Күрэхтэһии бастакы күнүн түмүгэ


Румынияҕа, 23 саастарыгар диэри бөҕөстөргө аан дойдуга бастыыр иһин күрэхтэһии үгэннээн ыытылла турар. Бөөлүүн, күрэхтэһии бастакы биэс ыйааһыныгар бастыҥнар быһаарылыннылар. Күрэхтэһии хаамыытыттан көрдөххө, Япония уонна Грузия хамаандалара үчүгэйдик бэлэмнэнэн кэлбиттэр.

Эрдэ, dzulurgan.ru сайтка суруйбуппут курдук, чуолаан ити хамаандалар састааптара күүстээх этэ. Ылан көрүҥ, Бухарестааҕы түһүлгэ саамай үрдүк ааттаах-суоллаах кыттааччытын – Риотааҕы-2016 Олимпиада үрүҥ көмүс призерун Рей Хигучины (Япония), эбэтэр соторутааҕыта аҕай түмүктэммит аан дойду чемпионатыгар үрүҥ көмүс мэтээли ылбыт Автандил Кенчадзены (Грузия)…

Япония уонна Грузия хамаандатыгар кинилэри тэҥэ атын да күүстээх тустууктар бааллар. Холобур, Азия улахан дьоҥҥо быйылгы чемпионатын призера, Д.П. Коркин турнирын былырыыҥҥы призера Тошихиро Хасегава 57 киилэҕэ тэҥнээҕин булбата. Бу ыйааһыҥҥа Россияттан Муслим Садулаев кыттан, иккис киирсиитигэр китаец Зуга хотторон, күрэхтэһииттэн туораабыта. Биир бэйэм 79 киилэҕэ оҕолорго олимпийскай чемпион Ядзуро Ямасакины кэтээн-манаан көрө сатаатым. Кини бастаабыт грузиҥҥа сабырыйтаран баран, боруонса мэтээл иһин Румынияттан кыттар дагестанец Омарасхаб Нажмудиновтыын тустуутугар, судьуйалар дьиэлээх киһиэхэ ыалдьыбыта буолан, дьоппуон ылбыт баалларын ситэ аахпатылар, онон 8:9 ахсаанынан хотторууну биэрдилэр. Видеотын булан көрөөрүҥ эрэ. Нажмудинов үһүс буолла. Ол эрээри, Ямасаки быдан кэскиллээх, инникилээх. Чэ, ити курдук, Япония хамаандатын састааба эриэ-дэхси көрдөрүүлээх.

Рей Хигучи – Д.П. Коркин турнирыгар кэлэн бириискэ тиксибэтэҕэ. Монгол Тулга кинини киһилээбэтэҕэ. Бу бөҕөстөр сэрэбиэй быһыытынан бастакы эргииргэ көрсүбүттэригэр, бу сырыыга дьоппуон тулуппата, партерга “кыптыыйдааһын” албаһыгар киллэрэн, ыраастык кыайда. Уопсайынан, Коркин турнирынааҕар быдан эбиллибит, санаата күүһүрбүт, хорсуна киирбит. Бу ыйааһыҥҥа дьоппуоннар күүһүрдүлэр. Эр дьоҥҥо 19 саастаах Такуто Отогуро чемпионнаабыта, оттон бу күрэхтэһиигэ 22 саастаах Рей Хигучи бастаата. Өссө Дайчи Такатани диэн Азия чемпионатын призера, Рью Накамура диэн эдэрдэргэ аан дойду былырыыҥҥы чемпиона бааллар. Бэйэлэрин дьиэлэригэр-уоттарыгар Олимпиада буоларынан сибээстээн, таайдарбыт тустууга үчүгэйдик ылсыбыттар дииргэ тиийэбит.

Күрэхтэһии инниттэн Давид Баев (70 кг) бастыа дии санаабытым, финалга Словакияттан кыттар биир дойдулааҕа Таймураз Салказановка “илиилээх-атахтаах буолбата”. Салказанов бииртэн-биир түҥнэритэ көтүөлээн 9:1 ахсаанынан эрэллээхтик кыайда. Олох дьиэк биэрбэтэ.

Салгыы кэлэр ыйааһыҥҥа, эдэрдэргэ аан дойду чемпиона буола сылдьыбыт дагестанец Гаджи Набиев финалга грузин Ника Кенчадзеҕа 0:3 ахсаанынан сабырыйтарда. Манна даҕатан эттэххэ, бүгүҥҥү финалга өссө биир Кенчадзе – улахан дьоҥҥо аан дойду чемпионатын үрүҥ көмүс призера Автандил Кенчадзе (74 кг) финалга тустар, сэрэйдэххэ бастыыра буолуо.

Красноярец Никита Овсянников бастакы эргииргэ Мурга (АХШ) хотторон баран, атын утарсааччыларын тулуталаабата, боруонса мэтээлинэн наҕараадаланна. Онон бастакы күн түмүгүнэн Россия хамаандата биэс ыйааһынтан 2 үрүҥ көмүс, 2 боруонса мэтээллээх. Аны бүгүн Магомедрасул Идрисов (61 кг), Артур Найфонов (86 кг), Асланбек Сотиев (92 кг), Саид Гамидов (125 кг) финалга тусталлар. Баев итинник хотторбутун кэнниттэн, эрдэ сылла кинилэр бары кыайаллар дииртэн туттунабын. Көбүөр көрдөрүө. Оттон эһиги туох дии саныыгытый?

Күрэхтэһии бастакы күнүн түмүгэ:

57 кг 1. Тоширо Хасегава (Япония) 2. Кумар Рави (Индия) 3. Ваньхао Зу (Кытай) 3. Тарас Маркович (Украина).
65 кг 1. Реи Хигучи (Япония) 2. Али Рахимзаде (Азербайджан) 3. Максим Сакултан (Молдова) 3. Ислам Дудаев (Россия).
70 кг 1. Таймураз Салказанов (Словакия) 2. Давид Баев (Россия) 3. Енес Услу (Турция) 3. Джинтаро Мотояма (Япония).
79 кг 1. Ника Кенчадзе (Грузия) 2. Гаджи Набиев (Россия) 3. Омарасхаб Нажмудинов (Румыния) 3. Довлетмурат Оразгылижов (Туркмения).
97 кг 1. Гиви Мачарашвили (Грузия) 2. Колин Мур (АХШ) 3. Али Шабанибенгар (Иран) 3. Игорь Овсянников (Россия).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *