Куонкурус кыайыылааҕа – Валерий Ефремов


Венгрияҕа ыытыллан түмүктэммит көҥүл тустууга аан дойду чемпионатыгар аналлаах куонкуруһу бу сырыыга саҥа арыллан үлэлээн эрэр “Дьулурҕан” сайтыгар (dzulurgan.ru) тэрийэн ыыттыбыт. Куонкуруска барыта 37 киһи кытынна. Кинилэргэ барыларыгар хаһыат ыытар үлэтигэр көхтөөхтүк кытталларын иһин барҕа махтал!

Куонкурус балаһыанньатын быһыытынан, кыттааччылар ыйааһын ахсын чемпионнары уонна иккис, үһүс миэстэлэргэ тахсыбыт россияннары сылыктыахтаах этилэр. Чемпионат бүппүтүн кэнниттэн киирбит хоруйдары ырытан көрөн баран, кыайыылааҕы быһаарбыппыт. Онуоха Валерий Ефремов, Альбина Дегтярева уонна Спиридон Иванов 6-лыы очукуону ылбыттара. Ол эрээри, куонкурус балаһыанньатын быһыытынан, тэҥнэһии түгэнигэр ким хоруйун эрдэ ыыппыт – ол кыайар диэн этэ. Онон куонкуруска ким хайа иннинэ бастакынан бэйэтин билгэлээһинин ыыппыт Хаҥалас улууһуттан Валерий Ефремов кыайыылааҕынан ааҕыллыбыта.

Валерий Евгеньевич Ефремов Хаҥалас улууһун Хачыкаат олохтооҕо. Фермер. Тустуу биир бэриниилээх ыалдьааччыта. Саха буоларын быһыытынан, син эмиэ бэйэтин саастыылаахтарын курдук, оскуолатааҕы сылларыгар көҥүл тустуунан үлүһүйэн дьарыктаммыта. Нөмүгүгэ үөрэнэрин саҕана тренер Г.Д. Дмитриев салалтатынан эрчиллибитэ. Покровскайга ыытыллыбыт Комсомол бирииһигэр республикатааҕы турнирга уонна Дьокуускайга буолбут үөрэнээччилэр күрэхтэһиилэригэр бастыы сылдьыбыта. Оччоттон Валерий тустууга таптала уһуктубута, тустуунан дьарыктанарын таһынан хаһыаттартан, кинигэлэртэн тустуу туһунан суруйуулары булан ааҕа улааппыта. Күрэхтэһиилэр түмүктэрин анал блокнокка сурунар, бэлиэтэнэр этэ.

Өссө интэрниэт, ватсаап үөдүйэ, тэнийэ илигиттэн, тустуу сонунун ааҕан билээри “Дьулурҕан” хаһыаты сөбүлээн суруйтарарым, — диир, кыайыылаах быһыытынан бирииһин ыла охсоору өрүс хаһан турарын тулуурдаахтык кэтэһэн, бүгүн сарсыарда улуу эбэни сатыы туораан куоракка кэлбит Валерий Ефремов. — Кэлин бэчээти, сонуну электроннай ньыманан булан ааҕабын. Бу иннинэ хаста даҕаны куонкуруска кыттан, сиирэ-халты бириискэ тиксибэт этим. Бу да сырыыга маҥнай утаа элбэх варианы оҥорон көрөн баран, бүтэһиктээҕи талан ыыппытым. Дьиҥэ, ити дьоппуон Отогурону чемпионнуо диэн суруйбутум ээ, ол эрээри, эдэрэ бэрт диэн, Хаджи Алиевка эрэммитим. Уопсайынан, буолан ааспыт аан дойду чемпионата элбэх соһуччу түмүктээх буолла. Киһи эрэ барыта бастыа диэбит дьоно: Таха Акгуль, Кайл Снайдер, Гаджимурад Рашидов, Хаджи Алиев, Хассан Яздани, Эрдэнэбат Бэхбаяр хоттордулар.

Куонкуруска кыайбыппын истэн билэр дьонум билиҥҥэ диэри эҕэрдэ бөҕө. Онуоха бастатан туран, Анатолий Аммосов салайар “Көҥүл тустуу” бөлөҕүн уолаттарыгар махтанабын! Куонкуруска кыттыыбар кинилэртэн элбэх сүбэни-аманы ылбытым.

Чемпионат кэмигэр куонкурус кыттыылаахтарын эппиэтин барытын сайтка ааҕа, көрө, кэтии сылдьан, сэмээр бэйэм билгэлээһиммин тэҥнээбитим итиэннэ бүтэһик күн кыайбыппын билбитим. “Дьулурҕан” ыытар куонкуруһа этэргэ дылы, “сиэркилэ” курдук, барыта чуолкай, туох да мөккүөрэ суох, онон үчүгэй. Миигин кытта тэҥ очукуону ылан баран, балаһыанньаҕа олоҕуран хотторбут Альбина Дегтярева уонна Спиридон Иванов санааларын түһэрбэттэригэр баҕарабын. Бүгүн мин кыайдым, сарсын – кинилэр буолуохтара. Улахан күрэхтэһии кэмигэр маннык куонкурус тэриллэрэ үчүгэй бөҕө буоллаҕа дии. “Дьулурҕаҥҥа” махтал! Киһи сэргэхсийэр, маныыр, кэтэһэр, үлэн даҕаны тахсыылаах буолар.

Аны маннык куонкурус тохсунньу ыйга, Иван Ярыгин аатынан Красноярскайдааҕы турниры көрсө буолуо. Онон этэргэ дылы, эрдэттэн “тиискитин-уоскутун оҥосто сылдьыҥ”. Эрдэ эппиппит курдук, кыайыылаах Валерий Ефремов саха тустуутун историятын туһунан кинигэнэн наҕараадаланна.

“Дьулурҕанныын” бииргэ буолуҥ! Олоҕу уонна спорду кытта бииргэ хардыылааҥ! Өссө да маннык куонкурустар буолуохтара, хаһыаты уонна сайты күннэтэ көрөн кэтии сылдьыҥ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *