Кылгастык бастакы күн түмүгүн ырыттахха


57 киилэҕэ Россия чемпионатын үс төгүллээх боруонса призера Арыйан Тютрин күүстээх тустууну көрдөрдө. Кини сэрэбиэй быһыытынан аллараа бөлөххө киирэн, атыттарга холоотоххо, биир хапсыһыыны ордук ыытта.

Ол курдук, бастаан Испанияттан тустар грузин Леван Метревелины 9:4 ахсаанынан хотто. Метревели – уопуттаах тустуук, элбэх турнирдар кыайыылаахтара уонна призердара. Итинник хонноҕун аһан баран, аны бурят Тамир Гармаевтыын көрүстэ. Билэргит курдук, былырыын маннык күрэхтэһиигэ Арыйан бу бурятка хотторон турар. Онон сытыы, тыҥааһыннаах киирсии буолара күүтүллүбүтэ. Киирээт Арыйан киһитин такымыттан тардан охтороот, ыбылы кууһан ылан төттөрү-таары эргитэлээн, этэргэ дылы, киһитин ууга-уокка түһэрэн, бастакы түһүмэҕи 8:0 оҥорор. Көрдөххө, уолбут сирэйэ-хараҕа турбута сүрдээх. Олох киирсэрдии оҥостубут, күрэхтэһиигэ кыайардыы бэлэмнэммит. Иккис түһүмэххэ киирэн буряты түҥ-таҥ тута сылдьан, биир түгэҥҥэ кууһан ылан быраҕан, бу хапсыһыыны очукуонан ыраастык кыайда. Гармаев олох ах бэрдэрдэ. Оттон Тютрин бу чаҕылхай кыайыытыттан санаата өссө күүһүрэн, бэл трибунаҕа олорор дьону таһыналларыгар, уруйдуулларыгар ыҥырда.

Онтон иранец Торкаманы 10:0 ахсаанынан баһыйа тутта.

Салгыы күрэхтэһиигэ уруккуттан эриһэр киһитэ – Македонияттан кыттар Владимир Егоровы 14:3 ахсаанынан эрэллээхтик кыайда. Ордук, утарсааччытын партерга охтороот, “накат” диэн албаһынан халаачык курдук эргитэлээтэ.

Финалга тахсар иһин хапсыһыыга, бу иннинэ үс утарсааччытын холкутук кыайталаабыт японец Рикуто Араины кытта киирсиитигэр, киирээт тиэрэ көтөн охторон баран, устунан били “накатынан” кулахычытан, хапсыһыыны болдьоҕун иннинэ түмүктээтэ. Көрөөччүлэр кини бүгүҥҥү чаҕылхай тустуутун сыаналаан уруй-айхал тылларын тиэртилэр.

Арыйан Тютрин финалга утарсааччыта – азербайджанец Парвиз Ибрагимов. Финал чиэппэригэр биһиги Виталий Эспекпыт азербайджанеһы хотон иһэн уоскуйан хаалан, олох бүтэһик сөкүүндэлэргэ киирэн биэрэн, кыһыылаахтык хотторбута. Ол оннугар Ибрагимов финалга тахсар иһин тустууга Димчик Ринчиновы (Белоруссия) 13:11 ахсаанынан хотон үчүгэй өйдөбүлү үөскэттэ.

65 киилэҕэ эрэнэр киһибит – хамаанда капитана Виктор Рассадин – азербайджанец Рахимзадены 6:2, американец Хендерсоны 9:8, бурят Боровицкайы 3:2, казах Окасовы 4:1 ахсааннарынан кыайталаан финалга таҕыста. Манна бастатан туран, кини тустар маастарыстыбатынан үрдүк буолан баһыйталаата. Бастакы түһүмэхтэргэ очукуо биэртэлээн баран, иккискэ ситэ баттаан ылан, кылбар кыайыылары ситистэ.

Бу ыйааһыҥҥа биир эрэммит киһибит – Егор Пономарев табыллыбата, Окасовка аҥардастыы барда, ол аата, 0:9 ахсаанынан хомолтолоох хоттордо.

Анараа бөлөхтөн финалга монгол Тумур-Очир Тулга таҕыста. Кини – Донзаленконы, Азия чемпиона, аан дойду чемпионатын призера казах Ниязбековы ыраастык, Олимпиада призера японец Хигучины 5:1 уонна бурят Цыреновы 13:2 ахсааннарынан олус эрэллээхтик кыайталаан, үчүгэй өйдөбүлү үөскэттэ. Хайдах эрэ илбиһирэн туран, хабырдык туһунна.

Санатан эттэххэ, быйыл Бурятия президенин бирииһигэр турнирга Рассадин бу монголга хотторон турар. Онон сарсын финалга ол хотторуутун боруостуон наада.

Бу күн өссө Герман Устинов (74 кг) сэргэх тустууну көрдөрдө. Одинцовоҕа буолбут Россия чемпионатыгар мөлтөх көрдөрүүлэммит эбит буоллаҕына, Амма ыччата бүгүн олох атын тустууну көрдөрдө. Дьиэтигэр этэргэ дылы, хонноҕо аһыллан туста сатаата. Ол курдук, Герман – монгол Мандахнаран Ганзоригы, тувин Мортуй Оолу, бурят Будажаповы кыайталаабытын бэлиэтиир тоҕоостоох. Оттон финалга тахсар иһин киирсиигэ Россия чемпионатын икки төгүллээх призера Никита Сучковка 3:8 ахсаанынан сабырыйтаран кэбистэ.

Онон, бастакы күн түмүгүнэн сарсын мэтээл иһин тустуохтара:

57 кг финал: Арыйан Тютрин (Россия, Саха сирэ) – Парвиз Ибрагимов (Азербайджан).

Михаил Васильев, Степан Соркомов, Виталий Эспек (бары Россия, Саха сирэ) киирсиилэрин кыайыылааҕа – Димчик Ринчиновы (Белоруссия) кытта боруонса мэтээли былдьаһыа.

Леван Метревели (Испания), Тамир Гармаев (Россия, Бурятия), Торкаман Пуриа (Иран), Владимир Егоров (Македония) киирсиилэрин кыайыылааҕа – Рикуто Араины (Япония) иккис боруонса мэтээл иһин тустуоҕа.

65 кг финал: Виктор Рассадин (Россия, Саха сирэ) – Тумур-Очир Тулга (Монголия)

Али Рахимзаде (Азербайджан), Эван Хендерсон (АХШ) Алексей Боровицкай (Россия, Бурятия) киирсиилэрин кыайыылааҕа – Саятбек Окасовы (Казахстан) кытта үһүс миэстэни былдьаһыа.

Николай Донзаленко (Россия, Красноярскай), Даулет Ниязбеков (Казахстан), Рей Хигучи (Япония) киирсиилэрин кыайыылааҕа – Баяр Цыреновтыын (Россия, Бурятия) иккис боруонса иһин тустуоҕа.

74 кг финал: Франк Чамизо (Италия) – Никита Сучков (Россия, Красноярскай).

Ахмед Усманов (Россия, Дагестан), Артем Постика (Румыния), тустууларын кыайыылааҕа – Исраил Касумовы (Россия, Красноярскай) кытта боруонса мэтээл иһин тустуоҕа.

Артур Хуцистов (Россия, Кемерово), Гаджимурад Омаров (Азербайджан) киирсиилэрин кыайыылааҕа Герман Устиновы (Россия, Саха сирэ) кытта иккис боруонса иһин тустуоҕа.

86 кг финал: Арсенали Мусалалиев (Россия, Дагестан) – Ахмад Базри (Иран).

Шамиль Абдурахманов (Россия, Сахалин), Сослан Кцоев (Россия, Хотугу Осетия) киирсиитин кыайыылааҕа – Александр Зеленкову (Россия, Красноярскай) кытта үһүс миэстэни былдьаһыаҕа.

Иван Борисов (Россия, Саха сирэ), Уйтумэн Оргэдэл (Монголия) пааратын кыайыылааҕа – Вилли Хейноны (Финляндия) кытта иккис боруонса иһин тустуоҕа.

97 кг финал: Нурмагомед Гаджиев (Азербайджан) – Улзисайхан Батзул (Монголия).

Юрий Белоновскай (Россия, Красноярскай), Магомедгаджи Нуров (Македония) киирсиитин кыайыылааҕа – Эрик Джиоевы (Россия, Красноярскай) кытта боруонса мэтээл иһин тустуоҕа.

Масуд Хаджесалахани (Иран), Игорь Овсянников (Россия, Красноярскай) киирсиитин кыайыылааҕа бу ыйааһыҥҥа иккис боруонсаны ылыаҕа.

Күрэхтэһии кэмигэр Монголия хамаандатын салайааччыта СР көҥүл тустууга сүүмэрдэммит хамаандатын сүрүн тренерэ Владимир Николаевич Кирилиҥҥэ, СР үтүөлээх тренерэ Егор Николаевич Старостиҥҥа, Россия үтүөлээх тренерэ Василий Егорович Стручковка — Монголия наҕараадатын туттарда.

Добавить комментарий

Ваш адрес email не будет опубликован. Обязательные поля помечены *