Кэриэстэбил: Гоша суох буолбутун хайдах эрэ ылыммат курдукпун

Гоша… Гоша суох буолбутун хайдах эрэ итэҕэйбэт курдукпун. Олох бэҕэһээ курдук этэ дии. Кулун тутар саҥатыгар диэри олох, үлэ күөстүү оргуйан олорбута. Биһиги Гошалыын Бэчээт дьиэтигэр үлэлиир буоламмыт, элбэхтик алтыһарбыт. Онтон хайа күн ковид дьаҥынан карантин биллэриэҕиттэн көрсүбэтэхпит…  

Георгий Татаринов, үлэтигэр наһаа эрдэһит буолааччы. Сарсыарда тоҕус чаас саҕана ким хайа иннинэ кэлэн көрүдүөргэ хаама сылдьар буолааччы. Сэрэйдэххэ, үлэлиир сириттэн чугас олорор буолан эрдэ кэлэн, туттарыахтаах үлэтин бүтэрэн-оһорон, дьону көрсө сылдьааччы. Ити курдук кинилиин наар, ким үлэтигэр эрдэ кэлэр эбит диэн куоталаһан тахсааччыбыт.

Бэрт сэргэхтик, түргэнник элэстэнэн хаамааччы.

Күҥҥэ биһиги кабинеппытыгар хаста эмэтэ киирээччи. Ону биһиги күлэн этэр буоларбыт: “Бу, үлэлиир киһигин дуу, суох дуу, наар кабинеттары кэрийэн тахсаҕын”, — диэн. Онуоха Гоша күлэн кэбиһээччи. Кини хаһан даҕаны кыыһырааччыта суох. Үлэ умсулҕаныгар ардыгар киҥир-хаҥыр кэпсэтии баар даҕаны буоллаҕына, Гоша ону санаатыгар тутааччыта суох, аһарынан кэбиһээччи. Манна даҕатан эттэххэ, биһиги биир эрэ тиэмэни, спорду тутан баран сылдьар буоллахпытына, кини “Якутия” хаһыакка спорду таһынан элбэх тиэмэҕэ эппиэттээх этэ. Үлэтигэр сүрдээх эппиэтинэстээх, түргэн-тарҕан буолара. Хаһыаты ылан көрдөххө “Георгий Татаринов” диэн илии баттааһыннаах балаһалар элбэх буолааччылар.

Биһиги кинилиин үлэбитигэр-хамнаспытыгар өрүү бэйэ-бэйэбитин ситэрсэн, сүбэлэһэн, өйөһөн сылдьыбыппыт.

Командировкаларга, пресс-конференцияларга элбэхтэ бииргэ айаннаан, аргыстаһан сылдьааччыбыт. Бу санаатахха, бүтэһик сырыыбыт иллэрээ сыл Аммаҕа, Саха сирин норуоттарын спортивнай оонньууларыгар эбит. Наһаа үчүгэйдик, үлэбититтэн дуоһуйууну ылан, Амматтан астынан кэлбиппит. Күннэтэ, сайтка суһал сонуннары ыытарбыт таһынан, тэрилтэбит сорудаҕынан күн аайы олохтоох редакцияҕа түүннэри, оонньуу хаамыытын билиһиннэрэр Дневниктэри Гошалыын оҥорбуппут. Нууччалыы-сахалыы тылынан.

Онно, ыкса киэһэ, күрэхтэһиилэр, пресс-конференциялар кэннилэриттэн олох сарсыардааҥҥы диэри редакцияҕа олорон, Дневниктэрбитин оҥорбуппут. Онно бэлиэтии көрдөххө, Георгий бэйэтин сиппит-хоппут суруналыыс быһыытынан өссө төгүл итэҕэппитэ. Биһиги, верстальщиктыын суруйуу аатын (заголовок) талыыга ыарырҕатар эбит буоллахпытына, Георгий итиннэ олох маастар этэ. Наһаа түргэнник айан таһаарааччы.

Кинини республика спортсменнара, тренердэрэ, спорка салайааччылара бары кэриэтэ билэллэрэ, билинэллэрэ. Барыларын кытта доҕордуу буолан, спорт сонуннарын дөбөҥнүк булан суһаллык таһаарара. Хаста даҕаны Саха сирин бастыҥ спортивнай суруналыыһын аатын чиэстээхтик ылбыта да ону туоһулуур.

Гоша хампаанньаҕа, элбэх киһи ортотугар хаһан да килбигийэн, кэмчиэрийэн, толлон турааччыта суох. Куорат уола буолан, нууччалыы үчүгэйдик кэпсэтэринэн, барыны барытын быһаарсааччы. Бырааһынньыктарга үҥкүү буоллаҕына, Гоша былааһы ылааччы, наһаа имигэстик хамсанан, эргиир ортотугар киирэн имиллэҥнээн киирэн бардаҕына, дьон сүргэтин көтөҕөөччү. Арааһа, спортивнай суруналыыстар саамай үҥкүүһүппүт кини буолуо.

…Былырыын кулун тутартан ыла ковид дьаҥынан сибээстээн дьиэбитигэр олорон, ыраахтан үлэлиибит. Ол иһин, Гоша суох буолбутун хайдах эрэ билигин даҕаны ылыммат курдукпун. Карантин бүттэҕинэ, хомуллан кэлэрбитигэр доҕорбутун суохтуурбут буолуо.

Биир идэлээхпит, доҕорбут Гоша, Георгий, Георгий Семенович Татаринов туһунан үтүө өйдөбүл биһиэхэ өрүү тыыннаах буолуоҕа. Георгий сэргэх суруйуулара, интервьюлара кинини наар саната туруохтара.

Петр ПАВЛОВ.       

Добавить комментарий

Ваш адрес email не будет опубликован. Обязательные поля помечены *