Кыайыылааҕынан Алексей Созонов буолла!


Кыһын Саха сириттэн саҕаланар” республикатааҕы бэстибээл чэрчитинэн сэтинньи 30 – ахсынньы 2 күннэригэр “Модун” спортивнай комплекска уонна “Триумф” Спорка бэлэмнэнии киинигэр хотугу многоборьеҕа күрэхтэһии ыытыллан түмүктэннэ. Кылаабынай судьуйанан – республикатааҕы категориялаах судьуйа Иван Горохов үлэлээтэ. Күрэхтэһиигэ 13 спортсмен күөн көрүстэ.

Хотугулуу ыстаныыга – 10 миэтэрэ 57 см көрдөрүүлээх Орто Халыматтан Алексей Созонов бастаата. Киниттэн 55 см-нан хаалбыт Бүлүүттэн Михаил Давыдов иккис миэстэлэннэ. Оттон 9 миэтэрэ 90 см ыстаммыт Анаабыртан Дьулустаан Туприн үһүс көрдөрүүлэннэ.

Буулдьанан ытыыга Мэҥэ Хаҥаластан Кирилл Тайшин бэргэнин бигэргэттэ. Иккис миэстэҕэ Михаил Давыдов (Бүлүү) таҕыста. Мэҥэ Хаҥаластан Владимир Андреев үһүс буолла.

Балыктаах куулу таһыыга Алексей Созонов кимнээҕэр да түргэннин, күүстээҕин көрдөрдө. Бу көрүҥҥэ Үөһээ Бүлүүттэн Айаан Чоросов иккис миэстэлэннэ. Оттон Михаил Давыдов үһүс миэстэни хааччынна.

Аркааны быраҕыыга Алексей Созонов тэҥнээҕин булбата. Дьулустаан Туприн иккистээтэ. Айаан Чоросов үһүстээтэ.

Бүтэһик көрүҥүнэн, бириэмэҕэ наартаны нөҥүө ойуу буолла. Маныаха Нерюнгриттан Айтал Аммосов кыайда. Айаан Чоросов дэгиттэр кыахтааҕын көрдөрөн, иккис миэстэни ылла. Оттон Дьулустаан Туприн үһүс миэстэҕэ таҕыста.

Икки күннээх күрэхтэһии түмүгүнэн 17 очукуолаах Алексей Созонов күрэхтэһии муҥутуур кыайыылааҕынан буолан, сүрүн бириис быһыытынан СКС саанан наҕараадаланна. Иккис миэстэни 22 очукуолаах Айаан Чоросов (Үөһээ Бүлүү) ылла уонна тэлэбиисэр хаһаайынынан буолла. Үһүс бириистээх миэстэҕэ 27 очкуолаах Дьулустаан Туприн (Анаабыр) таҕыста итиэннэ микроволновай оһоҕунан наҕараадаланна.

Кыайыылаахтар мэтээллэринэн, грамоталарынан уонна өйдөбүнньүк бириистэринэн наҕараадаланнылар.

Бу тэрээһин Дьокуускай куорат физическэй култуураҕа уонна спорка управлениетын, спорт национальнай көрүҥнэригэр республикатааҕы “Модун” киинин уонна Дьокуускай куорат култуураҕа, духуобунай сайдыыга управлениетын көҕүлээһиннэринэн уонна тэрийиилэринэн ыытылынна.

Петр ПАВЛОВ.

Добавить комментарий

Ваш адрес email не будет опубликован.