Күрэхтэһии иккис күнүн сэрэбиэйин ырытыы

Дьоллоох Дьокуускай куорат “Триумф” Спорка бэлэмнэнии киинигэр ыытылла турар биһиги улуу тренербит Дмитрий Петрович Коркин кэриэһигэр көҥүл тустууга норуоттар икки ардыларынааҕы XI турнир иккис күнүгэр күрэхтэһиини 61, 70, 79, 92, 125 кг ыйааһыннаах тустууктар саҕалыыллар.

Онуоха иннинээҕи күн ити ыйааһыннарга кыттар бөҕөстөр сэрэбиэйдэрэ ыытыллыбыта. Ол быһыытынан, кылгастык биирдиилээн ыйааһыннарынан сэрэбиэйи ырытан көрдөххө маннык:

61 киилэҕэ кыттааччылар 28-лар. Биһиэттэрэ манна 18-тар. Үөһэ бөлөххө Россия чемпионатын призердара Дмитрий Аксеновы (Саха сирэ), Дондук Оол Хуреш Оолу (Кемерово), А.Медведь турнирын кыайыылааҕа Андрей Бекреневы (Белоруссия), устудьуоннарга аан дойду чемпиона буола сылдьыбыт Туменбилег Тувшинтулганы (Монголия) чорботуохха сөп.

Оттон иккис бөлөххө норуоттар икки ардыларынааҕы турнирдар кыайыылаахтара Ахмеднаби Гварзатиловы (Азербайджан), Ньургун Александрову (Саха сирэ), Азия чемпиона Сандип Томары (Индия) бэлиэтиир наадалаах.

Бу ыйааһыҥҥа Иран Исламскай республиката икки кыттааччылаах: М.Рамезанпур уонна М.Дастан. Кинилэр ааттара биһиэхэ тугу эппэт эрээри, иранецтар үгэс быһыытынан күүстээхтэринэн ааҕыллаллар.

Манна эдэрдэртэн Айсен Потапов, Петр Павлов, Николай Иванов арыллан тустуохтарын сөп.

Билгэлээһин быһыытынан эттэххэ, бу ыйааһыҥҥа биһиги бөҕөстөрбүт түөртэн – икки мэтээли ылыахтарын сөп. Ол ханнык өҥнөөх мэтээллэр буолалларын сарсын билиэхпит.

70 киилэҕэ 25 бөҕөс күөн көрсүө, кинилэр кэккэлэригэр Саха сириттэн 10 бөҕөс баар. Манна үөһэ бөлөххө олимпийскай призер Ихтиор Новрузов (Узбекистан) уонна биһиги республикабыт хас да төгүллээх чемпиона Константин Власов – ордук курдук көстөллөр.

Аллараа бөлөххө састаап күүстээх буолбут. Грузин Константин Хабалашвили, олимпийскай чемпион Сослан Рамонов, биһиги Тимур Николаевпыт, устудьуоннарга аан дойду чемпиона буола сылдьыбыт Надирбек Хизриев (Красноярскай), соторутааҕыта Россия чемпионатыгар иккис буолбут Арбак Сат (Красноярскай), кэскиллээх бөҕөс Кирилл Корнеев (Кемерово) уонна Россия чемпионатын призера Евгений Жербаев (Бурятия) бааллар.

Дьэ, бу бөҕөстөр киирсиилэрин дуоһуйа көрөр буолбуппут. Арааһа, Рамоновтаах Жербаев бу кылгас кэм иһигэр иккистээн көрсөллөрө буолуо. Санатан эттэххэ, Одинцовоҕа буолан ааспыт Россия чемпионатыгар хардары-таары сүрдээх бырахсыылаах хапсыһыыга кыайыылааҕынан Сослан Рамонов тахсыбыта. Ити киирсиигэ сүрдээҕин илистэн, салгыы тустуутугар кини хотторон кэбиспитэ. Онон дьэ, билигин хайалара буолар?

79 киилэҕэ 10 кыттааччы баар. Манна биһигиттэн үс бөҕөс кыттар. Ырытан көрдөххө, мэтээл иһин сүрүннээн Россия экс-чемпиона осетин Кахабер Хубежты, Турция чемпиона Ислам Килич, грузин Джумбер Квелашвили уонна Монголия уопуттаах баатыра Пурэвжав Унурбат киирсиэхтэрэ дии саныыбын.

92 киилэҕэ – ахсыалар. Манна биһиги эрэлбитинэн Максим Толмачев буолар. Кини сэрэбиэй быһыытынан маҥнайгы эргииргэ баай уопуттаах Анзор Уришевы (Красноярскай) кытта тустар буолбут. Бу бөлөххө өссө немец Матухин, россиянин Черткоев диэн күүстээх бөҕөстөр бааллар.

Оттон аллараа бөлөххө Олимпиада-2012 призера венгр Габор Хатош, монгол Лубсандорж уонна Европа быйылгы чемпионатын 86 киилэҕэ чемпиона Артур Найфонов бааллар.

Сэрэйдэххэ, финалга Уришев уонна Найфонов тахсан, кыайыылааҕы быһаарсаллара буолуо.

Саамай ыарахан ыйааһыҥҥа – 125 киилэҕэ 13 бухатыыр күөн көрсүө. Манна даҕаны ааттарынан көрдөххө, күүстээхтэр элбэхтэр. Ол курдук, Азия чемпионатын призера Нацагсурен Золбоо, Россия чемпионатын призера Балдан Цыжипов (Бурятия), Россия уонна Европа чемпиона Анзор Болтукаев (Грознай), Олимпиада-2016 призера Ибрагим Саидов (Белоруссия), Азия чемпионатын призера Нам Ким (Корея), икки төгүллээх олимпийскай призер Камейл Гасеми (Иран) бааллар.

Тус санаабар, финалга монгол Золбоо уонна иранец Гасеми тахсыахтарын сөп. Чэ, ону көбүөр көрдөрүө. Оттон эһиги туох дии саныыгытый?

Петр Павлов.

Добавить комментарий

Ваш адрес email не будет опубликован. Обязательные поля помечены *