Кэлэн иһэр Саҥа — 2019 cылынан!

2019 сыл – биһиги республикабытыгар хаһааҥҥытааҕар даҕаны спорка баай ис хоһоонноох сыл буолара күүтүллэр. Ол курдук, өссө олунньу саҥатыгар Сахалиҥҥа, “Азия оҕолоро” норуоттар икки ардыларынааҕы спортивнай оонньуу спорт кыһыҥҥы көрүҥнэригэр бастакы күрэхтэһиитэ ыытыллыаҕа. Санатан эттэххэ, бу киэҥ биһирэбили ылбыт тэрээһин биһиги Сахабыт сириттэн үөскээн-тэнийэн тахсыбытын быһыытынан, республика быһаччы кыттыгастаах.

Салгыы, кулун тутар ыйы – Тустуу ыйынан ааттыахха сөп. Үгэс быһыытынан, сыллата бу кэмҥэ Н.Н. Тарскай бирииһигэр көҥүл тустууга Саха Республикатын биирдиилээн уонна хамаанданан бастыыр иһин чемпионата буоларын тэҥэ, 8-10 чыыһылаларга олимпийскай чемпион Роман Дмитриев кэриэһигэр эдэрдэргэ норуоттар икки ардыларынааҕы турнир ыытыллыаҕа. Быйылгы турнир – Роман Михайлович 70 сылыгар ананар. Оттон биир нэдиэлэнэн, кулун тутар 14-16 күннэригэр эмиэ “Триумф” Спорка бэлэмнэнии киинигэр биһиги республикабытыгар аан маҥнай көҥүл тустууга Аан дойду кубога курдук улахан таһымнаах түһүлгэ тэриллэрэ былааннанар. Бу, Саха сирин спорка историятыгар улахан, кэрэ бэлиэ түгэни мүччү туппаккытыгар баҕарабыт.

Ити, норуоттар икки ардыларынааҕы таһымнаах күрэхтэһиилэри таһынан, от ыйын 5-7 күннэригэр Аммаҕа – Саха сирин норуоттарын VII спортивнай оонньуулара ыытыллыахтара.

Буоларын курдук, үүнэр сылга “Дьулурҕан” сүрүннээн ити улахан күрэхтэһиилэри, тэрээһиннэри былаан быһыытынан сиһилии суруйуо, сырдатыа, ааҕааччыларга билиһиннэриэ. Быһата, кэлэр 2019 сылга биһиги хаһыаппытыгар араас интэриэһинэй суруйуулар, кэпсэтиилэр, санаа атастаһыылар, куонкурустар салгыы бэчээттэниэхтэрэ. Этэргэ дылы, “Дьулурҕанныын” доҕордоһуоҥ – спорду кытта бииргэ буолуоҥ! “Дьулурҕанныын” бииргэ буолуоҥ – олох суолун устун бииргэ хардыылыаҥ!

Күндү, Сахабыт сирин дьоно-сэргэтэ! Эһигини кэлэн иһэр Саҥа, 2019 сылынан эҕэрдэлиибит! Кытаанах доруобуйаны, үлэҕитигэр-олоххутугар ситиһиилэри баҕарабыт!

Манна сыһыары тутан эттэххэ, эһиилги сылга “Дьулурҕан” хаһыат бастакы нүөмэрэ тохсунньу 10 күнүгэр бэчээттэнэн тахсыаҕа. Ол аата, онуоха диэри көрсүбэппит диэн буолбатах, бу күһүҥҥүттэн интернеккэ арыллан үлэлиир хаһыат анал сайта (dzulurgan.ru) ханнык да бырааһынньыктары, өрөбүллэри аахсыбакка – күннэтэ спорт сонуннарын, хаартысканан кэпсээннэри, интэриэһинэй видеолары таһаара турар. Ону көрөргүтүгэр, сэҥээрэргитигэр ыҥырабыт. Ким ааҕар, элбэҕи билэ-көрө сатыыр – ол сайдыылаах буоларын умнумаҥ.

Петр ПАВЛОВ, “Дьулурҕан” хаһыат кылаабынай редактора.       

Добавить комментарий

Ваш адрес email не будет опубликован. Обязательные поля помечены *