«Коркинныы олоруохха! Коркинныы айыахха!»


Бу күннэргэ, “Строительнай” Атыы киинин Быыстапкалыыр саалатыгар “Коркинныы олоруохха! Коркинныы айыахха!” диэн, биһиги улуу тренербит Дмитрий Петрович Коркин төрөөбүтэ 90 сылыгар анаан тэриллэр республикатааҕы быыстапкаҕа бэлэмнэнии, экспозициялары туруоруу, сааланы киэргэтии үлэлэрэ үгэннээн ыытылла турар.

Дьоллоох Дьокуускай куорат олохтоохторо уонна ыалдьыттар быыстапкаҕа – Чурапчытааҕы Д.П. Коркин аатынан Тустуу Албан аатын музейын (Е.В. Пудов, Н.Н. Гуляев) экспонаттарын; Уус Алдан улууһун историятын музейын спорка сыһыаннаах стендэтин, кубоктарын; Р.М. Дмитриев аатынан Олимпийскай эрэл училищетын стендэтин; Д.П. Коркин олоҕун аргыһа Александра Семеновна биэрбит – Дмитрий Петрович бочуотунай грамоталарын, сэдэх хаартыскаларын, үлэҕэ киниискэтин; Үөһээ Дьааҥы Табалааҕыттан коллекционер Платон Егорович Эверстов мунньубут Д.П. Коркин турнирдарын араас сыллардааҕы мэтээллэрин; спорт биллиилээх салайааччыта уонна тэрийээччитэ Михаил Егорович Друзьянов республикаҕа тахсыбыт тустуу туһунан кинигэлэрин коллекциятын; ССРС спордун үтүөлээх маастара Василий Николаевич Гоголев көбүөргэ ситиспит мэтээллэрин; спорду сырдатааччы Владислав Петрович Коротов бэйэтэ бэлэмнээн таһаарбыт кинигэлэрин уонна хаартыскаларын; ССРС физическэй култуураҕа уонна спорка туйгуна, Д.П. Коркин биир санаалааҕа Дмитрий Семенович Тимофеев кинигэлэрин, грамоталарын;

Саха Республикатын үтүөлээх тренерэ Николай Николаевич Волков, номоххо киирбит тустуук Николай Семенович Захаров-Сахаачча уонна Үөһээ Бүлүүтээҕи оҕо спортивнай оскуолатын дириэктэрэ Валерий Николаевич Семенов спорка олохторун көрдөрөр стендэлэрин; СР үтүөлээх тренерэ Афанасий Афанасьевич Лугинов “Коркин дабаана” эрчиллэр тэрилин; биллиилээх коллекционер Юрий Щукин спорка сыһыаннаах сэдэх мэтээллэрин; спорду сырдатааччы Петр Семенович Павлов бэйэтин кинигэлэрин, тустууга сыһыаннаах вымпелларын, плакаттарын; аатырбыт тустууктар Леонид Спиридонов, Алексей Соловьев, Афанасий Заболоцкай, Андрей Яковлев, Прокопий Петров, Григорий Массаев – тустууга бэйэлэрэ ситиспит мэтээллэрин; Д.П. Коркин аатын үйэтитиигэ сыралаһан үлэлээн, улуу тренер туһунан спортивнай музейы төрүттээччи Константин Сергеевич Постников муспут сэдэх матырыйаалларын (омук хаһыаттарыгар бэчээттэммит ыстатыйалары, вымпеллары, кубоктары) төрөппүт кыыһа Саргылана Константиновна аҕалан көрдөрүүгэ туруорбутун кэрэхсии көрүөххүт.
Бу улахан тэрээһини — “Саха” национальнай көрдөрөр-иһитиннэрэр хампаанньа телевизорынан уонна радионан оҕо биэриитигэр академиятын толорооччу дириэктэрэ, Саха Республикатын култууратын үтүөлээх үлэһитэ Татьяна Афанасьевна Гоголева сүрүннээн, салайан тэрийэр.

Быыстапка кэмигэр “Саха” национальнай көрдөрөр-иһитиннэрэр хампаанньа архыыбыттан саха тустуутун туһунан киинэлэр көрдөрүллүөхтэрэ.

Быыстапка бэйэтин үлэтин балаҕан ыйын 4 күнүттэн саҕалыаҕа. Ол курдук, бу күн күнүс 14:00 чаастан спортивнай суруналыыс, “Дьулурҕан” хаһыат редактора Петр Семенович Павлов “Тустууга таптал хайдах үөскүүрүй?” диэн тус бэйэтин быыстапкатын билиһиннэриэҕэ.

Балаҕан ыйын 5 күнүгэр күнүс 12:00 чаастан “Коркинныы олоруохха, Коркинныы айыахха!” республикатааҕы быыстапка үөрүүлээхтик аһыллыыта ыытыллыаҕа. Бу күн, күнүс 14:00 чаастан биллиилээх суруналыыс, СР суруйааччыларын сойууһун чилиэнэ, “Киин куорат” хаһыат кылаабынай редактора Иван Петрович Ушницкай “Оо, Сахаачча, Сахаачча” кинигэтин сүрэхтэниитэ буолуоҕа.

Эмиэ бу күн А.С. Пушкин аатынан республикатааҕы национальнай библиотека үлэһиттэрэ Саха сиригэр бэчээттэнэн тахсыбыт тустуу туһунан кинигэлэри ырытыылара тэриллиэҕэ.

Балаҕан ыйын 7 күнүгэр – сарсыарда 10:00 чаастан Чурапчытааҕы оҕо спортивнай интернат-оскуолатын араас сылларга үөрэнэн бүтэрбит дьон көрсүһүүлэрэ ыытыллыаҕа.

Быыстапка балаҕан ыйын 10 күнүгэр диэри үлэлиир. Күндү Дьокуускай куорат олохтоохторо уонна ыалдьыттара быыстапканы кэлэн көрөргүтүгэр ыҥырабыт. Буолар сирэ — “Строительнай” Атыы киинин Быыстапкалыыр саалата, бастакы этээс, Жорницкай уул. 35 №-рэ. Билсэр телефоннаргыт: 759-100, 700-524, 33-20-30.

Добавить комментарий

Ваш адрес email не будет опубликован. Обязательные поля помечены *