Кыайыы чугас да этэ…

Саха омуга ыарахан да ыйааһыҥҥа улахан таһымнаах күрэхтэһиигэ ситиһиилээхтик кыттар кыахтааҕын бу уонча сыл устата итэҕэтэ сылдьар киэн туттар бөҕөспүт Айаал Лазарев Казахстаҥҥа ыытыллан түмүктэммит Азия чемпионатыгар пьедестал иккис үктэлигэр тахсан, үрүҥ көмүс мэтээлинэн наҕараадаланна.

Чемпионакка кини ыйааһыныгар (125 кг) уон биир бөҕөс кыттыбытын туһунан сырдатан турабыт. Айаал күрэхтэһиини финал чиэппэриттэн саҕалаабыта. Бастаан кореец Кими (Азия 2019 с. чемпионатын призёра) кытта туһунна. Итиэннэ хапсыһыы болдьоҕун иннинэ, бастакы түһүмэххэ утарсааччытын такымҥа охсон түһэрээт, хаста да “накат” диэн албаска эргитэн, очукуонан ыраас кыайыыны ситистэ (10:0).

Салгыы, финалга тахсар иһин киирсиигэ Иран пехлеванын кытта туһунна. Иранец Амин Хоссейн Тахери – 25 саастаах, Азия чемпионатын боруонса призера (2018), 23-гэр диэри саастаахтарга аан дойду күрэхтэһиитин икки төгүллээх боруонса призера (2017, 2018), эдэрдэргэ аан дойду түһүлгэтин икки төгүллээх призера (2014, 2015), Азия күрэхтэһиитин кыайыылааҕа (2014, 2015). Тустуу эйгэтигэр биллэр киһи.

Хапсыһыы биһиги бөҕөспүт туһугар ыараханнык саҕаламмыта. Айаал атахха киллэттэрэн уонна “накатка” эргиттэрэн, 0:6 ахсаанынан сабырыттаран испитэ. Онтон биир түгэҥҥэ бэйэтэ сөбүлээн туттар албаһыгар түбэһиннэрэн, кууһан ылан сүрдээх кылбардык халбарыйан түһэрэн ыраас кыайыыны ситистэ. Манна даҕатан эттэххэ, 2015 сыллаахха Азияҕа чемпионнууругар финалга Айаал иранец Комейл Гасемины эмиэ ыраастык уурбутун санатар тоҕоостоох.

Итинэн бөҕөспүт финалга таҕыста. Онно олохтоохтор эрэллэрин кытта кииристэ. Олег Болтин – 28 саастаах, Казахстан чемпиона, Азия уонна аан дойду чемпионаттарын кыттыылааҕа, норуоттар икки ардыларынааҕы турнирдар призердара. Эмиэ үөрүйэхтээх бөҕөс.

Бу, чемпион аатын ким ыларын быһаарар тыҥааһыннаах хапсыһыыга Айаал киһитин 3:2 ахсаанынан хотон испитэ. Кыайыы наһаа чугас этэ. Ол эрээри… хапсыһыы бүтүүтэ албаска киирэн биэрэн, түмүккэ хотторон таҕыста.

Чэ, хайыаҥый? Спорт буоллаҕа. Кэлин биллибитинэн, Айаал бу икки кэнники күрэхтэһиитигэр, атаҕар уонна сиһигэр эчэйиилээх буолан, наар укуол күүһүнэн туста сылдьыбыт эбит! Хайдахтаах курдук хорсун быһыыный?!

Наҕараадалааһын кэмигэр көрдөххө, уолбут кыайыыны мүччү туппутуттан бэйэтэ да хомойбут көрүҥнээх. Мэтээлин моонньуттан ылан илиитигэр тутан турда. Ол аата, бу түгэни түргэнник умнан, саҥа үрдэллэри дабайарга, сыыһалары-халтылары көннөрүнэргэ диэн санаабыт буолуохтаах. Итиэннэ саамай сүрүнэ, эчэйиитин оһоруна охсуон наада эбит.

Манна сорох дьоннор, биһиги бөҕөспүт бу көрдөрүүтүнэн олимпийскай путевка ылла дуо диэн ыйыталлар. Ааспыкка суруйбутум курдук, бу иннинээҕи сүүмэрдиир күрэхтэһиигэ Айаал олимпийскай путевкаҕа биир хардыынан тиийбэтэҕэ. Онон ыам ыйын саҥатыгар буолар, бүтэһик сүүмэрдээһиҥҥэ кыттыахтаах.

Бу тустуутунан Айаал Лазарев – Азия чемпионатыттан алтыс мэтээлин ылары ситистэ. Ол курдук, кини биирдэ чемпионнаабыта (2015), түөртэ үһүстээбитэ (2010, 2012, 2013, 2016), аны билигин иккис миэстэлэннэ. Тустууга бэриниилээх, олоҕун спорка анаабыт бөҕөспүтүнэн киэн туттабыт!

Айаалы уонна кини тренерэ – Саха сирин уонна Россия үтүөлээх тренерэ Иван Николаевич Сивцеви бу ситиһиилэринэн  эҕэрдэлиибит! Инники сыалларын-соруктарын ситиһэллэригэр баҕарабыт! Олох салҕанар!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *