Киһини толкуйдатар дириҥ ис хоһоонноох…

Саҥа дьыл бырааһынньыгын аҕай иннинэ бэлэх туттум. Тааттаттан аҕа саастаах доҕорум – көҥүл тустууга ССРС спордун маастара, Сэбиэскэй Сойуус Сэбилэниилээх Күүстэрин үс, Украинскай ССР икки төгүллээх чемпионнара, Таатта улууһун бочуоттаах гражданина Гаврил Каприн субу аҕай бэчээттэтэн таһааттарбыт сабыс-саҥа кинигэтэ. “Дойдум дьоно” диэн ааттаах, сүрдээх истиҥ тыллардаах ахтыы кинигэ.

Сэрии ыар сылларыгар доруобуйаларын айгыратан, олохтон олус эрдэ туораабыт ийэлээх аҕатын ахтан-санаан бэлэмнээбит бу кинигэтин ааптар Улуу Кыайыы 75 сылыгар анаабыт. Сүгүрүйүү, кэриэстэбил, үйэтитии курдук ылыныахха сөп. Кинигэ ис хоһоонун бу суруйууга эридьиэстии барбаппын. Сэҥээрбит дьон бэйэҕит булан ааҕаарыҥ, сыаналаарыҥ. Биллэн турар, кинигэҕэ сүрүн миэстэни тустуу ылбыт. Кинигэҕэ улуу тренер Дмитрий Петрович Коркин, кини иитиллээччилэрэ Роман, Гавриил Дмитриевтэр, Александр Иванов, Владимир Андросов, Илларион Федосеев, Николай Захаров – Сахаачча, Калистрат Владимиров, Александр Аргунов, Роман Неустроев уо.д.а. саха тустуутун албан аатырдыбыт бөҕөстөр тустарынан бэрт итэҕэтиилээхтик сырдатыллар.

Гаврил Иванович Каприны кытта билсиим, доҕордоһуум барыта, сэрэйбиккит курдук, тапталлаах тустуубутуттан саҕаламмыта диэтэххэ сыыһа буолбата буолуо. Сүүрбэччэ сыл буолла быһыылаах, билсибиппит. Ол тухары тустуу туһунан элбэҕи кэпсэтэн, ырытан кэллибит. Түбүктээх үлэтин быыһыгар Дьокуускайга кэллэҕинэ, хайаан даҕаны үлэбэр киирэн, кылгастык да буоллар сэһэргэһэн ааһааччы. Кини, саха интеллигенциятын, улуу суруйааччыларын төрөтөн-үөскэтэн таһаарбыт Талыы Талба Тааттаттан тардыылаах буолан, өйө-санаата сахалыы, билиитэ-көрүүтэ мындыр, тыла-өһө олохтоох. Атыттартан ураты, бөлөһүөктүү көрүүлээх, санаалаах. Ол иһин аҕа саастаах доҕорбун кытта тапсан, астына сэһэргэһээччибин.

Дьэ, ити курдук билсэн, кинини улам-улам суруйууга сирдээн, “Дьулурҕан” хаһыат биир кэрэхсэнэр ааптара буоларыгар угуйан киллэрдим дии саныыбын. “Гаврил Каприн, Таатта” диэн илии баттааһыннаах тустуу туһунан суруйуулар ааҕааччылар биһирэбиллэрин ылбыттара диэххэ сөп. Ол суруйуулар атыттартан уратылаахтар. Көннөрү билиһиннэрии, этии, кэпсээһин курдук буолбатахтар, киһини толкуйдатар дириҥ ис хоһоонноох буолааччылар. Ону, Гаврил Иванович – Роман Дмитриев Сергей Корнилаевтыын Москваҕа ССРС чемпионатын финалыгар тустуутун ырытыытыттан, эбэтэр, Александр Иванов ураты тустар ньыматын арыйан суруйуутуттан ааҕан билиэххэ сөп.

Аны бу кинигэ мээнэ кинигэ буолбатах, алгыстаах. Гаврил Иванович, кинигэ саҕаланыытыгар бу үлэни миэхэ бэлэхтиирин туһунан суруйбут эбит буоллаҕына, кинигэ бүтүүтэ, ытык айылҕаҕа Аал уотун оттор хаартыскатын таһыгар эмиэ уруучуканан сахалыы сиэринэн анал алгыс суруйбут: “Алгыһым араҥаччылаатын! Харысхалым хаххалаатын? Тулалыыр эйгэҥ сылаас, ыраас, эйэлээх буолуохтун!” – диэн баран, илии баттаабыт.

Онуоха мин испэр:” Алгыс баһа сыаланнын! Барыта оннук, этиллибитин курдук буоллун”, — диэн сибигинэйэн ыллым.

Ытыктабыллаах Гаврил Иванович! Сыаналаах бэлэҕин иһин барҕа махтал буолуохтун! Кырдьык да уот харахха этэн кэбиспиттэр эбит ээ, “Кинигэ – бастыҥ бэлэх” диэн. Миэхэ итинник бэлэх наһаа күндү уонна сыаналаах. Эн бу орто туруу дойдуга төрөөн кэлэҥҥин биир иэскин толордун – төрөппүттэргин кэриэстээн, дойдуҥ дьонун ахтан-санаан кинигэ бэчээттэтэн таһааттардын. Киһиэхэ бу биир улахан ситиһии. Мантан дуоһуйан, олорон хаалбакка, айар талааҥҥын өссө арыйан, элбэх суруйууларгынан дьонуҥ-сэргэҥ биһирэбилин ыла тураргар баҕарабын!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *