Кыайыы-хотуу, чиэс-бочуот мээнэҕэ, кураанахха кэлбэт

 

Бүгүн «Триумф» Спорка бэлэмнэнии киинигэр Красноярскайга ыытыллыбыт, икки төгүллээх олимпийскай чемпион Иван Ярыгин кэриэһигэр көҥүл тустууга норуоттар икки ардыларынааҕы Гран-при турнир уонна дьахталларга Россия чемпионатын түмүктэринэн пресс-конференция ыытылынна.

Пресс-конференцияны Саха Республикатын физическэй култуураҕа уонна спорка миниистирин бастакы солбуйааччы Леонид Спиридонов уонна Саха сирин спорка бэлэмнэнэниигэ киинин дириэктэрэ Михаил Пахомов салайан, көҕүлээн ыыттылар. Тэрээһиҥҥэ тустаах спортсменнары, тренердэри тэҥэ спорт үлэһиттэрэ, суруналыыстар, медицинскэй үлэһиттэр, тустууну таптааччылар кыттыыны ыллылар.

Санатан эттэххэ, Ярыгин турнирыгар биһиги хамаандабыт 5 мэтээли ылары ситиспитэ: Арыйаан Тютрин бастакы, Виктор Рассадин уонна Севиль Назарова иккис, Ньургун Сергин уонна Алина Казымова үһүс миэстэтэлэммиттэрэ.

Оттон дьахталларга Россия чемпионатыгар Севиль Назарова боруонса мэтээлинэн наҕараадаламмыта.

Леонид Николаевич, Красноярскайдааҕы түһүлгэҕэ бөҕөстөрбүт ситиһиилээхтик кыттыбыттарын, сөптөөх үлэ саҕаланан, систиэмэ оҥоһуллан, кэнники кэмҥэ көрдөрүүлэр кэлэн эрэллэрин эттэ.

Итиэннэ: «Кыайыы-хотуу хаһан баҕарар мээнэ, кураанахха кэлбэт. Бу элбэх үлэттэн, тэрээһинтэн, сыраттан-сылбаттан, үгүс көлөһүнтэн кэлэр», — диэн өссө төгүл хатылаан бэлиэтээтэ уонна спортсменнарга, тренердэргэ ситиһииттэн дуоһуйан хаалбакка, салгыы дьаныардаахтык дьарыктаналларыгар баҕарда.

Үгэс быһыытынан, турнирга уонна чемпионакка ситиһиилээхтик кыттыбыт спортсменнарга, тренердэргэ Саха Республикатын физическэй култуураҕа уонна спорка министиэристибэтин, Саха сирин спортивнай тустууга федерациятын ааттарыттан – Махтал суруктар, грамоталар, харчыга сертификаттар туттарылыннылар. Ол курдук, Ярыгин турнирыгар ситиһиилээхтик кыттыбыт бөҕөстөрү тэҥэ кинилэр тренердэрэ Иван Дмитриев, Степан Сивцев, Ким Колодезников, Владимир Кириллин, Семен Петухов – Махтал суруктарынан бэлиэтэннилэр.

Пресс-конференцияҕа этиллибитинэн, бөҕөстөрбүт салгыы, сотору Дагестаҥҥа буолуохтаах аан дойду биэс төгүллээх чемпиона Али Алиев кэриэһигэр норуоттар икки ардыларынааҕы турнирга кыттарга былааннаналлар.

Спортсменнарбыт бу курдук өрүү кыайа-хото сылдьалларыгар, саха спордугар маннык үтүө тэрээһиннэр салҕанан ыытылла тураллырыгар баҕарабыт.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *