Күрэхтэһии бастакы күнүн сэрэбиэйин ырытыы

57 киилэҕэ 34 бөҕөс сэрэбиэйи ааста. Манна даҕатан эттэххэ, сарсын сарсыарда ити бөҕөстөр аны ыйааһыннаныыны этэҥҥэ аастахтарына эрэ, күрэхтэһиигэ киллэриллэллэр.

Ити 34 кыттааччыттан 22-тэ – Саха сирин хамаандатын тустууктара. Сэрэбиэйи көрөн баран тугу этиэххэ сөбүй?

Эрдэ иһитиннэрбиттэринэн, бу түһүлгэҕэ аан дойду чемпионатын икки төгүллээх боруонса призера, Азия оонньууларын кыайыылааҕа Эрдэнэбат Бехбаяр (Монголия), Россия чемпионатын икки төгүллээх призера Азамат Тускаев (Хотугу Осетия) кыттыахтаах этилэр да, кэлбэтилэр. Оттон Россия чемпионатын быйылгы үрүҥ көмүс призера Дондук Оол Хуреш Оол (Тыва) тоҕо эрэ сэрэбиэйи ааспатах. Онон бу ыйааһыҥҥа састаап хайдах эрэ сымнаан хаалла диэххэ сөп. Ол биһиги бөҕөстөрбүтүгэр үчүгэй. Тоҕо диэтэххэ, үөһэ ааттаммыт тустууктар кэлбиттэрэ эбитэ буоллар, хайаан даҕаны мэтээлгэ тардыһыахтаах этилэр.

Дьэ онон, Афганистан, Белоруссия, Венгрия, Израиль, Азербайджан, Япония, Канада, Кытай, Иран, Испания хамаандаларыттан кыттааччылар бааллар.

Манна сэрэйдэххэ, Белоруссияттан Димчик Ринчиновы уонна биһиги Арыйан Тютриммытын күүстээхтэр диэн, туспа бөлөхтөргө араарбыттар. Мин тус санаабар, үөһээ бөлөххө Димчик Ринчинов, Быйаман Яковлев, Степан Сорокомов, Виталий Эспек, аллараа бөлөххө Федор Постников, тувинец Арзыл, Егор Потапов уонна Арыйан Тютрин – финал чиэппэригэр тиийиэхтэрин сөп эбит.

Чэ, быһа холуйан эттэххэ, бу ыйааһыҥҥа мин санаабар, Степан Соркомов уонна Арыйан Тютрин финалга тахсыахтара. Ити мин билгэлээһиним. Оттон туох-хайдах буоларын көбүөр көрдөрүө турдаҕа.

65 киилэҕэ 29 кыттааччы баар, итинтэн 10-на саха. Бу ыйааһын күүстээхтэринэн Саха сирин хамаандатын капитана Виктор Рассадины, Россия чемпиона Егор Пономареву, Азия оонньууларын призера Саятбек Окасовы (Казахстан), Россия чемпионатын призера Даша Шарастепановы (Бурятия), эдэрдэргэ Азия чемпионатын призера Ильяс Жумайы (Казахстан), быйылгы Р.М. Дмитриев турнирын кыайыылааҕа Тумур Очир-Тулганы (Монголия), Азия чемпиона Даулет Ниязбековы (Казахстан), олимпийскай призер Рей Хигучины (Япония), опыттаах бөҕөс Баяр Цыреновы (Бурятия), Пейман Биабанины (Иран) ааттаталыахха сөп. Көрөргүт курдук, састаап додо курдук күүстээх.

Дьэ манна, үөһээ бөлөхтөн Виктор Рассадин уонна Егор Пономарев, аллараа бөлөххө Рей Хигучи уонна Пейман Биабани балаһыанньалара үчүгэй курдук көрөбүн. Онон бу ыйааһыҥҥа мэтээлгэ сүрүннээн бу бөҕөстөр тиксэ сыһаллара буолуо.

Холобурдаан эттэххэ, Виктор Рассадин маҥнай Азербайджан эдэр бөҕөһө, бу иннинэ 57, 61 кг ыйааһыннарга туста сылдьыбыт Рахимзадены кытта көрсөр. Онно кыайдаҕына американец Хендерсоҥҥа тахсар, салгыы табылыннаҕына Боровицкайдыын тустуон сөп уонна мин ааҕыыбынан, финал аҥарыгар Пономаревтуун көрсүөн сөп.

74 кг ыйааһыҥҥа 19 кыттааччыттан, үһэ – биһиэнэ. Манна эрдэ сылла финалга кимнээх тахсыахтарын сылыктыахха сөп. Ол – аан дойду, Европа чемпиона, Олимпиада призера, билиҥҥи кэм биир кэрэхсэбиллээх бөҕөһө кубинец Франк Чамизо уонна Россия чемпионатын икки төгүллээх призера Никита Сучков (Красноярскай). Ол эрээри, үөһэ бөлөхтөн ким финалга тахсарын быһаарсыыга Исраил Касумов – Чамизоҕа утарсыыны оҥоро сыһара буолуо. Биир тылынан, кинилэр тустуулара бастакы күн киэһээҥҥи бырагырааматын саамай сытыы хапсыһыытынан буолуон сөп.

Сэрэбиэйи көрөн баран эттэххэ, бу ыйааһыҥҥа биһиги уолаттарбыт Айсен Копырин уонна Герман Устинов боруонса мэтээл иһин тустар кыахтаахтар.

86 киилэҕэ 16 бөҕөс сэрэбиэйи ааспыт, кинилэртэн түөрдэ – бэйэбит уолаттарбыт. Манна мин санаабар, үөһээ бөлөххө Зеленков (Красноярскай) – Мусалалиев (Дагестан), аллараа бөлөххө Сергин (Саха сирэ) – Базри (Иран) финалга тахсар иһин киирсэллэрэ буолуо.

Сэрэбиэйи көрдөххө, турнир саамай уопуттаах уонна саастаах кыттааччыта, Д.П. Коркин турнирын былырыыҥҥы кыайыылааҕа Сослан Кцоев (Хотугу Осетия) – Мусалалиевка кутталы оҥоруон сөп эрээри, мин эдэр киһи кыайара буолуо диэн сылыктыыбын. Ханныгын да иһин, Кцоев бачча сааһыгар диэри улахан таһымҥа туста сылдьара хайҕаллаах.

97 киилэҕэ 13 кыттааччы баар. Саха сириттэн Ион Болтунов уонна Андрей Аронов кытталлар. Бу ыйааһыҥҥа Россия быйылгы чемпионатын призера Овсянников (Красноярскай) – Гаджиев (Азербайджан) уонна Гусошвили (Грузия) – Белоновскай (Красноярскай) финал аҥарыгар тахсыахтара дии саныыбын. Уопуттаах Юрий Белоновскай бастыан сөп.

Чэ, күрэхтэһии бастакы күнүн сэрэбиэйин көрөн баран, тута кылгас ырытыы оҥордоххо итинник. Хаһан баҕарар биһиги билгэлиибит, оттон Түһүлгэ күүстээхтэри хайдах аттаран туруорарын бэйэтэ билэр. Төһө сөпкө сылыктаабыппын сарсын-өйүүн тэҥнээн көрүөхпүт.

Петр ПАВЛОВ.

One thought on “Күрэхтэһии бастакы күнүн сэрэбиэйин ырытыы

  • 6 сентября, 2018 в 4:19 пп
    Permalink

    Бастакы күн соһуччу түмүгүнэн — Россия чемпионатын хас эмэ төгүллээх призера, Д.П. Коркин турнирын кыайыылааҕа, норуоттар икки ардыларынааҕы кылаастаах спорт маастара Юрий Белоновскай (Красноярскай) 97 киилэҕэ бастакы эргииргэ монгол Улзисайхаҥҥа хотторуутун ааттыахха сөп.

    Ответ

Добавить комментарий

Ваш адрес email не будет опубликован. Обязательные поля помечены *