Кыайыыны Нургуяна Азарова ситистэ


Бэҕэһээ, сэтинньи 17 күнүгэр – Республикатааҕы Медиа-холдинг Пресс киинигэр дойдулар икки ардыларынааҕы онлайн-матч буолан ааста. Россия (Саха сирэ) уонна Кытай народнай республикаларын сүүс харахтаах дуобакка.

Россия өртүттэн — Азарова Нюргуяна Степановна, дуобакка Российскай Федерация маастара, Аан дойдутааҕы кылаастаах маастар, эдэрдэргэ Аан дойду чемпионката, билиҥҥи кэмҥэ Россия чемпионката уонна Кытай государствотын өртүттэн Чжао Ханьцин, Аан дойду үрдүк таһымнаах гроссмейстера, Кытай народнай республикатын чемпионката, Азия континенын чемпионката, эдэрдэргэ бэйэтин саастаахтарыгар Аан дойду чемпионката оонньоотулар.

Бу түһүлгэни оонньуулларыгар Чжао Ханьцин бастакынан ыҥырыы оҥорбута. Ону Нургуяна Азарова сөбүлэспитэ.

Киэҥ сыаллаах тэрээһини силигин ситэрэн, Аан дойдуга сырдатар-көрдөрөр, видео-акустическай систиэмэтин үрдүк таһымҥа салайан ыытта: Дьокуускай куорат дуобакка федерациятын председателэ, «Саха-Медиа» тэрилтэ генеральнай дириэктэрэ Чертков Алексей Сергеевич. Кытайга дуобат сайдыытын киинигэр Россия аатыттан Саха сирин дуобакка федерациятын вице-президенэ Никифоров Юрий Егорович (Хотугулуу Илиҥҥи Федеральной университет интеллектуальнай киинин дириэктэрэ) турниры оройуттан тутан салайан ыытта.

Кыттааччылар кэпсэтии сөбүлэҥин быһыытынан, үс партияны оонньуурга сөбүлэспиттэрэ.

Бастакы партияны Кытай дуобатчыта утарылаһааччытын дуобаттарын барытын эрийэ хам баайан, кыайара чугаһаабытын кэннэ сэрэҕин сүтэрэн олорон биэрдэ. Азарова кылгас бириэмэҕэ кылбар кыраһыабай комбинацияны мындырдык толкуйдаан, чиэстээхтик дуобат ооонньуута хайдах курдук кэрэхсэбиллээх буоларын көрдөрдө. Ол кэннэ дуобат толоонугар Кытай кыыһын дуобата ордубата, хаалбыттарын уган биэрэргэ күһэлиннэ.

Иккис партияҕа Нюргуяна тактическай да, позиционнай да өртүттэн туох да сыысхалы оҥорбото, Кытай дуобатчытын ыраастык кыайда!

Үһүс партия оонньоммото, Кытай кыыһа бэринэргэ сөбүлэҥин биэрдэ.

Кытай дуобатын федерацията – Саха сирин дуобатчыттарын Саҥа дьыл иннинэ элбэх аахсааннаах оонньооччулардаах турнирга көрсүһүөхпүт диэн ыҥырыы киллэрдэ. Ыҥырыыны ылынныбыт!

Гаврил ВИНОКУРОВ, Дуобат-саахымат республикатааҕы киинин инструктора, Бүтүн Россиятааҕы категориялаах судьуйа, матч кылаабынай судьуйата.

Андрей Соколов (СИА) хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *