр! Мы об этом не сообщали, потому что, эта идея изначально была обречена. Турнира не будет», — диэн.

Онон кэтэспит хапсыһыыларбыт буолбат буолбуттар. Барроуз уонна Чамизо эчэйиилээхпит диэн, аккаастаабыттар. Ону тэрийээччилэр күрэхтэһии бириискэ фондатын 100 тыһ. долларга диэри улаатыннаран биэрбиттэрин үрдүнэн, Барроуз уонна Чамизо сөбүлэспэтэхтэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *