Күрэхтэһии судьуйата сиэрдээхтик үлэлиэхтээх

Муус устар 23 күнүгэр Бэрдьигэстээххэ XXI Манчаары оонньууларыгар бэлэмнэнии бырагырааматын чэрчитинэн күрэхтэһии кылаабынай судьуйата Семен Говоров, Өрөспүүбүлүкэтээҕи Манчаары аатынан спорт национальнай киинин дириэктэрин солбуйааччы Иван Борисов, спортивнай тэрээһиннэри ыытар салаа начаалынньыга Анжела Сивцева – Горнай улуус баһылыгын Никита Андреевы кытары көрүстүлэр.

Сүбэ мунньахха Манчаары оонньууларын ат сүүрдүүтүгэр, остуол оонньууларыгар ыстаарсай судьуйалар Татьяна Копылова, Анжела Андросова, төрүт ох саанан ытыы федерациятыттан Борис Олесов олохтоох тренердэри, эппиэтинэстээх дьону кытары кэпсэттилэр. Спортивнай тэрээһиннэр ыытыллыахтаах объектарын көрдүлэр.

Көрсүһүүгэ элбэх санаа этилиннэ. Хабылык, хаамыска көрүҥнэрэ, ох саанан ытыы көрүҥнэрэ ханна ыытыллара чопчуланна. Күрэхтэһии сиэрдээхтик, мөккүөрэ суох барарын, хамаандалар тэрээһин хайысхатыгар бырачыас түһэрбэттэрин туһугар судьуйалар бары кыһамньыларын ууруохтаахтар диэн, тэрээһин кыттыылаахтара биир санааны эттилэр.

Манчаары оонньуулара – Сахабыт сирин спордун бырааһынньыга буоларын быһыытынан, көрөөччүлэргэ сөптөөх усулуобуйа тэриллэригэр сүрүн үлэ туһаайыллыахтаах. Кинилэр күрэхтэһиилэри мэһэйэ суох көрөллөрүгэр, биир да түгэни мүччү туппака, спортсменнар киирсиилэриттэн дуоһуйан, санаалара көтөҕүллүөхтээх диэн бэлиэтээтилэр.

Вячеслав АЛЕКСЕЕВ.

Горнай.

Добавить комментарий

Ваш адрес email не будет опубликован. Обязательные поля помечены *