Куонкурус кыайыылааҕар бирииһэ туттарылынна!

“Саха сирэ” хаһыат спорка аналлаах “Дьулурҕан” сыһыарыыта көҥүл тустууга аан дойду Кубогар анаан анал бэчээтинэй бородууксуйа оҥорон таһаарбыта. Онно, тустууну сэҥээрээччилэргэ куонкурус биллэриллибитэ. Кыайыылааҕынан Дьокуускайтан тустуу бэриниилээх ыалдьааччыта Василий Николаевич Обулахов буолбута. Бүгүн киниэхэ өйдөбүнньүк бирииһэ үөрүүлээх быһыыга туттарылынна.

Үгэс быһыытынан кыайыылааҕы билиһиннэрдэххэ, Василий Николаевич Үөһээ Бүлүү Хоротуттан төрүттээх эбит. Уон бииргэ төрөөбүт Обулаховтартан биирдэстэрэ. Кинилэри успуордунан дьарыктаныы киэҥ аартыгар, билиигэ-көрүүгэ төрөппүт аҕалара – Үлэ Кыһыл Знамята уордьан кавалера, Саха АССР VII ыҥырыылаах Үрдүкү Сэбиэтин дьокутаата, биллиилээх оҕуруотчут Николай Семенович Обулахов сиэтэн киллэрбит. Уолаттар бары оҕо эрдэхтэриттэн хапсаҕайынан, көҥүл тустуунан дьарыктанан тус бэйэлэрэ эриэ-дэхси көрдөрүүлээхтэр. Дмитрий уонна Данил Николаевичтар көҥүл тустууга ССРС спордун маастарыгар хандьытааттар. Өссө Дмитрий Обулахов курдаһан тустууга Арассыыйа икки төгүллээх призера.

В.Н. Обулахов – Үөһээ Бүлүү коммунальнай хаһаайыстыбатын филиалын инженер-хааччыйааччытынан үлэлиир. Көҥүл тустууга уонна хапсаҕайга өрөспүүбүлүкэ бэтэрээннэргэ үстүү төгүллээх чөмпүйүөнэ. Арассыыйа уонна Саха Өрөспүүбүлүкэтин коммунальнай хаһаайыстыбатын бочуоттаах үлэһитэ, Үөһээ Бүлүү улууһун Хоро нэһилиэгин бочуоттаах гражданина.

Аан дойду Кубогар аналлаах сурунаалы күрэхтэһии саҕаланыа икки күн иннинэ Бэчээт дьиэтин хаһыаты атыылыыр киоскатыттан ылбытым, – диир Василий Николаевич. – Улахан түһүлгэ иннинэ маннык сиэдэрэй көстүүлээх бэчээтинэй бородууксуйа тахсара үчүгэй бөҕө буоллаҕа дии. Бу иннинэ таба түбэстэхпинэ куонкуруска кыттааччыбын да, хаһан даҕаны кыайбатаҕым.

Кубок туһунан эттэххэ, монголларга эрэммитим,тоҕо эрэ  мөлтөх соҕустук кытыннылар. Американецтар тустууларын астынным. Бу күрэхтэһии Саха сиригэр тустуу салгыы сайдарыгар төһүү буоларыгар эрэнэбин.  

Манна даҕатан эттэххэ, Василий Николаевич чөл, чэгиэн-чэбдик олоҕу тутуһар киһи. Спорт куттаах буолан, күннэтэ “Модун” успуорт төрүт көрүҥнэрин киинигэр хапсаҕайга дьарыктанар эбит, эбиитин көй салгыҥҥы сүүрэрин сөбүлүүр. Бу дьарыгар оҕолорун эмиэ угуйар. Ол курдук, кыра кыыһа, төрдүс кылааска үөрэнэр Дарина харбааһыҥҥа өрөспүүбүлүкэ чөмпүйүөнэ. Кини тириэньэр Михаил Андылыров салалтатынан эрчиллэр. Чэпчэки атлетиканан эмиэ утумнаахтык дьарыктанар. Оттон Василий Николаевич бэйэтэ сотору кэминэн буолаары турар өрөспүүбүлүкэ бэтэрээннэргэ чөмпүйэнээтигэр тустарга былааннанар.

Куонкурус кыайыылааҕар Саха Өрөспүүбүлүкэтин Спорка бэлэмнэниигэ киинэ (ЦСП) көҥүл тустууга аан дойду Кубогар анаан бэлэмнээбит өйдөбүнньүк бэлэҕэ туттарылынна. Бирииһи хааччыйбыт киин отделын начаалынньыга Нина Павловна Сидороваҕа истиҥ махтал! Аны “Дьулурҕан” маннык куонкуруһа Арассыыйа көҥүл тустууга чөмпүйэнээтин иннинэ тэриллиэҕэ.

“Дьулурҕанныын” бииргэ буолуҥ! “Дьулурҕаны” олоххут аргыһа оҥостуҥ! “Дьулурҕан” куонкурустарыгар көхтөөхтүк кыттан, бириистэ сүүйүҥ!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *