Күрэхтэһии иккис күнүн түмүгэ

Румыния киин куоратыгар Бухарестка 23 саастарыгар диэри бөҕөстөр аан дойдуга биирдиилээн уонна хамаанданан бастыыр иһин күрэхтэһиилэрэ үс күнү быһа ыытыллан дьэ түмүктэннэ. Бу түһүлгэҕэ саха тустуутун кыһатыттан икки бөҕөспүт: Владимир Егоров Македонияттан, Николай Охлопков Румынияттан кыттыыны ыллылар. Ол туһунан dzulurgan.ru сайт тутатына сиһилии сырдатта дии саныыбын.

Онон биһиги, тустууну таптааччылар бу күннэргэ эмиэ да хотторуу хомолтотугар, эмиэ даҕаны кыайыы дуорааныгар куустаран, күө-дьаа буоллубут. Аныгы сайдыылаах олоххо дьиэбитигэр олорон, түүннэри-күнүстэри интэрниэт көмөтүнэн хапсыһыылары быһа биэриигэ көрөн дуоһуйдубут. Этэргэ дылы, “сэттэтэ истибиттээҕэр, биирдэ көрбүт ордук буоллаҕа!”

Үчүгэйэ диэн, кураанах хаалбатыбыт. Николай Охлопков күрэхтэһии боруонса мэтээлин ылан, сэргэхситтэ да, үөртэ даҕаны. Кини таһымнаах тустуук диэн өссө төгүл бэлиэтиибин. Румыния гражданствотын ыларыгар элбэх бириэмэтин сүтэрэн, спорт, чуолаан тустуу эйгэтигэр этиллэринии, күрэхтэһиитэ, объема кыратык тиийбэтэ. Дьэ, аны мантан ыла төлө баран, элбэхтик күрэхтэстэҕинэ, таһымнаах үөрэтэр-эрчийэр түмсүүлэргэ кытыннаҕына, бэйэтин иннигэр улахан сыал-сорук туруоран дьаныһан туран дьарыктаннаҕына – өссө үрдүк көрдөрүүнү ситиһэр кыахтаах.

Күрэхтэһии иккис күнүн быһаарыылаах хапсыһыыларын көрөн баран туох диэххэ сөбүй? Бастатан туран, биэс ыйааһынтан финалга түөрт россиянин тахсан хайдах кытталларын кэтэспиппит. Эрдэттэн сэрэйиллибитин курдук, Россия чемпиона Магомедрасул Идрисов кыахтаахтык бастаата. Өссө, Г.Рашидов оннугар аан дойду чемпионатыгар кини барбыта эбитэ буоллар диэн санаалар күлүм гынан аастылар. Оннук чаҕылхайдык туһунна, кими да үрүҥ хараҕын өрө көрдөрбөтө. Бу күрэхтэһиигэ “Бастыҥ бөҕөс” диэн анал бириис баара эбитэ буоллар, мин Идрисовка биэриэм этэ. Ону эһиги туох дии саныыгытый?

Европа чемпиона Артур Найфоновка эрэммитим. Ол эрээри, финалга иранец Камран Гасемпурдуун сатаан тустубата. Киһитэ тура күүһүнэн аһара баһыйар эбит. Найфонов кыһыйан-абаран туран араастаан киирэ сатаата даҕаны, иранец көмүскэниитин тоҕута солообото. Манна даҕатан эттэххэ, үөһэ ыйааһыннарга кыттар Иран хамаандатын бөҕөстөрө күүс-уох өттүнэн аһара сайдыылаахтар.

Осетин Асланбек Сотиев да бастыан сөптөөҕө. Ол эрээри, кини финалга Азербайджан чиэһин көмүскүүр дагестанец Шамиль Зубаировка күттүөннээх утарсыыны оҥорбото, элбэх баалынан хоттордо.

Оттон төттөрүтүн Азербайджан аатыттан эдэрдэргэ аан дойду чемпиона буола сылдьыбыт дагестанец Саид Гамидов дойдутугар төннөн, бу сырыыга Россия аатыттан бастаата. Американецтар хаһан баҕарар кутталлаахтар. Онон финал иннинэ кыра сэрэхэдийии баара даҕаны, Идрисовтаах Гамидов – утарсааччыларын киһилээбэтилэр.

Хамаанданан түмүккэ Россия 181 очукуолаах бастаата, Грузия (108) иккис, Иран (105) үһүс миэстэлэри ыллылар. Салгыы миэстэлэргэ Япония (93), АХШ (92), Украина (70), Азербайджан (62), Румыния (52) хамаандалара таҕыстылар.

Күрэхтэһии иккис күнүн түмүгэ:

61 кг 1. Магомедрасул Идрисов (Россия), 2. Шон Фаус (АХШ), 3. Николай Охлопков (Румыния), 3. Мингху Лиу (Кытай).
74 кг 1. Автандил Кенчадзе (Грузия), 2. Максим Василиоглу (Румыния), 3. Тимур Бижоев (Россия), 3. Навид Зангане (Иран).
86 кг 1. Камран Гасемпур (Иран), 2. Артур Найфонов (Россия), 3. Ганкхуаг Ганбаатар (Монголия), 3. Мурад Сулейманов (Азербайджан).
92 кг 1. Шамиль Зубаиров (Азербайджан), 2. Асланбек Сотиев (Россия), 3. Богдан Грицай (Украина), 3. Хоссейн Шахбази (Иран).
125 кг 1. Саид Гамидов (Россия), 2. Юсиф Хемида (АХШ), 3. Роланди Андриадзе (Грузия), 3.Амир Тахири (Иран).

Петр ПАВЛОВ.

Добавить комментарий

Ваш адрес email не будет опубликован.