Кыайыылаахха – булт саата!

Дьокуускай куорат хайыһарга федерацията уонна Дьокуускай куорат физическэй култуураҕа уонна спорка управлениетын көҕүлээһиннэринэн сарсын, сэтинньи 10 күнүгэр “Туймаада киэһээҥҥи уоттара” диэн үгэскэ кубулуйбут хайыһарга күрэхтэһии ыытыллар.

Күрэхтэһии Сайсары күөлгэ киэһээ 18:00 чаастан саҕаланар. Күрэхтэһиигэ Дьокуускай куорат уонна республика күүстээх хайыһардьыттара кыттыыны ылаллар. Эр дьон, дьахталлар уонна үөрэнээччилэр бары 1200 м дистанцияҕа көҥүл ньыманан сүүрүөхтэрэ.

Күрэхтэһии бырагыраамата:

16.00-17.30 — Кыттааччылары бэлиэтээһин, мандатнай хамыыһыйа үлэтэ.

17.30 — Күрэхтэһиини үөрүүлээхтик аһыы.

18.00 — Күрэхтэһии саҕаланыыта.

19.30 — Кыайыылаахтары наҕараадалааһын.

Кыайыылаахтар уонна иккис, үһүс миэстэлэммиттэр мэтээлинэн, грамотанан уонна анал бирииһинэн наҕараадаланыахтара. Эр дьоҥҥо муҥутуур кыайыылааҕынан тахсыбыт хайыһардьыт Дьокуускай куорат хайыһарга федерациятын бэрэссэдээтэлэ Василий Тарскайтан МР-18 ЕМ-М булт саатынан наҕараадаланыаҕа.

Куорат олохтоохторун уонна ыалдьыттары, күрэхтэһиигэ көхтөөхтүк кыттаргытыгар ыҥырабыт.

Дьокуускай куорат физическэй култуураҕа уонна спорка управлениета.

Добавить комментарий

Ваш адрес email не будет опубликован.